بيشىمبايەۆ ءىسى ارقىلى تانىلعان ءۇش ادۆوكات تا تەگىن قورعاپ جاتىر - دانا اتەشوۆا

استانا. قازاقپارات - بيشىمبايەۆ ءىسى ارقىلى تانىلعان ادۆوكاتتار دانا اتەشوۆانىڭ مۇددەسىن تەگىن قورعايدى.

بۇل تۋرالى اتەشوۆانىڭ Massaget.kz تىلشىسىنە بەرگەن سۇحباتىندا بەلگىلى بولدى.

مارات ايتەنوۆ دانا اتەشوۆا مەن بالالارىن كۇشپەن ۇيدەن شىعارىپ جىبەرگەنى قوعامدا رەزونانس تۋدىرعاننان كەيىن ءىستى ەلگە تانىمال ادۆوكاتتار قولعا العانى بەلگىلى. ولار اقى سۇراماي، تەرگەۋ پروتسەسىنە بەلسەنە ارالاسىپ كەتكەن.

«جاننا ورازباحوۆا، دامير يشمامەتوۆ، ءاليا وماروۆا سەكىلدى ادۆوكاتتار بۇل ىسكە تەگىن كىرىستى. كوپ راقمەت ايتقىم كەلەدى»، - دەدى دانا اتەشوۆا.

مارات ايتەنوۆكە قارسى ىستە دانانىڭ مۇددەسىن قورعاپ جاتقان ادۆوكاتتاردىڭ ءبىرى دامير يشمامەتوۆ قازىرگى جاعداي تۋرالى ايتتى.

ادۆوكات قازىر تاراپتار ءىستىڭ بارىسىمەن تانىسىپ جاتقانىن، قىلمىستىق كودەكستىڭ 109-بابى (ۇرىپ-سوعۋ) بويىنشا سوتقا جىبەرىلەتىنىن مالىمدەدى.

«ارىپتەستەرىمىزبەن دانانىڭ مۇددەسىن ( pro bono - قايىرىمدىلىق، قوعامدىق جانە وزگە دە كوممەرتسيالىق ەمەس ۇيىمدارعا وتەۋسىز نەگىزدە كاسىبي كومەك كورسەتۋ) اقىسىز نەگىزدە قورعايمىز. بالالار اكەسىنىڭ زاڭسىز ارەكەتتەرىنەن زارداپ شەككەنىن كورگەندە بەي-جاي قاراي المادىق. دانا قازىر زاڭعا سايكەس نەكەدە تۇرعان كەزدەگى مۇلىكتى بولىسكىسى كەلەدى»، - دەدى دامير يشمامەتوۆ.

ايتا كەتەيىك، نۇكەنوۆتەردىڭ مۇددەسىن قورعاعان جاننا ورازباحوۆا، ءاليا وماروۆا، دامير يشمامەتوۆ سەكىلدى ادۆوكاتتار بيشىمبايەۆ ىسىندە جەڭىسكە جەتىپ، بيشىمبايەۆ 24 جىلعا، بايجانوۆ 4 جىلعا سوتتالعان ەدى.

ەسكە سالايىق، بۇعان دەيىن شىمكەنتتە ەكس-اكىمنىڭ اعاسى بۇرىنعى ايەلى مەن ءۇش بالاسىن ۇيىنەن كۇشتەپ قۋىپ شىققانى تۋرالى ۆيدەو تاراپ كەتتى. بۇل ۋاقىتتا پوليتسيا وقيعانى كوشەدە باقىلاپ تۇرعان.

«ەڭ سوراقىسى ايەلدى شاشىنان سۇيرەپ، كۇش قولدانعاندا، ءبارىن پوليتسەيلەر كامەراعا ءتۇسىرىپ تۇر»، - دەپ جازىلعان جازبادا.

دانا اتەشوۆا بۇل جاعدايدان سوڭ پرەزيدەنت قاسىم-جومارت توقايەۆتان وزىنە جانە بالالارىنا كومەكتەسۋىن ءوتىنىپ، ۇندەۋ جاسادى. ال استانا پوليتسياسى ايتەنوۆ وتباسىن ۇيىنەن قۋىپ شىققان شۋلى ۆيدەودان كەيىن تەرگەۋ جۇرگىزىلگەنىن حابارلادى. كەيىن شىمكەنتتە ەكس-اكىمنىڭ اعاسى مارات ايتەنوۆ ۇستالدى.

داۋلى وقيعادان سوڭ سوت شەشىمى شىعىپ، ايەلىن بالالارىمەن ۇيىنەن قۋىپ شىققان مارات ايتەنوۆ 5 تاۋلىككە قاماۋعا الىندى.

سونىمەن قاتار، بالا قۇقىقتارى جونىندەگى ۋاكىل دينارا زاكييەۆا جاعدايعا قاتىستى پىكىر ءبىلدىرىپ، بالالار قورعاۋعا الىنعانىن ايتتى.

كەيىنگى كەزدە وتباسىنداعى تۇرمىستىق زورلىق-زومبىلىق دەرەگىنىڭ قاتارى كوبەيىپ بارا جاتىر. دەرەكتەرگە سۇيەنسەك، قازاقستاندا وتباسىلىق- تۇرمىستىق اكىمشىلىك قۇقىقبۇزۋشىلىق 90 پايىزعا كوبەيىپ كەتكەن. بىلتىر قازاقستاندا تۇرمىستىق زورلىقتان 69 ايەل، 7 بالا قايتىس بولعان.