بۇرىنعى مادەنيەت جانە سپورت ۆيتسە-ءمينيسترى قانداي كۇدىككە ءىلىندى

 استانا. KAZINFORM - بۇرىنعى مادەنيەت جانە سپورت ۆيتسە-ءمينيسترى 2 اي قاماۋدا وتىرادى.

بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى ارمان تىلەۋكەنوۆ ءمالىم ەتتى.

«بيىل 1-ناۋرىزدا سىبايلاس جەمقورلىققا قارسى قىزمەت جاسىرىن ءىس-شارالاردىڭ ناتيجەلەرى بويىنشا مادەنيەت جانە سپورت ەكس-ۆيتسە-ءمينيسترى اۋىر جەمقورلىق قىلمىس جاسادى دەگەن كۇدىك بويىنشا ۇستادى. كوممەرتسيالىق ۇيىمنىڭ مۇددەسى ءۇشىن ارەكەت ەتە وتىرىپ، ول 2018-جىلى پەتروپاۆل قالاسىندا قازاقستان رەسپۋبليكاسى مەن رەسەي فەدەراتسياسىنىڭ XV ءوڭىرارالىق ىنتىماقتاستىق فورۋمىنىڭ كورمەسىن ۇيىمداستىرۋ بويىنشا شارت جاساسۋدى قولداعان»، - دەدى ارمان تىلەۋكەنوۆ اگەنتتىككە وتكەن باسپا ءسوز ءماسليحاتىندا.

ونىڭ ايتۋىنشا، تەرگەۋ امالدارى جالعاسىپ جاتىر.

«بۇل رەتتە فورۋمدى وتكىزۋ ءۇشىن سمەتا 2 ەسە ءوستى، بۇل بيۋدجەت قاراجاتىنىڭ نەگىزسىز جۇمسالۋىنا اكەلىپ سوقتى. قىلمىستىق جولمەن الىنعان اقشالاي قاراجاتقا ساتىپ الىنعان مۇلىك انىقتالدى جانە وعان تىيىم سالىندى. كۇدىكتىگە قاتىستى سوتتىڭ سانكتسياسىمەن 2 اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسى قولدانىلدى»، - دەيدى ول.

ايتا كەتەيىك، 1-ناۋرىزدا بۇرىنعى مادەنيەت جانە سپورت ۆيتسە-ءمينيسترى ۇستالعانى تۋرالى حابارلاعان ەدىك.