بولات نازاربايەۆتىڭ ۇلدارى اكەسىنەن قالعان مۇلىكتى ءالى ءبولىسىپ جاتىر

بولات نازاربايەۆتىڭ ۇلدارىنىڭ ءبىرى حانبولات نازاربايەۆ استاناداعى قۇرىلىس نىسانىن باۋىرىنا سىيعا تارتتى. ول سوت شەشىمى بويىنشا بۇل عيماراتتى بۇزۋعا مىندەتتەلگەن، - دەپ حابارلايدى   Nege.Aqsha.

доллар
Коллаж: Kazinform

عيمارات تۋرالى نە بەلگىلى؟
ارنا مالىمەتىنە سۇيەنسەك، 2024 -جىلعى 20 - اقپاندا اكىمشىلىك قۇقىقبۇزۋشىلىق جونىندەگى مامانداندىرىلعان اۋدانارالىق سوت بولات نازاربايەۆتىڭ مايرا قۇرمانعاليەۆادان تۋعان ۇلىنا استاناداعى تاۋەلسىزدىك داڭعىلىنىڭ بويىنداعى ساۋدا ويىن- ساۋىق ورتالىعىن زاڭسىز سالعانى ءۇشىن 103500 تەڭگە ايىپپۇل سالدى.

ول بۇل ۋچاسكەنى 2020 - جىلى اقپاندا سىي رەتىندە العان. وسىلايشا، بۇرىن بۇل جەردە تۇرعان قوناقۇي كەشەنىن بۇزىپ، ونىڭ ورنىنا ساۋدا ويىن-ساۋىق ورتالىعىن قۇرىلىس رۇقساتىنسىز جانە الدىن الا ەسكەرتۋسىز سالا باستاعان.

«سوت ەكس- پرەزيدەنتتىڭ (نۇرسۇلتان نازاربايەۆتىڭ - ە س ك.) نەمەرە ءىنىسىن ايىپپۇل تولەتىپ قانا قويماي، زاڭسىز قۇرىلىستى بۇزۋعا مىندەتتەدى»، - دەپ جازىلعان اقپاراتتا.

حانبولات نازاربايەۆ بۇل شەشىمگە قارسى شىعۋعا تىرىسقان. ول ايىپپۇل تولەۋگە نيەت ءبىلدىرىپ، عيماراتتى بۇزباۋعا رۇقسات سۇراعان. الايدا قالالىق سوت باس تارتتى.

عيماراتتىڭ ەندىگى تاعدىرى
ارنا مالىمەتىنشە، حانبولات بۇل نىساندى اعاسى دانيار كەسىكبايەۆقا سىيعا تارتقان. ولاردىڭ اناسى ءبىر، اكەلەرى ءارتۇرلى.

«ماجبۇرلەپ بۇزۋ تۋرالى قاۋلى ق ر ادىلەت مينيسترلىگىنىڭ استانا قالاسى ادىلەت دەپارتامەنتىنە ورىنداۋعا جىبەرىلدى. دەپارتامەنت اقپاراتىنا سايكەس ح. بولات ۇلى بۇل نىساندى سىيعا تارتۋ شارتى بويىنشا د. كەسىكبايەۆقا بەرگەنى انىقتالدى. سوندىقتان باسقارما سىيعا تارتۋ شارتىن جارامسىز دەپ تانۋ تۋرالى تالاپ- ارىز جولدادى»، - دەدى استانا قالالىق ورتا ساپاسى جانە باقىلاۋ باسقارماسى باسشىسى عاني تاجيەۆ.

بولات نازاربايەۆ پەن بالالارى تۋرالى نە بەلگىلى؟
بولات نازاربايەۆ 1953- جىلى 23 - ناۋرىزدا الماتى وبلىسى قاراساي اۋدانى شامالعان اۋىلىندا ءابىش نازاربايەۆ پەن ءالجان نازاربايەۆانىڭ وتباسىندا دۇنيەگە كەلگەن. ول - قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ ەكىنشى ءىنىسى، ودان 13 جاس كىشى. بولات نازاربايەۆتىڭ نۇرسۇلتان نازاربايەۆتان بولەك تاعى ءبىر اعاسى ساتىبالدى 35 جاسىندا ومىردەن وزعان. سونداي- اق ءانيپا ەسىمدى اپكەسى بار.

