بەلگيادا جاقىندارىنىڭ مۇراسىنان باس تارتاتىندار كوبەيدى

بەلگيالىق نوتاريۋستاردىڭ سوزىنشە، جاقىندارى قازا تاپقاننان كەيىن ونىڭ مۇراعا قالعان مۇلكىنەن باس تارتاتىن بەلگيالىقتار سانى كوبەيگەن، دەپ حابارلايدى Kazinform ءتىلشىسى.

مۇنداي ۇردىسكە بەلگيا تۇرعىندارىنىڭ سوڭىنان قارىز قالاتىنى، ونى جاقىندارى قابىلداۋدان باس تارتاتىنى سەبەپ بولعان.

بەلگيا نوتاريالدىق فەدەراتسيا دەرەگىنشە، 2022 -جىلى 51817 ازامات نوتاريۋس ارقىلى تەگىن مۇرادان باس تارتقان. 2018 -جىلدان بەرى باس تارتقاندار سانى %44 كە ءوستى. وعان سەبەپ - جاقىن ادامىنىڭ كرەديتورلارعا قارىزى كوپ.

بەلگيا ازاماتى گەري لەلە اكەسى قايتىس بولعاننان كەيىن مۇرادان باس تارتۋ ءۇشىن بىردەن نوتاريۋس ىزدەي باستاعانىن ايتادى.

- بىرىنشىدەن، ماعان ودان ەشتەڭە كەرەك ەمەس ەدى، وعان قوسا ونىڭ ءومىر سالتىن بىلگەندىكتەن قارىزى بار دەگەن كۇمانىم بولدى. ءبىراق مۇنداي ارەكەتكە بارمادىم. وكىنىشكە قاراي، مۇنىم قاتەلىك بولىپتى. بىرنەشە كۇننەن كەيىن-اق العاشقى قارىز ۆەكسەلدەرى تۇسە باستادى - دەيدى گ. لەلە.

تاعى ءبىر تۇرعىن كەرولايننىڭ اكەسىمەن قارىم- قاتىناسى جاقسى بولدى، ءبىراق ول اپكەسى ەكەۋى مۇرادان باس تارتامىز دەپ شەشكەن.

- ءبىز ونىڭ قارىزى بار ەكەنىن، كۇندەلىكتى اقشاعا يەلىك ەتۋ وعان قيىن ەكەنىن بىلدىك. سول سەبەپتى ءوزىمىزدى قولىمىزدان كەلگەنشە قورعادىق. ول كەزدە تاڭداۋ ايقىن بولدى. مەن كوللەدجدىڭ جاپ- جاس ستۋدەنتىمىن، سول سەبەپتى قارىزدى تولەيتىن مۇمكىندىگىم بولعان جوق، - دەيدى ايەل.

بەلگيالىق مۇراگەرلەر مۇلىكتەن باس تارتقاننان كەيىن كرەديتورلار ولاردان قارىز تولەۋدى تالاپ ەتە المايدى.

دەگەنمەن مۇرادان باس تارتقان ادام قايتىس بولعان جاقىنىنىڭ ەشبىر زاتىن اكەتە المايدى. جەرگىلىكتى نوتاريۋستەردىڭ سوزىنشە، مۇرادان باس تارتقان تۇلعا اتا- اناسىنا تيەسىلى، ونىڭ ىشىندە وتباسىلىق ەستەلىكتەردىڭ ەشقايسىسىن الا المايدى.

- شاعىن عانا زاتتى، ءتىپتى قاراپايىم كادەسىيدى الۋدىڭ ءوزى مۇرادان باس تارتۋ شارتىن بۇزادى. سودان كەيىن مەملەكەت ءسىز مۇرانى قابىلدادىڭىز دەپ ەسەپتەيدى، - دەپ تولىقتىردى نوتاريۋس.

وكىنىشكە قاراي، كەي ادامداردىڭ وتباسىلىق ءۇيى، ونىمەن بىرگە ىشىندەگى زاتتىڭ ءبارى وزگەنىڭ يەلىگىنە كەتەدى.

كەرولاين ءۇشىن اكەسىنىڭ قازاسىنا وسىنداي سىناق تا قوسىلدى:

«ونىڭ ءۇيى بولعان جوق. ءبىراق مەن كەيبىر ەستەلىكتەردى، اجەمە تيەسىلى زاتتاردى قايتارعىم كەلەر ەدى. ولاردىڭ ەش قۇندىلىعى جوق، ءجاي عانا قوناق بولمەدە تۇرعانىن كورۋ ۇنايتىن» .

بەلگيا زاڭى بويىنشا، باس تارتقان جاعدايدا، مۇرا كەلەسى ۇرپاققا، ءتىپتى ول كامەلەت جاسىنا تولماعان بالا بولسا دا وتەدى.

- ەگەر بالاڭىز بولسا سوتتان بالاڭىز ءۇشىن دە مۇرادان باس تارتۋدى سۇراۋىڭىز قاجەت بولادى، ايتپەسە مۇرا، ياعني قارىز دا ونىڭ موينىنا جۇكتەلىپ كەتەدى، - دەپ راستادى نوتاريۋس سيلۆەن باۆە.

بەلگيالىق نوتاريۋستار مۇرادان باس تارتۋعا ءۇش جاعداي سەبەپ بولىپ وتىر دەيدى: ەلدە الەۋمەتتىك-ەكونوميكالىق تۇراقسىزدىقتىڭ ارتۋى، ازاماتتاردىڭ باس تارتۋ مۇمكىندىگى تۋرالى حاباردارلىعى مەن جاقىنداردىڭ بىرگە تۇرماۋى، ياعني وتباسى بۇزىلعان جاعداي.

- بۇل ادامدار ءومىر بويى جۇمىس ىستەيدى، بالالارىن قالىپتاستىرعىسى كەلەدى. ومىرىندە قايعىلى جاعداي، اۋرۋ پايدا بولعان كەزدە بايلانىس ۇزىلەدى. باي ادامدار مۇرانى جالعاستىرا الادى، ال ورتا تاپ پەن كەدەيلەردىڭ وعان شاماسى جەتپەيدى. بۇل - ادىلەتسىزدىك، - دەپ قورىتىندىلادى ءسوزىن كەرولاين.