بىشكەكتە قىتاي-قىرعىزستان-وزبەكستان تەمىر جول قۇرىلىسىن جۇرگىزەتىن كومپانيا قۇرىلدى

استانا. KAZINFORM - بىشكەكتە قىتاي- قىرعىزستان- وزبەكستان تەمىر جول قۇرىلىس كومپانياسىنىڭ كەڭسەسى قۇرىلدى. قىرعىزستان پرەمەر- ءمينيسترى اقىلبەك جاپاروۆ جوبانى «عاسىر قۇرىلىسى» دەپ اتادى، دەپ حابارلايدى قىرعىزستان مينيسترلەر كابينەتىنىڭ باسپا ءسوز قىزمەتى.

قىرعىزستان پرەمەر- ءمينيسترى اقىلبەك جاپاروۆ بۇل جوبانىڭ ەلدە جوعارى باعالانىپ وتىرعانىن ايتىپ، ونى «عاسىر قۇرىلىسى» دەپ اتادى. ونىڭ ايتۋىنشا، بۇل تەمىر جول قۇرىلىسى قىتاي مەن ورتالىق ازيا ەلدەرىنىڭ ەكونوميكالىق ىنتىماقتاستىعىن ساپالى جاڭا دەڭگەيگە كوتەرەدى.

- وسى تاريحي وقيعاعا جەتۋ ءۇشىن ۇلكەن ءارى ناتيجەلى جۇمىس اتقارىلدى. ءبىراق بۇل جوبانى تولىق جۇزەگە اسىرۋ جولىنداعى العاشقى قادام ەكەنىن جانە الدىمىزدا ۇلكەن مىندەتتەر تۇرعانىن ايتا كەتكەن ءجون. بۇل رەتتە قىتايلىق جانە وزبەكستاندىق ارىپتەستەرىمىزدىڭ باي تاجىريبەسىنە سۇيەنە وتىرىپ، ءبىز بۇل جۇمىستاردى ساپالى ءارى مەرزىمىندە اياقتايمىز دەپ سەنىممەن ايتا الامىز،- دەدى ول.

شىلدە ايىندا وزبەكستان پرەزيدەنتى قىتاي-قىرعىزستان-وزبەكستان تەمىر جولىنىڭ قۇرىلىسىنا جوبالىق كومپانيانىڭ جارعىلىق قورىنا 255 ميلليون دوللار ءبولۋ تۋرالى تاپسىرما بەرگەن بولاتىن. ونىڭ 14 ميلليون دوللارى وسى جىلدىڭ سوڭىنا دەيىن ءبولىنۋى ءتيىس.

جالپى بىرلەسكەن كومپانياداعى قىتايدىڭ ۇلەسى 51 پايىزدى، وزبەكستان مەن قىرعىزستاننىڭ ۇلەسى 24,5 پايىزدى قۇرايدى. ونىڭ قۇرىلتايشىلارى رەتىندە China Railway International Co.، Ltd.، قىرعىزستاننىڭ «قىرعىز تەمىر جولى» جانە وزبەكستاننىڭ «وزبەكستان تەمىر جولى» قاتىسۋدا. قىرعىزستان ءوز بيۋدجەتىنەن 11 ميلليارد سۋم (شامامەن 130,5 ميلليون دوللار) ءبولۋدى جوسپارلاپ وتىر.

وزبەكستاننىڭ كولىك مينيسترلىگى وكىلىنىڭ ايتۋىنشا، قىتاي اۋماعىنداعى تەمىرجول قۇرىلىسى تولىعىمەن قىتاي تاراپىنان جۇزەگە اسىرىلىپ، قارجىلاندىرىلادى. ولار قىرعىزستانداعى پروتسەستەرگە دە قاتىسادى. وزبەكستاندا جوباعا قوسىلۋ ءۇشىن شامامەن 10 شاقىرىم جول سالىنۋى كەرەك. جۇمىستىڭ نەگىزگى بولىگى قىرعىزستاندا.