بوكسشىلارىمىزدىڭ جولداماعا دەگەن ىقىلاسى ەرەكشە - مىرزاعالي ايتجانوۆ
استانا. KAZINFORM - بوكستان يتاليانىڭ بۋستو-ارسيتسيو قالاسىندا ءوتىپ جاتقان ليتسەنزيالىق تۋرنيرگە شاكىرتتەرىن باستاپ بارعان ۇلتتىق قۇرامانىڭ باس باپكەرى مىرزاعالي ايتجانوۆ جارىستىڭ قالاي ءوتىپ جاتقانى تۋرالى ايتىپ بەردى.
«جارىس وتە جوعارى دەڭگەيدە ۇيىمداستىرىلىپ جاتىر. بوكسشىلارىمىزدىڭ جولداماعا دەگەن ىقىلاسى دا ەرەكشە. قازىر وزدەرىڭىز كورىپ، ءبىلىپ جاتقانداي العاشقى ىرىكتەۋ سىندارىندا جۇدىرىقتاسقان بوكسشىلارىمىز جارىستى وتە ءساتتى باستادى. قالعان بوكسشىلارىمىز دا جارىستى وسىلاي باستاپ، جولداماعا قولى جەتكەنشە ايانباي جۇدىرىقتاسۋى كەرەك»، - دەدى باس باپكەر.
تورەشىلەر جاعىنان بۇرا تارتۋ بولىپ جاتقان جوق پا دەگەن سۇراعىمىزعا: «ونداي بارماق باستى، كوز قىستى ارەكەتتەردى ءالى كەزدەستىرگەن جوقپىز. جارىس قازىرگە تازا، ءادىل ءوتىپ جاتىر دەپ سەنىممەن ايتا الامىن. ونداي بۇرا تارتۋ بولماي-اق قويسىن دەپ تىلەيىك. كىم مىقتى، سول وليمپيادا جولداماسىن جەڭىپ الۋعا تىلەكتەسپىز»، - دەدى باس باپكەر.
سونىمەن قاتار ايتجانوۆ بوكسشىلارعا ارنالعان قوناق ءۇي دە وتە جايلى ەكەنىن اتاپ ءوتتى.
«جاتقان قوناق ءۇيىمىز دە وتە تازا، ىڭعايلى بولدى. جارىس وتەتىن سپورت سارايىنا 20-25 مينۋدتا جەتەمىز. وزدەرى الىپ بارىپ، الىپ كەلەدى. جاتتىعاتىن جەرىمىزدە دە بارلىق جاعداي جاسالعان»، - دەدى ايتجانوۆ.
ەستەرىڭىزگە سالا كەتەيىك، ليتسەنزيالىق تۋرنيردە 2024-جىلعى پاريج وليمپياداسىنىڭ جولدامالارى ساراپقا سالىنىپ جاتىر. بىلعارى قولعاپ شەبەرلەرى ەرلەر اراسىندا 28، ايەلدەر اراسىندا 21 جولدامانى ساراپقا سالادى.
تۋرنير 3- ناۋرىزدا باستالىپ، 12- ناۋرىزدا مارەسىنە جەتەدى.
اۆتوركۇنسۇلتان وتارباي
