بوراندى كۇندە قار كەشكەن فەلدشەر: ارمانىم - ءبىلىمىمدى جەتىلدىرۋ، اتا-اناما قامقور بولۋ، باۋىرلارىمدى سۇيەپ، ادام قىلۋ
اقتوبە. KAZINFORM - جەدەل جاردەم بريگاداسىنىڭ اعا فەلدشەرى سايا رىسباي بۇگىندە مەديتسينا قىزمەتكەرىنىڭ ءبىر ساتتىك جۇمىسىن كورسەتىپ، كوپكە وي سالدى. اعا فەلدشەردىڭ ارمانى - ءبىلىمىن جەتىلدىرىپ، اتا-اناسىنا قامقور بولۋ، باۋىرلارىن سۇيەپ، ادام قىلۋ. سايا رىسباي KAZINFORM-عا سۇحبات بەردى.
- سايا، سىزبەن سويلەسكەندە مەديتسينا قىزمەتكەرى ەمەس، وزگە ماماندىق يەسى دەپ ويلاپ قالامىز. سىرى نەدە؟
- مەن دە جۋرناليست بولعىم كەلدى. سىنىپ جەتەكشىم قازاق ءتىلى مەن ادەبيەتى پانىنەن ساباق بەرىپ، ءتۇرلى جارىستارعا قاتىستىراتىن. بالا كۇنگى ارمانىم وسى. ءبىراق اتا-انامنىڭ، مەديتسينا سالاسىنداعى اعالارىمنىڭ باعىتتاۋىمەن وسى سالانى تاڭدادىم. «ءاپپاق، تاپ-تازا بولىپ جۇرەسىڭ» دەپ ايتقان ەدى ماعان. جانىما جاقىن ادامداردىڭ ءسوزىن جەرگە قالدىرماي، وسى سالانى قۇپ كوردىم. ماماندىعىم قازىر وزىمە قاتتى ۇنايدى.
- ءوزىڭىز تۋرالى ايتىپ بەرىڭىزشى... قاي جەردە، قاي مەكتەپتە ءبىلىم الدىڭىز؟
- مەن قىزىلوردا وبلىسى، جاڭاقورعان اۋدانى، بىرلىك اۋىلىندا تۋدىم. 2016 -جىلى الماتى قالاسىنداعى مەديتسينالىق كوللەدجگە وقۋعا ءتۇستىم. 2020 -جىلى اقتوبە قالاسىنا جۇمىس كەلدىم. مۇندا اكەمنىڭ تۋعان اپاسىنا ارقا سۇيەپ ءجۇرمىن. ولار شاقىرتىپ، ۇيىنە جاتقىزدى. الايدا كەيىن حرومتاۋدان، اقتوبەگە كوشىپ كەتىپ، قازىر ءىنىمىز ەكەۋمىز پاتەر جالداپ تۇرامىز. نەگىزى 2020 -جىلى قىركۇيەك ايىنان باستاپ، ياعني، كوروناۆيرۋس ءورشىپ تۇرعاندا ەڭبەككە ارالاسىپ كەتتىم. قازىر اعا فەلدشەر قىزمەتىندە جۇمىس ىستەيمىن. جۇمىس وتىلىمە 4 جىلداي ۋاقىت بولدى. كەلگەن كۇننەن باستاپ اقتوبەنىڭ سۋىعىن جاتىرقادىم. ءتىپتى اقشا جيناپ الىپ، الماتىعا قايتا ورالامىن دەپ ايتتىم. اتا-انامدى ويلادىم ءبىر جاعىنان. ولار مەنى وقىتتى، باعىپ-قاقتى. ەندى ءبىز اتا-انامىزعا قارايلاسۋىمىز كەرەك. اقشانى جيناپ، ءىنىمىز ەكەۋمىز ءۇي سالىپ بەردىك. ءبىز ءتورت اعايىندىمىز. ءۇيدىڭ ۇلكەنى ءوزىم. ءۇش قىز، ءبىر ۇلمىز. اتا-انامنىڭ جانىندا ەكى وقۋشى ءسىڭلىم بار. نەگىزى انام ينسۋلت الىپ، اكەم دە ۋايىمعا سالىنىپ، مۇگەدەكتىك راسىمدەلدى. ولاردى اقتوبەگە اكەلمەك ەدىم، ءبىراق تۋعان جەردەن جىراققا شىققىسى جوق. وڭتۇستىكتەن باتىسقا اۋىسقاندا قيىنداۋ بولعانى راس. حالقى، سويلەۋ مانەرى تىك، ءبىراق ادال دەپ ايتار ەدىم. شاقىرتۋ كەزىندە بارىنشا كوڭىلىنەن شىققىم كەلدى. اعا بۋىننان ۇلگى الدىم.
