«باۋىرىنا سالۋ» فيلمىنىڭ رەجيسسەرى: «وسكاردا» جەڭىسكە ۇمىتكەرلەردىڭ قاتارىندامىز

استانا. KAZINFORM - قازاقستاندىق رەجيسسەر اسحات كۋچينچيرەكوۆتىڭ «باۋىرىنا سالۋ» فيلمى وسكارعا قالاي ۇسىنىلعانىن جانە تۋىندى نەلىكتەن الەمدىك ۇزدىك كارتينالار تىزىمىنە ەنۋى ءتيىس ەكەنىن ايتىپ بەردى.

رەجيسسەر فيلمدە قازاقتىڭ ەجەلدەن كەلە جاتقان ءداستۇرى، ياعني بالانى تۋىستارىنا، اتا-اجەسىنە تاربيەلەۋگە بەرۋ ماسەلەسى قوزعالاتىنىن ءتۇسىندىردى. بۇل تاقىرىپ قازاق مادەنيەتىندە ايتىلسا دا، كەڭىنەن تالقىلانعان ەمەس.

اسحات كۋچينچيرەكوۆ ءوزىنىڭ ءبىر جاس ءۇش ايلىعىندا اجەسىنىڭ تاربيەسىنە بەرىلگەنىن، وسى داستۇرمەن وسكەنىن، سوندىقتان دا بۇل تاقىرىپ ونى ۇنەمى تولعاندىرىپ جۇرگەنىن مويىندادى.

«الەمدە كوپتەگەن بالا اتا- اجەسى نەمەسە باسقا دا تۋىستارىنىڭ قولىندا ءوسىپ جاتىر جانە بۇل فيلم ولاردىڭ ومىردەگى جاعدايىن سۋرەتتەيدى. اسىرەسە، وسى جاعداي قازاقستاندا وتە ماڭىزدى، ويتكەنى كوپشىلىگىمىز اتا- اجەنىڭ قولىندا وستىك. ءبىز بۇل تۋرالى ويلاعان كەزدە وتە جىلى سەزىمگە بولەنەمىز، سوندىقتان كارتينا بۇل جاعىنان وتە اسەرلى شىقتى»، - دەدى رەجيسسەر.

ونىڭ ايتۋىنشا، فيلمدە ونىڭ بالالىق شاعى مەن تۋعان اۋىلىنداعى ءومىرى بەينەلەنگەن. ءتۇسىرىلىم ءۇش جىلعا سوزىلدى جانە سان- سەباستيان كينوفەستيۆالىندە فيلمنىڭ پرەمەراسى ءوتتى.

وندا فيلم بەسىنشى ورىن الىپ، ەڭ جوعارى «ا» الەمدىك رەيتينگىن الدى.

قازىر فيلم 17 كينوفەستيۆالدەن ءوتىپ، جۇلدەلى ورىندارعا يە بولدى. ال رەجيسسەردىڭ ءوزى ەڭ ۇزدىك رەجيسسەر جانە سەناريست رەتىندە تانىلدى. ەندى كوماندانىڭ الدىندا وسكار سىيلىعىندا الەمدىك ۇزدىك 15 فيلمنىڭ قاتارىنا كىرۋ مىندەتى تۇر.

«ءبىزدى نازاردان تىس قالدىرا المايدى، سەبەبى 17 جۇلدەنى الىپ ۇلگەردىك. ءبىز كوزگە تۇسەمىز دەگەن ويدامىن. اتاپ ايتقاندا، فاۆوريتتەردىڭ قاتارىندا تۇرمىز»، - دەيدى رەجيسسەر.

سونىمەن قاتار ول قازىردىڭ وزىندە شەتەلدىك سەرىكتەستەر ءتۇسىرىلىم توبىنىڭ جۇمىسىنا نازار اۋدارىپ وتىرعانىن، ال حالىقارالىق باق فيلمگە جوعارى باعا بەرگەنىن اتاپ ءوتتى. وسى ورايدا رەجيسسەر جۇمىسىن جالعاستىرىپ، بۇل باعىتتا ءوزىن شىڭداي تۇسۋگە دايىن ەكەنىن جەتكىزدى.

ەسكە سالساق، «باۋىرىنا سالۋ» فيلمى مادەنيەت جانە اقپارات مينيسترلىگى مەن ۇلتتىق كينونى قولداۋ ورتالىعىنىڭ قولداۋىمەن تۇسىرىلگەن. فيلم جاقىندا «تۇلپار» ۇلتتىق سىيلىعىن يەلەندى جانە وسكار كوميتەتىنە International Feature Film نوميناتسياسى بويىنشا قازاقستان اتىنان ۇسىنىلىپ وتىر.

امەريكا اكادەمياسىنىڭ داۋىس بەرۋى ءۇش كەزەڭدە وتەدى. 9-13-جەلتوقسان ارالىعىندا اكادەميكتەر شورتليست جاساقتايدى، ول 17-جەلتوقساندا جاريالانادى. داۋىس بەرۋ 2025 -جىلدىڭ 8-12-قاڭتارى ارالىعىندا وتەدى. ونىڭ قورىتىندىسى بويىنشا 17-قاڭتاردا بارلىق ساناتتاعى نومينانتتار بەلگىلى بولادى. ءۇشىنشى، سوڭعى كەزەڭ 11-18-اقپان ارالىعىندا وتەدى. جەڭىمپازداردىڭ ەسىمى 2025 -جىلدىڭ 2 -ناۋرىزىندا لوس- انجەلەستە كونۆەرتتەردى اشۋ سالتاناتىندا جاريالانادى.