بۋرىلتوعاي اۋدانىنىڭ وكىلدەرى كەرقۇلاندارعا جەم-ءشوپ جەتكىزدى - شەتەلدەگى قازاق باسپا ءسوزى
استانا. KAZINFORM - Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
كوشپەندى ويىندارى ءۇشىن كەرى ساناق باستالدى - TRT
قازاقستان بيىل قىركۇيەكتە وتەتىن بەسىنشى دۇنيەجۇزىلىك كوشپەندى ويىندارىنا دايىندالۋدا. دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعان قازاقستانعا رەسمي ساپارمەن كەلدى. ساپار بارىسىندا ق ر تۋريزم جانە سپورت مينيسترلىگى مەن كونفەدەراتسيا اراسىندا كەلىسىمگە قول قويىلدى.
بۇل تۋرالى تۇركيا راديو تەليەۆيزيا پورتالى حابارلادى.
اتالعان ب ا ق-تىڭ مالىمەتىنشە، دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى ءبىلال ەردوعاننىڭ رەسمي ساپارى بارىسىندا 5- دۇنيەجۇزىلىك كوشپەندىلەر ويىندارى ءۇشىن كەرى ساناق باستالدى.
كەرى ساناق كەستەسىن ق ر پارلامەنت سپيكەرى ەرلان قوشانوۆ اشتى.
رەسمي ءراسىمنىڭ اشىلۋىندا ءسوز سويلەگەن ءبىلال ەردوعان كوشپەلىلەردىڭ مادەني جانە سپورتتىق مۇراسىن جانداندىرۋ مەن ساقتاۋدىڭ ماڭىزدىلىعىنا توقتالعان.
سونىمەن قاتار ول V دۇنيەجۇزىلىك كوشپەندىلەر ويىندارىنىڭ العاشقى بيلەتىن دە ساتىپ الدى.
ايتا كەتەيىك، قازاقستاندا وتەتىن ويىندا 20 سپورت تۇرىنەن 4000 عا جۋىق قاتىسۋشى باق سىنايدى. ويىندار 8-قىركۇيەكتە استانادا باستالىپ، ءبىر اپتاعا سوزىلادى.
الەۋمەتتىك جەلىدە تانىمال بولعان تاسجول قايتا اشىلدى - «حالىق گازەتى»
شىڭجاڭداعى قىستا جۇرۋگە شەكتەۋ قويىلاتىن «جەلىدە تانىمال بولعان تاسجول» پانلۋن ەجەلگى جولى كوكتەم كەلىپ قايتا اشىلدى، دەپ حابارلايدى قىتايدىڭ «حالىق گازەتى».
قىتايلىق باسىلىمنىڭ كەلتىرگەن مالىمەتىنشە، 21-ناۋرىزدا شىڭجاڭداعى قىستا قار مەن كوكتايعاق سالدارىنان كولىك قوزعالىسى ءۇشىن جابىلعان پانلۋن ەجەلگى جولى قايتا اشىلىپ، كولىكتەر وسى «جەلىدە تانىمال بولعان تاسجولمەن» جۇرە باستاعان.
ايتا كەتەيىك، پانلون ەجەلگى جولى شىڭجاڭنىڭ تاشقورعان تاجىك اۆتونوميالىق اۋدانىندا ورنالاسقان. 30 شاقىرىمدىق تاۋلى جولدا 600 دەن استام S- ءتارىزدى جانە U- ءتارىزدى تۇمسىقتار بار. بۇل اش ىشەكشە شۇباتىلعان جول تەڭىز دەڭگەيىنەن 3000 مەتر بيىكتىكتەن 4100 مەترگە دەيىن جوعارىلايدى. جالپى ارالىعى 1100 مەتر.
سونداي-اق وسى اپتادا «حالىق» گازەتىندە «ۇرىمجىدە قازاقستاننىڭ ساۋدا وكىلدىگى اشىلادى» دەگەن تاقىرىپتاعى اقپارات جاريالاندى. قىتايلىق باسىلىم بۇل اقپاراتتى «Baq.kz»-كە سىلتەمە جاساپ حابارلاپتى.
