بولگاريا كومپانيالارىنا قولايلى جاعداي جاساۋعا دايىنبىز- قاسىم-جومارت توقايەۆ
استانا. KAZINFORM - قازاقستان-بولگاريا بيزنەس فورۋمىنا ەكى ەلدىڭ مەملەكەت باسشىلارى قاتىسادى. بۇل تۋرالى اقوردادا بولگاريا پرەزيدەنتى رۋمەن راديەۆپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
- ەلىمىزگە رۋمەن راديەۆپەن بىرگە بولگاريانىڭ ءىرى كاسىپكەرلەرى كەلدى. بۇگىن بيزنەس فورۋم وتەدى. ءبىرقاتار كوممەرتسيالىق قۇجاتقا قول قويىلادى. بيزنەس فورۋمعا ءبىز - ەكى ەل باسشىلارى دا قاتىساتىن بولدىق. بۇل ەكىجاقتى ىنتىماقتاستىققا ايرىقشا ءمان بەرىلەتىندىگىن اڭعارتادى. ءبىز ەلىمىزدە جۇمىس ىستەگىسى كەلەتىن بولگاريا كومپانيالارىنا قولايلى جاعداي جاساۋعا دايىنبىز. مەن ىسكەر توپتاردىڭ ىقپالداستىعىن نىعايتۋ ءۇشىن قازاقستان-بولگاريا ىسكەرلىك كەڭەسىن قۇرۋدى ۇسىندىم، - دەدى پرەزيدەنت.
سونداي-اق مەملەكەت باسشىسىز مادەني-گۋمانيتارلىق، ءبىلىم بەرۋ جانە ءوڭىرارالىق بايلانىس سالاسىنداعى ىنتىماقتاستىقتى دامىتۋعا دپا ۋاعدالاسقاندىقتارىن اتاپ ءوتتى.
- 2018 -جىلى سوفيا قالاسىندا استانا كوشەسى پايدا بولدى. ەندى ءبىز جاقىن ارادا ەلوردامىزدا سوفيا اتتى كوشەنى اشاتىن بولدىق.
جالپى، كەلىسسوزدەر تابىستى ءوتتى دەۋگە تولىق نەگىز بار. بۇگىن ءبىرقاتار ماڭىزدى قۇجاقا قول قويىلدى. جاسالعان كەلىسىمدەر ناتيجەسىندە ەكى ەلدىڭ ىنتىماقتاستىعى جاڭا دەڭگەيگە كوتەرىلمەك، - دەدى قاسىم-جومارت توقايەۆ.
بۇعان دەيىن مەملەكەت باسشىسى قاسىم-جومارت توقايەۆ اقوردادا ەلىمىزگە رەسمي ساپارمەن كەلگەن بولگاريا پرەزيدەنتى رۋمەن راديەۆتى قارسى العانىن جازعان ەدىك.
