بازاردا جۇمىس ىستەپ جۇرگەن 7 جاسار بالا قاۋىپسىز جەرگە ورنالاستىرىلدى
تۇركىستان. KAZINFORM - جەتىسايداعى 7 جاسار بالا مەن ونىڭ ءىنىسى قاۋىپسىز جەرگە ورنالاستىرىلدى. بۇل تۋرالى ق ر وقۋ-اعارتۋ مينيسترلىگىنە قاراستى بالالاردىڭ قۇقىقتارىن قورعاۋ كوميتەتى مالىمدەدى.
قازىرگى تاڭدا ءتيىستى ورگاندار بالالاردىڭ دەنساۋلىق جاعدايىن، ولاردى قۇجاتتاندىرۋ جانە بارلىق قۇقىقتارىن قالپىنا كەلتىرۋ ماسەلەلەرىمەن اينالىسۋدا.
الەۋمەتتىك جەلىدە بازاردا اربا سۇيرەپ جۇرگەن 7 جاسار بالانىڭ ۆيدەوسى تارادى.
اناسىنىڭ جوقتىعىن ايتقان جەتكىنشەك 5 جاستاعى ءىنىسى جانە اكەسى ۇشەۋى بىرگە تۇراتىندىعىن ايتادى. ول قۇجاتتارىنىڭ جوقتىعىنان مەكتەپكە بارماعان.
اتالعان ۆيدەوعا پىكىر بىلدىرۋشىلەردىڭ ءبىر توبى بالاعا جاناشىرلىق تانىتسا، ەندى ءبىر توبى قاراۋسىز قالدىرعان جەرگىلىكتى باسشىلىقتى كىنالادى.
ولاردىڭ ىشىندە «مىنا بالانى تاۋىپ بەرىڭىزدەرشى، اكەسىنىڭ تەلەفون ءنومىرى بار ما؟ ءۇي، جۇمىس، مەكتەپ ءبارىن شەشىپ بەرەمىن»، «قۇجاتى بولماسا دا، مەكتەپ وقىتۋى كەرەك»، «جەتىسايدىڭ اكىمى، سونداعى باسشىلار قايدا قاراپ وتىر، جاۋاپقا تارتۋ كەرەك»، «قاي جاقتا ەكەن، قالاي كومەك بەرە الامىز»، «قالايشا قۇجات جوق؟ اكەسى قۇزىرلى ورگاندارعا بارسا، قۇجات جاساپ بەرەدى عوي، تاس ءداۋىرى ەمەس قوي، 21-عاسىر»، «ەرتەڭ وتە مىقتى بالا ءوسىپ شىعادى» دەگەن جازبالار بار.
ال، ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى بۇل جاعدايدى شەشۋ ءۇشىن مەملەكەتتىك ورگان بەكىتكەن الگوريتمگە سايكەس ارنايى توپ جۇمىلدىرىلعاندىعىن مالىمدەدى.
«7 جاسار بالا مەن ونىڭ ءىنىسى قاۋىپسىز جەردە. قازىرگى ۋاقىتتا ءتيىستى ورگاندار بالالاردىڭ دەنساۋلىق جاعدايى، ولاردى قۇجاتتاندىرۋ جانە بارلىق قۇقىقتاردى قالپىنا كەلتىرۋ ماسەلەلەرىمەن اينالىسۋدا. ايتا كەتەيىك، ءار بالانىڭ قۇقىقتارى مەن مۇددەلەرىن، ونىڭ ىشىندە وتباسىن، قاۋىپسىزدىكتى، ءبىلىم بەرۋدى جانە لايىقتى ءومىر ءسۇرۋ جاعدايلارىن قورعاۋ باسىمدىق بولىپ تابىلادى. اتالعان ماسەلە تۇپكىلىكتى شەشىلگەنگە دەيىن بالالاردىڭ قۇقىقتارىن قورعاۋ كوميتەتىنىڭ باقىلاۋىندا بولماق»، - دەلىنگەن كوميتەت تاراپىنان بەرىلگەن اقپاراتتا.
بۇعان دەيىن شىمكەنتتىك جۇرگىزۋشى كوشەگە تونناعا جۋىق قويدىڭ ىشەك قارنى مەن تەرىسىن توگىپ كەتكەنى ءمالىم بولدى.
اۆتور
قايرات زاينيشەۆ
