بوزوق قورىق-مۋزەيىندە «قىمىزمۇرىندىق» فەستيۆالى ءوتتى
استانا. KAZINFORM - بۇگىن «بوزوق» مەملەكەتتىك تاريحي-مادەني مۋزەي-قورىعى حالقىمىزدىڭ كونە داستۇرلەرىنىڭ ءبىرى «قىمىزمۇرىندىق» مەيرامىنا ارنالعان رەسپۋبليكالىق ەتنوفەستيۆال ۇيىمداستىردى. بۇل تۋرالى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى ءمالىم ەتتى.
فەستيۆالگە جەتەكشى وتاندىق جانە شەتەلدىك عالىمدار، ەتنوگرافتار، ونەر قايراتكەرلەرى قاتىستى. باعدارلامادا ەتنوگرافيالىق قويىلىمدار، قىمىز اشىتۋ ءراسىمى مەن ۇلتتىق تاعامداردان ءدام تاتۋ، قولونەر شەبەرلەرىنىڭ جۇمىستارى قويىلعان كورمەلەر مەن تانىستىرىلىمدار ۇيىمداستىرىلىپ، ەتنو-انسامبلدەر مەن شىعارماشىلىق ۇجىمدار ونەر كورسەتتى.
2018-جىلى «قىمىزمۇرىندىق» ءداستۇرى يۋنەسكونىڭ ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەندى. بۇل - حالقىمىزدىڭ ءومىر سالتى، دۇنيەتانىمى تابيعاتپەن ۇندەس ەكەنىنىڭ ايعاعى. اتالمىش ءىس-شارا «بوزوق-وڭىرلەردە» اكسياسى اياسىندا ءوتتى.
فەستيۆال بوزوق ۇلتتىق ارحەولوگيالىق پاركىنىڭ قۇرىلۋى تۋرالى تاريحي-مادەني جوبانى كەڭىنەن ناسيحاتتاۋ، سونداي-اق ەۋرازيا دالالىق وركەنيەتتەرىنىڭ ماتەريالدىق ەمەس مۇراسىن ساقتاۋ مەن قايتا جاڭعىرتۋدى ماقساتىندا ۇيىمداستىرىلدى.
ۇيىمداستىرۋشىلاردىڭ ايتۋىنشا، ۇلتتىق داستۇرلەردى ساقتاۋ - بۇل تەك مادەني قۇندىلىق قانا ەمەس، سونىمەن قاتار جاس ۇرپاقتىڭ تاريحي ساناسىن قالىپتاستىرۋ مەن رۋحاني ساباقتاستىقتى نىعايتۋدىڭ نەگىزى.
2021-2023-جىلدار ارالىعىندا «بوزوق» مۋزەي-قورىعى دالا ەتنوگرافياسى بويىنشا اۋقىمدى عىلىمي-زەرتتەۋ ەكسپەديتسيالارىن جۇرگىزىپ، ناتيجەسىندە «ەۋرازيا دالاسىنىڭ قىمىز مەرەكەسى: لەيتموتيۆ، جادى جانە سايكەستىك» اتتى عىلىمي جيناق جارىق كوردى. سونىمەن قاتار، «قىمىزمۇرىندىق» مەرەكەسى رەسمي تۇردە بەكىتىلدى.
ەسكە سالا كەتەيىك، بۇعان دەيىن استانادا ۇلتتىق ءداستۇردى دارىپتەيتىن ەرەكشە شارا - قىمىزمۇرىندىق فەستيۆالى ءوتتى.