كەلتىرىلگەن دەرەكتەرگە سۇيەنسەك، ق ر ساۋدا جانە ينتەگراتسيا ءمينيسترى ارمان شاققاليەۆ ق ك پ و ك ساياسي بيۋروسىنىڭ مۇشەسى، ق ح ر شىڭجاڭ ۇيعىر اۆتونوميالىق رەگيونى پارتكومىنىڭ حاتشىسى ما شيڭرۋيمەن جانە شۇ ا ا باسشىسى ەركين تۋنيازبەن كەزدەسۋدە ءۇرىمجى قالاسىندا قازاقستان- قىتاي ساۋدا ىنتىماقتاستىعىن نىعايتۋ جانە ساۋدا وكىلدىگىن اشۋ ماسەلەلەرىن تالقىلاعان.
قازاقستاننىڭ ساۋدا جانە ينتەگراتسيا ءمينيسترىنىڭ ايتۋىنشا، ەكى ەل اراسىنداعى ساۋدا كولەمىن كەڭەيتۋ بارىسىندا، اتاپ ايتقاندا شىڭجاڭمەن ساۋدانى ۇلعايتۋ ءۇشىن ق ر مەملەكەت باسشىسى ۇرىمجىدە ساۋدا وكىلدىگىن اشۋدى تاپسىرعان. مينيسترلىككە ۆەدومستۆولىق باعىنىستى QazTrade ۇيىمى وسى وكىلدىكتىڭ قىزمەتىمەن اينالىساتىن بولادى. بولاشاقتا ول ءبىزدىڭ وندىرۋشىلەر مەن ءونىمدى ساتىپ الۋعا مۇددەلى شىڭجاڭ كومپانيالارى اراسىنداعى جولسەرىككە اينالادى.
يراندىق باسىلىم ناۋرىز مەيرامىنا ارناپ كۇيشاشۋ ۇسىندى - Parstoday
وسى اپتادا يراننىڭ «Parstoday» اقپارات اگەنتتىگى ناۋرىز مەيرامىنا وراي «ناۋرىز مەيرامىنا ارنالعان كۇيشاشۋ» دەگەن تاقىرىپتا قۇرمانعازىنىڭ «اداي» كۇيىمەن مەرەكەلىك شاشۋ جولداعان ەكەن. سونىمەن قاتار ناۋرىز مەيرامىنىڭ شىعۋ تاريحىنا دا توقتالعان.
يراندىق ب ا ق- تىڭ كەلتىرگەن دەرەگىنە سۇيەنسەك، ناۋرىز مەيرامى - استرونوميالىق كۇن كۇنتىزبەسىن قولداناتىن پارسى جانە تۇركىتىلدەس حالىقتار ءۇشىن كوكتەم مەزگىلىنىڭ كەلۋى جانە جاڭا جىلدىڭ باستالۋى.
سونداي-اق «ناۋرىز» ءسوزى پارسى تىلىندە «جاڭا كۇن» دەگەن ماعىنانى بىلدىرەتىنىن دە تىلگە تيەك ەتكەن.
«ناۋرىز قۇت- بەرەكە، دوستىق، باقىت پەن ماحابباتتى بەينەلەيدى. شىعىس حالىقتارى ءۇشىن ناۋرىز - جاڭا جىل مەرەكەسى، جاڭا ءومىردىڭ حابارشىسى بولىپ سانالادى. «ناۋرىز» پارسى تىلىندە «جاڭا كۇن» دەگەن ماعىنانى بىلدىرەدى»، دەپ جازادى «Parstoday».
ايتا كەتۋ كەرەك، ناۋرىز - قازاقستاندا ون كۇن بويى تويلاناتىن ۇلتتىق مەيرام عانا ەمەس، سونىمەن قاتار ب ۇ ۇ «حالىقارالىق كۇن» دەپ جاريالاعان مەيرام. ناۋرىز مەيرامى 300 ميلليوننان اسا تۇرعىنى بار ورتالىق ازيا، بالقان، باتىس ازيا، كاۆكاز، قارا تەڭىز جاعالاۋى جانە باسقا دا ايماقتار، سونىڭ ىشىندە ءۇندىستان مەن قىتايدا دا تويلانادى. 2009 -جىلى ناۋرىز يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ وكىلدىك تىزىمىنە ەنگىزىلدى.
