بوچچا ەرەكشە سپورتشىلارى ازيا ويىندارىنا اتتاندى

бочча
Фото: Фото: Сенат

 بوچچادان قازاقستان قۇراماسى قىتايدىڭ حاڭجوۋ قالاسىندا وتەتىن ازيا پارا ويىندارىنا تاريحتا العاش رەت قاتىسىپ جاتىر. ايتا كەتەيىك، جارىس ءداستۇرلى تۇردە نورماتيۆتىك سپورتشىلار قاتىساتىن ازيا ويىندارىمەن ءبىر جەردە وتەدى، دەپ حابارلايدى Kazinform. 

پاراسپورتشىلاردى ەلوردا اۋەجايىنان شىعارىپ سالۋعا تۋعان-تۋىستارى مەن دوستارى، ب ا ق وكىلدەرى، سونداي-اق وسى سپورت ءتۇرىنىڭ جانكۇيەرلەرى كەلدى.

ولار قازاقستاننىڭ نامىسىن قورعاپ، وزگە ەلدىڭ تاجىريبەلى ويىنشىلارىمەن باسەكەگە تۇسەتىن كوماندا مۇشەلەرىن جىلى لەبىزبەن شىعارىپ سالدى.

ەستەرىڭىزگە سالا كەتەيىك، بوچچا - دوپپەن وينايتىن، تىرەك-قيمىل اپپاراتى بۇزىلعان بالالار مەن ەرەسەكتەرگە سپورتتا ءوزىن-ءوزى تانىتۋعا مۇمكىندىك بەرەتىن پاراليمپيادالىق سپورت تۇرلەرىنىڭ ءبىرى.

بۇل سپورت تۇرىنەن ويىنشىلاردى 2021 -جىلى مۇمكىندىگى شەكتەۋلى بالالاردى تاربيەلەپ وتىرعان اتا-انالار مەن «تەڭ مۇمكىندىكتەر الەمى» قورى جاتتىقتىرۋشىلارىنىڭ باستاماسىمەن قۇرىلعان قازاقستاننىڭ بوچچا فەدەراتسياسى دايىندايدى.

فەدەراتسيانىڭ قازاقستان اۋماعىندا 10 فيليالى بار.

فەدەراتسيانىڭ مۇمكىندىكتەرىن كەڭەيتۋدە ونىڭ پرەزيدەنتى، سەنات ءتوراعاسى ماۋلەن اشىمبايەۆ ماڭىزدى ءرول اتقارادى.

بيىل قازاقستان بوچچا فەدەراتسياسى رەسمي تۇردە حالىقارالىق بوچچا فەدەراتسياسىنا (BISFed) مۇشە بولدى.

بۇل - ۇلكەن جەتىستىك، ويتكەنى فەدەراتسياعا مۇشە بولۋ سپورتشىلارعا جاڭا مۇمكىندىكتەر اشادى.

وسىنىڭ ارقاسىندا وتاندىق فەدەراتسيا وكىلدەرى بوچچادان حالىقارالىق جارىستارعا: چەللەندجەرلەرگە، الەم چەمپيوناتتارىنا، پاراليمپياداعا جانە ازيا پارا ويىندارىنا قاتىسا الادى.

ماۋسىم ايىندا ەلىمىزدە اۋقىمدى جارىس - قازاقستان رەسپۋبليكاسىنىڭ چەمپيوناتى ءوتتى.

ونىڭ قورىتىندىسى بويىنشا قىتايعا باراتىن كوماندانىڭ قۇرامى انىقتالدى.

سوڭعى جاڭالىقتار