- كوللەدجدە وقىپ جۇرگەن كەزدە تاجىريبە جيناۋعا مۇمكىندىك بولدى ما؟
- ول كەزدە اۋرۋحانا، جەدەل جاردەم قىزمەتىندە تاجىريبە جينادىق. ءوزىم كوبىنە جەدەل جاردەم فەلدشەرلەرىنىڭ جانىندا جۇرگەندى ءجون سانادىم. سونىمەن بىرگە كورىپ، ۇيرەنۋ ءۇشىن بوس ۋاقىتىمنىڭ ءبارىن سوندا وتكىزدىم. اقتوبەگە كەلگەن سوڭ دا ءوز ءادىس-تاسىلدەرىن كورىپ، ۇيرەنىپ الدىم. ءالى دە ءبىزدىڭ بىلمەيتىنىمىز كوپ. اعا بۋىننان ۇيرەنىپ، كورگەنىمدى ويعا ءتۇيىپ ءجۇرمىن. ءبىزدىڭ ۇجىم وتە تاتۋ، ىسىنە جاۋاپكەرشىلىكپەن قارايدى. ءبىز حرومتاۋ اۋدانىندا ورنالاسقانىمىزبەن، جەدەل جاردەم قىزمەتى وبلىس ورتالىعىنان باسقارىلادى. ءبىز ۇنەمى بىلىكتىلىكتى ارتتىرىپ وتىرامىز. باسشىلارىمىز دا ءبىزدى وزگە اۋداندارعا ۇلگى ەتەدى.
- ءبىلىم الىپ، ءارى قاراي جوعارى مامان يەسى بولۋ تۋرالى ويلادىڭىز با؟
- ءيا، وقۋعا ءتۇسىپ، جوعارى بىلىكتى مامان بولۋ ارمانىمنىڭ ءبىرى. ءبىراق قازىر اتا-اناما كومەكتەسۋىم كەرەك. ەندى ول ارمانىم بالكىم ورىندالمايتىن شىعار. ءبىراق وعان بولا كوڭىلىمدى تۇسىرگىم كەلمەيدى. وسى قىزمەتتە ءجۇرىپ- اق كوپ ادامعا قولۇشىن بەرىپ، كومەكتەسە الامىن.
- بوس ۋاقىتىڭىزدى قالاي وتكىزەسىز؟
- مەن كىتاپ وقىعاندى جاقسى كورەمىن. جاتتىعۋ زالىنا دا بارامىن. نەگىزى بوس ۋاقىتتا دا قوسىمشا جۇمىس ىستەگەن دۇرىس. بۇعان دەيىن قۇرىلىس كومپانياسىندا مەدبيكە بولدىم. مىندەتىم - جۇمىسشىلاردىڭ اۋىسىمى الدىندا ىشىمدىك ءىشىپ-ىشپەگەنىن تەكسەرۋ. قازىر ول قۇرىلىس كومپانياسىنىڭ قىزمەتى اياقتالدى. ءوزىم تەك جەدەل جاردەم بريگاداسىندا ەڭبەك ەتەمىن. سونىمەن بىرگە بۇرىن ولەڭ شىعاراتىنمىن. ونى دا ۇمىتتىم دەسەم بولادى. قازىر مەديتسينا سالاسىنا قاتىستى كىتاپتى كوپ وقيمىن. اكە-شەشەمدى ۇياتقا قالدىرعىم كەلمەيدى. بيلەپ، ولەڭ ايتقاندى دا جاقسى كورەمىن.
- ارمانىڭىز...