بۋرىلتوعاي اۋدانى كەرقۇلاندارعا جەم-ءشوپ جەتكىزدى - «التاي اقپارات ورتالىعى»
ءدال قازىر كەرقۇلانداردىڭ (پرجيەۆالسكيي جىلقىلارى - اۆت. ) كوبەيۋ كەزەڭى. ناۋرىزدىڭ 20-كۇنى بۋرىلتوعاي اۋداندىق ورمان شارۋاشىلىعى جانە جايىلىم مەكەمەسىنىڭ ءۇشبۇلاق كەرقۇلانداردى قورعاۋ پۋنكتىنىڭ قىزمەتكەرلەرى جوڭعار ويپاتىنىڭ شىعىس جيەگىندەگى قارامايلى جاراتىلىستىق قورىعىنا بارىپ، جابايى جىلقىلار جايىلاتىن جەرگە جەم- ءشوپ شاشتى. سونىمەن بىرگە بۋاز كەرقۇلاندارعا ىلەسە ءجۇرىپ قورعاپ، باقىلاۋ جۇمىسىن باستادى، دەپ حابارلايدى «التاي اقپارات ورتالىعى».
قىتايلىق ب ا ق-تىڭ كەلتىرگەن دەرەكتەرىنە سۇيەنسەك، كەرقۇلان (پرجيەۆالسكي جىلقىسى) دۇنيە جۇزىندە ساقتالعان جالعىز جابايى جىلقى ءتۇرى. ونىڭ ەۆوليۋتسيالىق تاريحى 60 ميلليون جىل. قازىرگى ۋاقىتتا الەمدە نەبارى 2000 نان استام عانا كەرقۇلان قالعان. ول ءبىرىنشى دەڭگەيدەگى ۇلتتىق قورعاۋعا الىنعان جانۋار. 2024 -جىلى بۋرىلتوعاي اۋدانىنا قاراستى وڭىردەن 4 ۇيىردەگى 25 كەرقۇلان بايقالعان.
قازىر سولاردىڭ ىشىندە توعىز جابايى جىلقى بۋاز، تولدەۋ مەرزىمى مامىردىڭ شاماسىندا بولۋى مۇمكىن.
اۋداندىق ورمان شارۋاشىلىعى جانە جايىلىم مەكەمەسىنىڭ ورمان شارۋاشىلىعى ينجەنەرى جارىسبەك تايكەننىڭ ايتۋىنشا، كەرقۇلانداردى قورعاۋ مەن باقىلاۋدى كۇشەيتۋ جالعاسۋدا. بيىل 20 قوسىمشا ازىقتاندىرۋ پۋنكتى قۇرىلىپ جانە تۇراقتى تاراتۋ ءۇشىن 100 توننا جەم دايىندالعان.
وزبەكستاندا تۋىسقان ءتىلدى مەكتەپتەر وزبەك كوركەم ادەبيەتىمەن قامتاماسىز ەتىلەدى - «ءوز ا»
مينيسترلەر كابينەتىنىڭ «تۋىستاس تىلدەردە وقىتاتىن جالپى ورتا ءبىلىم بەرەتىن مەكتەپتەردى كوركەم ادەبيەتپەن قامتاماسىز ەتۋ جونىندەگى شارالار تۋرالى» شەشىمىنىڭ جوباسى جاريالاندى، دەپ حابارلايدى «ءوز ا» اقپاراتتىق اگەنتتىگى.
وعان سايكەس، وزبەك تىلىندەگى كوركەم ادەبيەتتەر تۋىستاس تىلدەرگە اۋدارىلادى جانە كىتاپتار تۋىسقان ءتىلدى مەكتەپتەرگە تاراتىلماق.
