بيشىمبايەۆ تەرگەۋ يزولياتورىندا دا ءوز-ءوزىن ولتىرۋگە وقتالعان

ەكس-مينيستر قۋاندىق بيشىمبايەۆقا قاتىستى سوت وتىرىسى جالعاسىپ جاتىر. ەكىنشى مەملەكەتتىك ايىپتاۋشى ساياحات نۇربەكوۆ قۋاندىق بيشىمبايەۆتان جاۋاپ الا باستادى.

پروكۋرور نۇربەكوۆ بيشىمبايەۆتان سول كۇنگى وقيعادان كەيىن تاعى دا سۋيتسيدكە وقتالۋ ارەكەتى بولىپ-بولماعانىن سۇرادى.

«تەرگەۋ يزولياتورىندا دا ونداي ارەكەتتەر جاساۋعا تىرىستىم»، - دەدى بيشىمبايەۆ.

ارتىنشا مەملەكەتتىك ايىپتاۋشى بەس اي بويى بەينەباقىلاۋ كامەرالارىن باقىلاعانىن، الايدا مۇنداي ارەكەتتى بايقاماعانىن مالىمدەدى.

«قۇرمەتتى سوت، قۇرمەتتى القابيلەر، بيشىمبايەۆ ۇستالعان ساتتەن باستاپ بەس اي بويى جەكە ءوزىم پروتسەسسۋالدىق پروكۋرور رەتىندە تەرگەۋ يزولياتورىنىڭ كامەراسىنا ورناتىلعان بەينەباقىلاۋ كامەراسىن قارادىم. سوعان نازار اۋدارساڭىزدار دەيمىن. وسى بەس اي ىشىندە بىردە-ءبىر رەت وزىڭىزگە زيان كەلتىرۋگە تىرىسپادىڭىز. سول كۇنى كۋاگەردىڭ كوزىنشە ءوز-ءوزىن ولتىرۋگە وقتالعانداي ارەكەت نە ءۇشىن ىستەلدى؟» - دەدى پروكۋرور ساياحات نۇربەكوۆ.

ەسكە سالايىق، بۇعان دەيىن دە قۋاندىق بيشىمبايەۆ سوت وتىرىسىندا وقيعا بولعان كۇنى نەگە پىشاق ۇستاپ جۇرگەنىن تۇسىندىرگەن بولاتىن.

«...مەن ول كوز جۇمعانىن ءتۇسىندىم. جەدەل جاردەم كەلىپ، جانساقتاۋ شارالارىن ىستەي باستادى. مەن ەسەڭگىرەپ قالدىم. كەيىن اس ۇيگە بارىپ، پىشاق الدىم. ءبىر عانا وي بولدى: ءوز-وزىمە قول جۇمساسام دۇرىس بولادى دەپ ويلادىم. كەيىن پوليتسيا كەلدى. ءمان-جاي وسىلاي بولدى»، - دەدى بيشىمبايەۆ.

Massaget.kz