باۋىرلاس قازاق ەلىندەگى كوشپەندىلەر ويىنى جوعارى دەڭگەيدە وتۋىنە تىلەكشىمىز - قىرعىز مەملەكەتتىك حاتشىسى

استانا. KAZINFORM - قىرعىز رەسپۋبليكاسىنىڭ مەملەكەتتىك حاتشىسى سۇيۇنبەك كاسمامبەتوۆ قازاقستانعا V دۇنيەجۇزىلىك كوشپەندىلەر ويىنىن وتكىزۋدە ساتتىلىك تىلەدى. مەملەكەتتىك حاتشى قىرعىزستاننىڭ ىستىقكول وبلىسىندا Jibek Joly ارناسىنا شاعىن سۇحبات بەردى.

«باۋىرلاس، ءبىرتۋعان قازاق ەلىن، قازاق تۋعاندارىمىزدى كوشپەندىلەر ويىنى كۇتىپ تۇر. ولار ابدەن ىنتىزارلىقپەن دايىندالدى، كوشپەندىلەر ويىنىن ۇيىمداستىرۋ جۇمىسىن ودان ءارى جالعاستىرىپ كەتەيىك دەپ ارەكەت جاسادى. ءبىز دۇنيە جۇزىنە، كوشپەندىلەر مادەنيەتىن، تۇركى مادەنيەتىن ناسيحاتتاپ جاتىرمىز. سپورت ارقىلى پاش ەتەمىز»، - دەيدى قىرعىزستان مەملەكەتتىك حاتشىسى.

سۇيۇنبەك كاسمامبەتوۆتىڭ ايتۋىنشا، بۇعان دەيىن دەيىن كوپتەگەن ويىندارعا كوشپەندىلەر جۇرتى كۇندەلىكتى جاتتىعۋ رەتىندە قاراسا، كەيىنىرەك بۇل ويىندار تۇرىك دۇنيەسىنە كەڭىنەن تاراعان ويىنداردىڭ بىرىنە اينالدى.

«باۋىرلاس قازاق ەلىمەن بىرگە دەمىمىزدى ىشكە تارتىپ، ىنتىماقتى بولسا ەكەن دەپ، جاقسىلىقتى ناسيحاتتاسا ەكەن دەپ جوعارى دەڭگەيدە ءوتۋىن تىلەيمىز. باۋىرلاستارعا يگىلىك تىلەيمىز»، - دەپ جىلى لەبىزىن ءبىلدىردى سۇيۇنبەك كاسمامبەتوۆ.

ەسكە سالا كەتەيىك، دۇنيەجۇزىلىك كوشپەندىلەر ويىنى 8-13-قىركۇيەك ارالىعىندا استانادا وتەدى.