بورتتاعى جاپپاي توبەلەس سالدارىنان ۇشقىشتار ۇشاقتى شۇعىل تۇردە قوندىرۋعا ءماجبۇر بولدى

استانا. قازاقپارات - Ryanair اۆياكومپانياسىنىڭ اگاديردەن لوندونعا رەيسى مارراكەشكە شۇعىل قونۋعا ءماجبۇر بولدى.

جولاۋشىلار ورىندارعا تالاسىپ، ۇشاقتىڭ بورتىندا جاپپاي توبەلەس باستالىپ كەتكەن، - دەپ حابارلايدى «Independent».

كۋاگەرلەردىڭ ايتۋىنشا، جانجال ءتورت ساعاتتىق رەيستىڭ 36-مينۋتىندا باستالعان. وعان قوسا، جانجال بولمايتىن نارسە ءۇشىن باستالىپ كەتكەن: ەر ادام ءوز قىزىنىڭ قاسىندا وتىرعان ايەلگە ونىمەن ورىن اۋىستىرۋدى وتىنگەن. ول ايەلى مەن جاڭا تۋعان نارەستەسىنە جاقىن وتىرعىسى كەلگەن. الايدا ايەل جولاۋشى ونىڭ بۇل وتىنىشىنەن باس تارتقان، بۇل ەر ادامنىڭ اگرەسسيۆتى رەاكتسياسىن تۋدىردى. ءارى قاراي، ول ايەلدىڭ كۇيەۋى ونىڭ قورقىتۋعا قۇقىعى جوق ەكەنىن ايتقان.

«بۇل توزاقتان شىققان رەيس سياقتى بولدى. ولار ءبىر-ءبىرىن ۇرۋعا تىرىستى. وتباسىلاردىڭ ءبىرى ۇلكەن توپتىڭ ءبىر بولىگى بولدى، سوندىقتان باسقا جولاۋشىلار دا قوسىلا باستادى»، - دەدى وقيعا كۋاگەرلەرى.

باسقا جولاۋشىلار ايەلدى جاقتاي باستادى. سونىمەن، توعىز ادامنىڭ اراسىندا جولاۋشىلاردىڭ وزدەرى دە، ستيۋاردەسسالار دا توقتاتا المايتىن توبەلەس باستالدى. بورتتاعى جاعداي ۋشىعا ءتۇستى، سوندىقتان ۇشقىشتار ۇشاقتى مارراكەش اەرودرومىنا شۇعىل تۇردە قوندىرۋ جانە ءتارتىپ بۇزۋشىلاردى ءتۇسىرىپ تاستاۋ تۋرالى شەشىم قابىلدادى.

قونعان كەزدە توبەلەسكە قاتىسقان توعىز ادامدى جەرگىلىكتى پوليتسيا ۇستادى. سونىمەن قاتار، جانجالعا قاتىسى جوق جولاۋشىلاردىڭ بىرىنە مەديتسينالىق كومەك قاجەت بولدى. تەكسەرۋدەن كەيىن وعان ۇشۋعا قارسى كورسەتىلىم بار ەكەنى بەلگىلى بولدى، ءبىراق ەر ادام رەيستەن ءوز ەركىمەن كەتۋدەن باس تارتقان جانە ەكيپاجدى قورلاعان. سوندىقتان ونى دا پوليتسيا قىزمەتكەرلەرىنىڭ كومەگىمەن ۇشاقتان شىعارعان.

وقيعاعا بايلانىستى رەيس ءبىر تۇنگە كەشىكتىرىلدى، ال 200 جولاۋشى اۋەجايدا تۇنەدى. ولار كەلەسى كۇنى كەشكە عانا ۇشىپ كەتە الدى.