بوكسشى مۇحتارحان دىلدابەكوۆ بەكبولات تىلەۋحانوۆتىڭ ۇسىنىسىنان باس تارتقانىن ايتتى
قازاقستاننىڭ ەڭبەك سىڭىرگەن سپورت شەبەرى، وليمپيادا جۇلدەگەرى، بوكسشى مۇحتارحان دىلدابەكوۆ رەسپۋبليكالىق «كوكپار» فەدەراتسياسىنىڭ باسشىلىعىنا قالاي تاعايىندالعانى تۋرالى «العاشقى» باعدارلاماسىنا بەرگەن سۇحباتىندا ايتتى.

2018-جىلى سپورتشى «كوكپار» فەدەراتسياسىنىڭ پرەزيدەنتى بولىپ تاعايىندالدى.
«ول كەزدە فەدەراتسيانى ۇلتتىق سپورت قاۋىمداستىعىن بەكبولات تىلەۋحانوۆ اعامىز باسقاراتىن. سول جىلدارى «اقىن سپورتتى قالاي باسقارادى؟» دەگەن كوپ داۋ شىعىپ كەتتى. سونىڭ ىشىندە بىرەۋلەر مەنىڭ دە باسقارۋىمدى ۇسىنىپ، جازعان بولۋ كەرەك. شىمكەنتتە جۇرگەندە بەكبولات اعامىز حابارلاستى. «كوكپار فەدەراتسيانىڭ پرەزيدەنتى بولعىڭ كەلىپ جاتىر ما؟» دەپ سۇرادى. «اعاسى، بولعىم كەلسە، بىردەن سىزگە بارىپ ايتامىن عوي. «بول» دەسەڭىز دە بولمايمىن، مۇنىڭ ماعان قاتىسى جوق. سپورتتىق كوكپاردى مەن تۇسىنبەيمىن» دەدىم. ءبىراق ول «سەنى فەدەراتسيانىڭ پرەزيدەنتى سايلايمىز» دەدى. كەلىسپەيتىنىمدى ايتتىم. كوپ ۇزاماي كوكپاردىڭ حالىقارالىق فەدەراتسياسىنىڭ پرەزيدەنتى قايرات ساتىبالدى ۇلى شاقىرىپ، «ساعان سەنىم ارتىپ وتىرمىز، سەنى وسى ورىنعا قويامىز» دەدى.
شىمكەنتتە تۇراتىنىمدى ايتقانىمدا، ءبارىن رەتتەيتىنىنە ۋادە بەردى. كەلىسىمىمدى بەردىم. كەيىن كەڭسەگە بارىپ، قۇجاتتارىمدى سۇرادىم. ءبىراق ولار «وسى جەردە تۇرا بەرسىن، سەن بارىپ-كەلىپ جۇمىس ىستەسەڭ بولادى» دەدى. ءسويتىپ، قولىما قۇجاتتاردى بەرمەدى. سول كەزدە مەن كۇمانداندىم»، - دەدى ول.
سپورتشىنىڭ ايتۋىنشا، بۇل ءىستىڭ استارىندا باسقا سەبەپ بولۋى مۇمكىن.
«حالىقتى باسۋ ءۇشىن وسىنداي ىسكە باردى ما دەپ ويلايمىن. سەبەبى، ول جەردە ۇلكەن داۋ بولىپ كەتتى عوي. سول ءۇشىن 6 فەدەراتسيانى ءبولىپ، ءارقايسىسىنا سپورتشىلاردى پرەزيدەنت ەتىپ تاعايىندادى. ال اسسوتسياتسيا پرەزيدەنتى بولىپ بەكبولات تىلەۋحان تاعايىندالدى. ويلانا كەلە «مۇنىڭ ارتىندا كوپ سۇرانىس بار» دەپ ويلاپ، ابىرويىمنان ايىرىلماۋدى قالادىم. ءسويتىپ، باس تارتتىم»، - دەدى مۇحتارحان دىلدابەكوۆ.