بريتاندىق ءانشى سامسۋنگ كومپانياسىن سوتقا بەردى

ءانشىنىڭ ايتۋىنشا، كومپانيا ونىڭ فوتوسۋرەتىن تەلەۆيزورلار مەن ت ۆ-پريستاۆكالاردىڭ قاپتاماسىندا رۇقساتسىز پايدالانعان.

قازىرگى ۋاقىتتا دۋا ليپا Puma ،Versace جانە Yves Saint Laurent سياقتى بىرنەشە ءىرى برەندتەرمەن جۇمىس ىستەيدى. بۇعان دەيىن ول Apple ،Porsche ،Chanel كومپانيالارىنىڭ جارناماسىنا تۇسكەن جانە جاقىندا Nespresso-نىڭ جاھاندىق امباسسادورى اتانعان.

شاعىم كاليفورنيانىڭ ورتالىق وكرۋگى بويىنشا اقش وكرۋگتىك سوتىنا بەرىلدى. قۇجاتتا Samsung تۇتىنۋشىلاردىڭ نازارىن اۋدارۋ جانە ساتىلىمداردى ارتتىرۋ ءۇشىن ءانشىنىڭ بەينەسىن بىرنەشە قۇرىلعىلارىنا ورنالاستىرعانى ايتىلادى.

دۋا ليپانىڭ وكىلدەرى كومپانيا جۇلدىزدىڭ تانىمالدىعىن كوممەرتسيالىق ماقساتتا پايدالاندى دەپ سانايدى. ارىزدا قۇرىلعىلاردىڭ قاپتاماسى ءانشىنىڭ بەينەسىمەن بايلانىستى بولاتىنداي ەتىپ جاسالعانى جانە ونىڭ تانىمالدىعىنان پايدا تابۋ ماقساتىندا قولدانىلعانى كورسەتىلگەن.

سونىمەن قاتار، ءانشىنىڭ تاراپىنان Samsung اۆتورلىق قۇقىقتى بۇزدى، تاۋار بەلگىسىن زاڭسىز قولداندى جانە ونىڭ بەينەسىن ءوز پايداسىنا پايدالاندى دەپ ايىپتالىپ وتىر. فوتوسۋرەت 2024 -جىلى Austin City Limits Music Festival مۋزىكالىق فەستيۆالى كەزىندە تۇسىرىلگەن. ليپا سۋرەتكە قۇقىق يەلەنەتىنىن ايتادى.

سوت قۇجاتتارىنا سايكەس، ءانشى ءوز بەينەسىنىڭ Samsung ونىمدەرىندە پايدا بولعانىن تەك 2025 -جىلدىڭ جاز ايىندا بىلگەن. قوعامدىق جەلىلەر قولدانۋشىلارى كومپانيانىڭ ونىمدەرىن بەلسەندى تالقىلاپ، ولاردى «دۋا ليپانىڭ تۆ- پريستاۆكاسى» دەپ اتاپ كەتكەن.

ارىزدا Instagram پايدالانۋشىلارىنىڭ پىكىرلەرى دە كەلتىرىلگەن. بىرەۋ تەك ءانشىنىڭ سۋرەتى سالىنعانى ءۇشىن تەليەۆيزور ساتىپ الۋعا دايىن ەكەنىن جازسا، ەكىنشىسى «ساتىلىمدى جاقسارتۋ ءۇشىن تەك دۋا ليپانىڭ فوتوسۋرەتىن ورنالاستىرۋ جەتكىلىكتى» دەپ پىكىر بىلدىرگەن.

ءانشىنىڭ ادۆوكاتتارى Samsung بىرنەشە رەت فوتوسۋرەتتى پايدالانۋدى توقتاتۋ تالابىن ەلەمەدى دەپ مالىمدەدى.