بەننۋ استەرويدىنان اكەلىنگەن توپىراقتان نە تابىلدى
NASA ءبىزدىڭ پلانەتامىزدان 3 ميلليارد ك م قاشىقتىقتاعى بەننۋ استەرويدىنان ءۇش اپتا بۇرىن جەرگە جەتكىزىلگەن توپىراق تالداۋىنىڭ العاشقى ناتيجەسىن جاريالادى.

جۇلدىزارالىق شاڭنىڭ حيميالىق قۇرامىن زەرتتەۋ ناتيجەسى وندا كومىرتەك پەن سۋ مولشەرى كوپ ەكەنىن كورسەتتى، دەپ حابارلايدى Kazinform اگەنتتىگى BBC جاڭالىقتارىنا سىلتەمە جاساپ.
ساراپتاما جۇرگىزگەن اريزونا ۋنيۆەرسيتەتى عالىمدارى بۇل جاڭالىق تىرشىلىكتىڭ ءاۋ باستا ءبىزدىڭ پلانەتادا پايدا بولماعانىن، جەرگە عارىشتان اكەلىندى دەگەن گيپوتەزانى جاناما راستايتىنىن ايتتى.
استەرويدقا ساياحات ءتورت جىلدان استام ۋاقىتقا سوزىلدى.
NASA- نىڭ OSIRIS- REx ميسسياسى 2016 -جىلدىڭ قىركۇيەگىندە ىسكە قوسىلعانىمەن، قۇرىلعى كوزدەگەن جەرگە 2020 -جىلدىڭ قازان ايىندا جەتىپ، توپىراق ۇلگىلەرىن جينادى.
وسيريسكە ورالۋ ءۇشىن تاعى ءۇش جىل قاجەت بولدى.
قۇندى جۇك يۋتا شولىنە جەتكىزىلىپ، تەحاس شتاتى دجونسون قالاسىنداعى NASA زەرتحاناسىنا تالداۋعا جىبەرىلدى.
«بۇل - جەرگە اكەلىنگەن ەڭ ۇلكەن جانە كومىرتەگىنە باي استەرويد ۇلگىسى»، - دەدى NASA اكىمشىسى بيلل نەلسون.
ونىڭ حيميالىق قۇرامى الدەقايدا قىزىق.
نەلسوننىڭ ايتۋىنشا، ۇلگىدەگى كومىرتەگى مولشەرى جالپى سالماقتىڭ %5 ىن قۇرايدى جانە تەك مينەرالدى تۇردە عانا ەمەس، سونىمەن قاتار كۇردەلى ورگانيكالىق قوسىلىستاردا دا تابىلعان.
عالىمدار باستاپقىدا بولجاعانداي، سۋ ساز مينەرالدارىنىڭ كريستالدىق قۇرىلىمىندا «قامالىپ» قالعان.
ءبىر نۇسقا بويىنشا، جەر بىردەن «كوك پلانەتاعا» اينالعان جوق: مۇحيتتار، تەڭىزدەر، وزەندەر مەن كولدەردى قۇرايتىن سۋدىڭ بارلىعى دەرلىك 4-4,5 ميلليارد جىل بۇرىن ءبىزدىڭ پلانەتامىز استەرويدتارمەن جاپپاي بومبالانعان كەزدە عارىشتان جەتكەن.
زەرتحانا عالىمدارى بۇل زەرتتەۋدىڭ باستاماسى ەكەنىن اتاپ ءوتتى.
جۇلدىزارالىق شاڭ تۇيىرشىكتەرى ءالى تالاي قۇپيانى اشۋى مۇمكىن.
سوندىقتان اكەلىنگەن ۇلگىنىڭ ۇشتەن ءبىر بولىگى كىشىرەك بولىكتەرگە ءبولىنىپ، ودان ءارى زەرتتەۋ ءۇشىن دۇنيە جۇزىندەگى ونداعان زەرتحانالارعا جىبەرىلەدى.
بۇعان دەيىن بەننۋ استەرويدىنان توپىراق اكەلە جاتقان كاپسۋلا جەر بەتىنە امان- ەسەن قونعانىن جازعان بولاتىنبىز.