- اتا-انامدى ەمدەتىپ، اياققا تۇرعىزعىم كەلەدى. ءۇيدىڭ ۇلكەنى بولعان سوڭ باۋىرلارىما كومەكتەسەمىن. انام ارنايى بالداققا سۇيەنە، ال اكەم ەكىنشى توپ مۇگەدەگى. ارينە قىز بالاعا قيىن شىعار، ءىنىم ەكەۋمىز ءبارىن كوتەرەمىز. وزىمنەن كەيىنگى قىز-جىگىتتەرگە قاراسام، باسپاناسى، كولىگى بار. مەن دە سونداي دارەجەگە جەتكىم كەلەدى.
- بوران كۇنى بەلۋاردان قار كەشىپ، ۆيدەودان كورگەنىمىزدەي كەي تۇستا ەڭبەكتەپ جۇرۋگە تۋرا كەلگەن ەكەن. مۇنداي جاعدايداي ءجيى كەزدەسە مە؟
- 2021 -جىلى قىستا ءدال وسىلاي بوران بولدى. ءبىراق ول كەزدە قىزۋ تالقىعا سالىنبادى. ادەتتەگى اۋا رايى دەپ بىلدىك. حرومتاۋلىقتاردىڭ ايتۋىنشا، بۇل جولى جەل ەكپىنى مىقتى بولدى. ادام 2-3 قادام اتتاسا ءبىرىن-ءبىرى كورمەي قالدى. اياز جوق، ءبىراق ۇيىتقىپ سوققان جەل الدىمىزدان ۇرىپ، كوزىمىز اشىلمادى. جولدى اشقانمەن، قايتا جاۋىپ قالىپ جاتتى. نەگىزى بوراندى كۇنى كۇشەيتىلگەن تارتىپتە قىزمەت كورسەتتىك. ءوزىم اۋىسىمنان شىقتىم، ءبىراق ۇيگە قايتايىن دەسەم دىم كورىنبەدى. ارىپتەستەرىمە كومەكتەسەيىن دەپ قالعان كەزىم ەدى. اۋىسىمعا جەتە الماعانىمىز، اۋىسىمنان شىقپاي قالعانىمىز، ياعني، ءبىر-بىرىمىزگە قولداۋ بىلدىردىك. ءارى حرومتاۋ سامارا- شىمكەنت تاسجولىنىڭ بويىندا ورنالاسقاندىقتان مۇندا جول-كولىك اپاتى كوپ، قىلمىس تا تىركەلەدى. وسىنى ەسكەرىپ، ءۇش ادام بولىپ جۇرۋگە رۇقسات بەرگەن بىزگە باسشىلارىمىز. جۇرەگى اۋىرىپ، جەدەل جاردەم شاقىرتقان تۇرعىنعا بارار جولدى ءتۇسىرىپ، ديسپەتچەرگە جىبەردىك. وسى ارقىلى ءبىز نەلىكتەن كەشىگىپ جاتقانىمىزدى كورسەتكىمىز كەلدى. كارتا تولتىرامىز شاقىرتۋعا بارعاندا. كەشىگۋدىڭ دە سۇراۋى بار، جازاعا تارتىلادى نەگىزسىز بولسا. سوگىس جاريالاماس ءۇشىن دە دالەل رەتىندە ءتۇسىردىم. قارعا اۋناپ، جىلارمان بولدىق. «جۇمىستان شىعامىن» دەپ تە ايتامىز وندايدا. ادامدار العىسى، ريزاشىلىعىنان سوڭ ءبارى ۇمىتىلادى.
- تىلەگىڭىز.. .
- ادامدار مەديتسينا قىزمەتكەرلەرىنىڭ جۇمىسىن تۇسىنسە دەيمىن. كەيدە جەڭىل دارەجەدەگى شاعىم بولادى. ولار ەمحاناعا بارۋدىڭ ورنىنا، جەدەل جاردەم شاقىرادى. سونداي كەزدە اسا قيىن جاعدايعا تاپ بولعان ادام كومەككە ءزارۋ شىعار دەپ ويلانعان ابزال. ءبىز جەتە الماساق، ۋاقىت جوعالتساق، كوڭىلىم تۇسەدى. ارىپتەستەرىم ادال قىزمەت جاسايدى دەپ ويلايمىن. ءبارى وسى سالانى سانالى تۇردە تاڭداپ، وقىدى عوي.
- ابىرويلى قىزمەت تىلەيمىن.
اۆتور
التىناي ساعىندىقوۆا