«مەملەكەتتىك ساتىپ الۋلار تۋرالى» زاڭ تالاپتارىن ساقتاي وتىرىپ، وزبەك كوركەم ادەبيەتىن تۋىستاس تىلدەرگە اۋدارۋدا جانە كىتاپتاردى باسىپ شىعارۋدا اشىقتىق، ايقىندىق جانە باسەكەلەستىك قاعيداتتارى نەگىزىندە اۋدارماشىلار مەن باسپالاردى ىرىكتەۋ شارالارىن قابىلدايدى. سونىمەن قاتار، جاريالانعان كوركەم ادەبيەتتىڭ بەلگىلەنگەن تارتىپتە مەكتەپكە دەيىنگى جانە مەكتەپ ءبىلىم بەرۋ مينيسترلىگىنە جەتكىزىلۋىن قامتاماسىز ەتەدى. جاريالانعان كوركەم ادەبيەتتىڭ بەلگىلەنگەن تارتىپتە مەكتەپكە دەيىنگى جانە مەكتەپ ءبىلىم بەرۋ مينيسترلىگىنە جەتكىزىلۋىن قامتاماسىز ەتەدى»، - دەپ مالىمدەگەن اقپارات جانە بۇقارالىق كوممۋنيكاتسيالار اگەنتتىگى.
سونداي-اق، وسى اپتادا «ءوز ا»-دا «وزبەكستاننىڭ سىرتقى ساۋدا اينالىمى 10 ميلليارد دوللارعا جۋىقتادى» دەگەن تاقىرىپتاعى اقپارات جارىق كوردى.
2024 -جىلدىڭ قاڭتار- اقپان ايلارىندا وزبەكستان رەسپۋبليكاسىنىڭ سىرتقى ساۋدا اينالىمى 9,9 ميلليارد ا ق ش دوللارىنان استى. وزبەكستاننىڭ ستاتيستيكا اگەنتتىگىنىڭ مالىمەتىنشە، وزبەكستان 2 ايدا 151 ەلمەن ساۋدا بايلانىسىن ورناتقان.
سىرتقى ساۋدا اينالىمىنىڭ كولەمى 2023 -جىلدىڭ سايكەس كەزەڭىمەن سالىستىرعاندا 940,3 ميلليون ا ق ش دوللارىنا نەمەسە 10,5 پايىزعا ءوستى.
«قىتاي (21,5 پايىز)، رەسەي (17,8 پايىز)، قازاقستان (5,9 پايىز)، تۇركيا (4,4 پايىز) جانە كورەيا رەسپۋبليكاسىنىڭ (3,7 پايىز) سىرتقى ساۋدا اينالىمىنىڭ سالىستىرمالى تۇردە ەلەۋلى ۇلەسى بار»، دەپ جازادى وزبەكستاندىق ب ا ق.
بوعدا كولىندە حالىقارالىق قار ۆولەيبولىنا شاقىرۋ ءتۋرنيرى ءوتىپ جاتىر - «Harajorga»
21-ناۋرىزدا شىڭجاڭنىڭ تيانشان بوعدا كولى حالىقارالىق قار شاڭعى بازاسىندا «ءبىر بەلدەۋ، ءبىر جول. جىبەك جولى» اتتى 2024 -جىلعى قىتاي حالىقارالىق قار ۆولەيبولىنا شاقىرۋ ءتۋرنيرى باستالدى، دەپ حابارلايدى قىتايدىڭ «Harajorga» اقپاراتتىق جەلىسى.
اتالعان ب ا ق-تىڭ دەرەگىنشە، وسى جولعى تۋرنيرگە فرانتسيا، يران، قازاقستان جانە قىتاي قاتارلى ەلدەردەن 10 ەر جانە ايەلدەر كومانداسى قاتىسۋدا.
«حالىقارالىق قار ۆولەيبولىنا شاقىرۋ تۋرنيرى 4 كۇنگە جالعاسادى. ەر، ايەلدەر كومانداسى بولىپ باقتارىن سىنايتىن جارىستا ءار توپ الدىمەن ءبىر اينالىمدىق ماتچ وينايدى. سودان كەيىن رەيتينگتەرگە نەگىزدەلگەن كروسس- ەليميناتسيا جارىسى باستالادى»، دەپ جازادى قىتايلىق ب ا ق.
اۆتور
بەيسەن سۇلتان
