بۇكىل بانككە ورتاق QR كود جىلدىڭ سوڭىندا پايدا بولادى

استانا. KAZINFORM - ۇلتتىق بانكتىڭ باسقارما ءتوراعاسى تيمۋر سۇلەيمەنوۆ ب ا ق وكىلدەرىمەن وتكەن باسپا ءسوز ءماسليحاتىندا ءار ءتۇرلى بانكتەردىڭ ءتۇرلى تولەمدەرىن ءوزارا قابىلدايتىن ورتاق QR كود جىلدىڭ سوڭىندا پايدا بولاتىنىن ايتتى.

«بۇل باعىتتا جۇمىس ىستەپ جاتىرمىز. جۇيەنى ءبىرىڭعاي QR نەمەسە ءتۇرلى بانكتەردىڭ QR كودى دەپ تە اتاۋعا بولادى. بۇل ماسەلەنىڭ تەحنيكالىق جاعى. وڭاي بولۋ ءۇشىن ءبىرىڭعاي QR دەسەك تە بولادى. مۇنداعى يدەيا 100 پايىز ۇلتتىق بانككە تيەسىلى ۇلتتىق تولەم كورپوراتسياسىنىڭ ءتۇرلى بانكتەر قولدانىسقا شىعارعان QR كودتاردى ءوزارا وقي الاتىن جۇيە ازىرلەۋىنە قۇرىلعان. دۇكەندە QR كود ارقىلى تولەم جاساعىڭىز كەلسە، Halyk نەمەسە Kaspi بار ما دەپ سۇرايدى. Halyk تىڭ كارتاسىمەن Kaspi تەرمينالىندا تولەم جاساي المايسىڭ جانە كەرىسىنشە. بۇل تۇتىنۋشىلارعا دا، بانكتەردىڭ وزىنە دە قولايسىز دەپ ويلايمىن. ويتكەنى ترانزاكسيانىڭ ءبىر بولىگى كەتىپ جاتىر دەگەن ءسوز»، - دەپ ءتۇسىندىردى تيمۋر سۇلەيمەنوۆ.

سونداي-اق، ول «Bloomberg» اگەنتتىگىندە جاريالانعان سۇحباتتا ءسوزى ءسال بۇرمالانىپ كەتكەنىن ايتتى.

«ول جەردە مونوپوليانى تومەندەتكىمىز كەلەتىنى تۋرالى وي ءسال تەرىس بەرىلگەن. شىنىمەن دە بىزدە تولەم نارىعىنىڭ %80 يگەرىپ وتىر. بۇل جاقسى دا، جامان دا ەمەس - قالىپتاسقان جاعداي. ال ءبىزدىڭ ترانزاكتسيالار كەدەرگىسىز جۇرەتىندەي جۇيە قۇرعىمىز كەلەدى. اتالعان ەكى بانكتىڭ باسشىلىعى بىزبەن بەلسەندى جۇمىس ىستەپ وتىر. ەشقانداي قارسىلىق، ءدۇدارازدىق جوق. بانكتەر ونداي جۇيەنىڭ ءتيىمدى بولاتىنىن، وزدەرىنە بەلگىلى ءبىر ەكونوميكالىق پايداسى بولاتىنىن ءتۇسىنىپ وتىر. جىل اياعىنا دەيىن جۇيەنى قاناتقاقتى رەجيمدە ەنگىزەمىز. بىرنەشە بانككە جالعاپ، سىناقتان وتكىزىپ كورەمىز. ال كەلەسى جىلدىڭ باسىندا جوبانى تولىققاندى ىسكە اسىرىپ، بۇكىل بانكتەردى قوسامىز»، - دەدى ۇلتتىق بانك ءتوراعاسى.