بيبىگۇل تولەگەنوۆانى Air Astana اۋە كومپانياسى ۇشاعىنا نەلىكتەن بىردەن كىرگىزبەگەن
استانا. KAZINFORM - Air Astana كومپانياسى حالىق ءارتىسى بيبىگۇل تولەگەنوۆامەن بولعان جايتقا قاتىستى تۇسىنىكتەمە بەردى.
الەۋمەتتىك جەلى قولدانۋشىسى لەكا ساۆەليەۆا Air Astana اۋە كومپانياسىنىڭ پرەزيدەنتى پيتەر فوستەرگە اشىق حات جازعان.
ونىڭ مۇزمۇنىنا قاراساق، كومپانيا قىزمەتكەرلەرى حالىق ءارتىسى بيبىگۇل تولەگەنوۆانى ۇشاققا دەرەۋ وتىرعىزباعان جانە دورەكىلىك تانىتقان.
«Air Astana اۋە كومپانياسى ءۇشىن قاۋىپسىزدىك باستى باسىمدىق. حالىقارالىق اۆياتسيالىق قاۋىپسىزدىك ەرەجەلەرىنە سايكەس، قيمىل قوزعالىسى شەكتەۋلى جولاۋشىلار بورتقا وتىرعىزۋدىڭ باسىندا نەمەسە سوڭىندا شاقىرىلادى. بۇل ەرەجە بارلىق جولاۋشىنى وتىرعىزۋ ءۇشىن قولايلى ءارى تەرمينالدان ەۆاكۋاتسيالاۋ تارتىبىمەن بايلانىستى»، - دەپ تۇسىندىرگەن اۋە كومپانيادان.
كومپانيانىڭ تۇسىندىرۋىنشە، حالىق ءارتىسى بيبىگۇل تولەگەنوۆا قىزىمەن ۇشاققا جولاۋشىلاردى وتىرعىزۋ باستالعاندا كەلگەن، سوندىقتان اۋە قىزمەتكەرى ارتىستەن جولاۋشىلاردى وتىرعىزۋدىڭ اياقتالۋىن كۇتۋدى وتىنگەن.
«اۋە كومپانيا تۇسىنىسپەۋشىلىك جاعدايعا وكىنىش تانىتادى جانە قىزمەت كورسەتۋ ساپاسىن ارتتىرۋ ماقساتىندا اتالعان جاعداي بويىنشا قوسىمشا تەكسەرۋ جۇرگىزىلەدى»، - دەيدى Air Astana-دان.
ايتا كەتسەك، بولعان جايتقا قاتىستى مادەنيەت جانە اقپارات ءمينيسترى ايدا بالايەۆا پىكىر ءبىلدىردى.
«قازاقستاننىڭ جانە ك س ر و- نىڭ حالىق ءارتىسى، اتى اڭىزعا اينالعان ءانشى بيبىگۇل تولەگەنوۆانى Air Astana اۋە كومپانياسىنىڭ بورتىنا وتىرعىزۋ كەزىندە بولعان وتە ىڭعايسىز جاعداي مەنى دە قاتتى الاڭداتتى. اۋە كومپانياسى بۇل ماسەلەگە قاتىستى تۇسىنىكتەمە بەرىپ، اۋە قاۋىپسىزدىگىنىڭ حالىقارالىق ەرەجەلەرى ەسكە سالدى. ارينە، ۇشاقتىڭ جانە جولاۋشىلاردىڭ قاۋىپسىزدىگىن قامتاماسىز ەتۋگە ارنالعان ەرەجەلەر قاتاڭ ساقتالۋعا ءتيىس»، - دەپ جازدى مينيستر Facebook پاراقشاسىندا.
ءمينيستردىڭ پىكىرىنشە، اۋە كومپانياسى مەن ونىڭ قىزمەتكەرلەرى ىشكى نۇسقاۋلىقتاردان بولەك، قاراپايىم ەتيكانى، ادامي قارىم-قاتىناستى ساقتاپ، ءوز كليەنتتەرىنە قۇرمەتپەن قاراۋى كەرەك.
«اسىرەسە، جاسى ۇلكەن جولاۋشىلارعا، وتان الدىندا ايرىقشا ەڭبەگى بار ادامدارعا ەرەكشە قۇرمەت كورسەتىلۋگە ءتيىس. ويتكەنى اعا بۋىنعا قۇرمەت - تاربيە مەن ىشكى مادەنيەت ماسەلەسى. ال قازاق ونەرىنىڭ بۇلبۇلى، ونەر مايتالمانى بيبىگۇل احمەت قىزىنا زور دەنساۋلىق، ۇزاق ءومىر مەن سارقىلماس كۇش- جىگەر تىلەيمىن»، - دەيدى ا. بالايەۆا.
