بيشىمبايەۆ ءىسى: بۇگىنگى سوت نەسىمەن ەستە قالدى

استانا. KAZINFORM - ەكس-مينيستر قۋاندىق بيشىمبايەۆتىڭ سوتىندا كۇن سايىن تىڭ دەرەكتەر جاريالانىپ كەلەدى. قوس تاراپتىڭ قورعاۋشىلارى بىلىكتىلىگىن تانىتىپ، ءار ءسوزدى، ءار سەكۋندتى تالداپ جاتىر.

بۇگىن بيشىمبايەۆتىڭ ادۆوكاتى ەرلان عازىمجانوۆ «ادەتىنە باسىپ»، سۋديا ايجان قۇلبايەۆاعا «سوت ءبىرجاقتى ءوتىپ جاتىر» دەپ بايبالام سالدى. ءتىپتى، ادىلەتسىز سوت ءىسىن جۇرگىزىپ جاتىرسىز دەپ سوتقا قارسى شىقتى.

«مەن ءسىزدىڭ ارەكەتتەرىڭىزگە قارسىلىق بىلدىرۋگە ءماجبۇرمىن، ويتكەنى ءسىز پروتسەستى ءبىرجاقتى جۇرگىزىپ جاتىرسىز. ءسىز مەملەكەتتىك ايىپتاۋدىڭ كىشىگىرىم وتىنىشتەرىنە دەيىن قاناعاتتاندىراسىز. ال ءبىزدىڭ دالەلدى وتىنىشتەرىمىزدەن باس تارتاسىز. مەن ءسىزدىڭ ارەكەتتەرىڭىزگە قارسىلىق بىلدىرۋگە ءماجبۇرمىن»، - دەدى عازىمجانوۆ.

سۋديا ادۆوكاتقا ءجونسىز ايىپ تاققانى ءۇشىن ەسكەرتۋ جاسادى.

بۇدان كەيىن سوتتا سالتانات نۇكەنوۆانىڭ قۇربىسى ايدا احمەدينا توبە كورسەتىپ، ساۋالدارعا جاۋاپ بەردى. سونداي-اق، مارقۇم قۇربىسىمەن جازىسقان حاتتاردى وقىپ بەردى. وندا سالتانات قۋاندىق بيشىمبايەۆپەن بىرگە تۇرا المايتىنىن، تايلاندتان 10 مىڭ دوللارعا پسيحولوگ كەلىپ، ءبىراق بيشىمبايەۆقا ەم قونباعانىن ايتقان.

«ونىڭ ويى ىلعي ساندىراق. تىڭداماسام جىندانىپ، ايعايلايدى. شىنىمدى ايتسام، مەن ونى ايايمىن. ول جارالى ادام. مەن وعان كومەكتەسكىم كەلگەن، ءبىراق مەن ءوز-ءوزىمدى ءولتىرىپ تىناتىن شىعارمىن...»، - دەپ جازعان سالتانات قۇربىسىنا.

بۇدان كەيىن سوتتا تاعى ءبىر ايىپتالۋشى باقىتجان بايجانوۆتىڭ ۇيالى تەلەفونىنداعى دەرەكتەر جاريالاندى.

تەلەفوندا سالتانات نۇكەنوۆا كوز جۇمعان كۇنى تۇسىرىلگەن ۆيدەو ساقتالعان ەكەن. بايجانوۆتىڭ ايتۋىنشا، جەدەل جاردەم قىزمەتكەرلەرى سالتاناتتىڭ ءولىمىن تىركەپ، جاريا قىلعاننان كەيىن بيشىمبايەۆ ءوزىن ۆيدەوعا ءتۇسىرۋدى ءوتىنىپتى.

پروكۋرور سوتتا ۆيدەونى كورسەتۋگە شەكتەۋ قويىپ، اۋديو دىبىستى تىڭداتتى. ۆيدەونىڭ بىرەۋى 9، ەكىنشىسى 12 سەكۋندقا سوزىلعان. بەينەجازبالار 2023-جىلدىڭ 9-قاراشاسىندا ساعات 20.17 دە تۇسىرىلگەن.

«بار دۇنيەمدى، شوتتارىمدى بالالارىما سىيلايمىن. نازىمعا سىيلايمىن. بالالارىمدى اسىراسىنشى. سونىڭ 10 پايىزىن مەن مانسۇر، كاريم، رانياعا سىيلايمىن. نازىمعا سىيلايمىن. وسىنى ايتام»، - دەپتى بيشىمبايەۆ.

استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءوتىپ جاتقان سوت پروتسەسى 18-ساۋىردە ساعات 09.30 دە جالعاسادى.