بولات نازاربايەۆ 1960 - جىلى شامالعانداعى ورتا مەكتەپكە بارعان. 1970 -جىلى شامالعانداعى اۋىل شارۋاشىلىعى تەحنيكۋمىن "مەحانيك" ماماندىعى بويىنشا، كەيىن قاراعاندى قالاسىندا زاڭ ينستيتۋتىن "قۇقىقتانۋ، زاڭگەر" ماماندىقتارى بويىنشا ءتامامداعان.

ال 1988 -جىلى شامالعاندا اۋىل شارۋاشىلىعى باسقارماسىندا ديرەكتوردىڭ ورىنباسارى، 1988-1989 -جىلدارى قاسكەلەڭ قالاسىنداعى نان زاۋىتىندا ديرەكتوردىڭ ورىنباسارى بولىپ، 1989-1992 -جىلدارى مال تەرىسىن ساتۋ سالاسىندا قىزمەت ەتكەن، 1992-1997 - جىلدارى "ىڭكار ارگو" ج ش س ۆيتسە- پرەزيدەنتى، ال 1997- جىلدان باستاپ "BN Invest" حولدينگىنىڭ ديرەكتورى بولعان.

بولات نازاربايەۆ بىرنەشە رەت ناگرادتالعان. ماسەلەن، 2010 -جىلى «قاراساي اۋدانىنىڭ قۇرمەتتى ازاماتى»، 2012 -جىلى «الماتى وبلىسىنىڭ قۇرمەتتى ازاماتى» اتانسا، 2016 -جىلى «پاراسات» وردەنىن العان، سونىمەن قاتار 2015 -جىلى «قازاقستان رەسپۋبليكاسى كونستيتۋتسياسىنا 20 -جىل»، 2016 -جىلى «قازاقستان رەسپۋبليكاسى تاۋەلسىزدىگىنە 25 جىل» مەدالدارىمەن ناگرادتالعان.

2016 - جىلى بولات نازاربايەۆ «ساليقالى ۇرپاق» قوعامدىق قورىن قۇردى.

بالالارى تۋرالى
بولات نازاربايەۆتىڭ كوپشىلىككە جاقسى تانىس ۇلى - نۇربول نازاربايەۆ، ول 1983 - جىلى 14 - قاراشادا تۋعان.

جۋىردا ب ا ق- تا بولات نازاربايەۆتىڭ مۇراسىنا قاتىستى اقپارات تارادى. سول كەزدە ونىڭ مۇراگەرلەرىنىڭ ەسىمى دە بەلگىلى بولدى. اراسىندا حانبولات نازاربايەۆ تا بار.

بولات ۇلى بولاتحان: 2012 - جىل 7 - اقپان؛
نازاربايەۆ مۇحاممەد بولات ۇلى: 2021 -جىل 21 - قىركۇيەك؛
نازاربايەۆا ەركەجان بولات قىزى: 2018 - جىل 18 - مامىر؛
نازاربايەۆ ەلنۇر بولات ۇلى: 2013 - جىل 19 - تامىز؛
نازاربايەۆ بولات بولات ۇلى: 2014 - جىل 17- قازان؛
نازاربايەۆ اكبار بولات ۇلى: 2016 -جىل 23 - قاراشا؛ 
نازاربايەۆا نۇربانۋ بولات قىزى: 2018 -جىل 9 - شىلدە؛
بولات قىزى توميريس: 2013 -جىل 30 - شىلدە؛ 
بولات قىزى ارۋناز: 2016 -جىل 30 - قاڭتار؛
نازاربايەۆ حانبولات بولات ۇلى: 2002 -جىل 17 - اقپان؛
نازاربايەۆا البينا بولات قىزى: 2003 -جىل 7 - ماۋسىم؛ 
نازاربايەۆ حانتورە بولات ۇلى: 2018 -جىل 26 - قاڭتار؛ 
نازاربايەۆا جانەل بولات قىزى: 2010 -جىل 3 - قاراشا.

Massaget.kz

سوڭعى جاڭالىقتار