باۋىرجان جاقىپ «قازاق ادەبيەتى» گازەتىنىڭ باس رەداكتورى بولىپ تاعايىندالدى
استانا. KAZINFORM - «قازاق ادەبيەتى» گازەتىنىڭ باس رەداكتورى بولىپ اقىن، فيلولوگيا عىلىمدارىنىڭ دوكتورى، پروفەسسور باۋىرجان جاقىپ تاعايىندالدى.
«ەلىمىزدىڭ باس ادەبي، مادەني اپتالىعى - «قازاق ادەبيەتى» گازەتىنىڭ باس رەداكتورى قىزمەتىنە تاعايىندالدىم. بۇرىندارى عابيت مۇسىرەپوۆ، بەيىمبەت مايلين، ءابدىلدا تاجىبايەۆ، ءىسلام جارىلعاپوۆ، سىرباي ماۋلەنوۆ، جۇماعالي ساين، زەينوللا قابدولوۆ، جۇماعالي ىسماعۇلوۆ، نىعمەت عابدۋللين، ءانۋار ءالىمجانوۆ، شەرحان مۇرتازا، تولەن ابدىكوۆ، ورالحان بوكەي، احات جاقسىبايەۆ، ۇلىقبەك ەسداۋلەت، جۇسىپبەك قورعاسبەك، جۇمابەك كەنجالين، جۇماباي شاشتاي ۇلى سياقتى تۇلعالار اتقارعان قىزمەتكە كەلۋ ۇلكەن جاۋاپكەرشىلىك جۇكتەيدى. اكادەميك- جازۋشى زەينوللا قابدولوۆ ءوزىمنىڭ ءتول ۇستازىم، ال كەيىنگى جىلدارى باس رەداكتور بولعان جاناربەك ءاشىمجان مەن داۋرەن قۋات ءوزىمنىڭ ءتول شاكىرتتەرىم. قازاقستان جازۋشىلار وداعى باسقارما ءتوراعاسىنىڭ شىعارماشىلىق جونىندەگى ورىنباسارى بولىپ، 7 جىلعا جۋىق تەر توكتىم. ەندى مىنە ءتوراعا مەرەكە ابدەش ۇلى قۇلكەنوۆ قازاقستان جازۋشىلار وداعىنىڭ حاتشىسى - «قازاق ادەبيەتى» گازەتىنىڭ باس رەداكتورى قىزمەتىنە تاعايىنداپ وتىر. ۇلكەن جاۋاپكەرشىلىك پەن سەنىمدى اقتاۋعا تىرىسامىن»، - دەپ جازدى فەيسۋبۋكتەگى پاراقشاسىندا باۋىرجان جاقىپ.
باۋىرجان جاقىپ - 1963 -جىلى 1-مامىردا بۇرىنعى سەمەي وبلىسى اباي اۋدانى اققورا اۋىلىندا تۋعان. الماتى قالاسىنداعى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. ەڭبەك جولىن قازاق تەلەديدارىنىڭ ادەبي-درامالىق حابارلار باس رەداكسياسىندا، ودان كەيىن «جالىن» كىتاپ باسپاسىندا رەداكتور بولىپ باستادى. قازاق تەلەديدارىندا قىزمەت اتقارعان كەزىندە «ديدار» ادەبي تەلەالماناحىن، «حالىق قازىناسى»، «جىر جازامىن جۇرەگىمنەن»، «سۇحبات» حابارلارىن ازىرلەپ، جۇرگىزدى. «ايتىس» حابارىن جاساۋعا قاتىستى. «الاتاۋ» تەلەارناسى ارقىلى «ولەڭ - ءسوزدىڭ پاتشاسى»، «باسپاسوزگە شولۋ» سيكلدى حابارلارىن جۇرگىزدى.
1986 - 2001 ج ج. ءال-فارابي اتىنداعى قازاق ۇلتتىق ۋنيۆەرسيتەتىندە وقىتۋشى، ستاجەر-زەرتتەۋشى، اسسيستەنت، اعا وقىتۋشى، دوتسەنت، دەكاننىڭ وقۋ ءىسى جونىندەگى ورىنباسارى، جۋرناليستىك شەبەرلىك جانە ادەبي رەداكتسيالاۋ كافەدراسىنىڭ مەڭگەرۋشىسى، باسپا ءىسى كافەدراسىنىڭ، مەرزىمدى باسپا ءسوز كافەدراسىنىڭ مەڭگەرۋشىسى، جۋرناليستيكا فاكۋلتەتىنىڭ دەكانى بولىپ ىستەدى. 2009 -جىلى «قازاق ەنسيكلوپەدياسىنىڭ» باس ديرەكتور-باس رەداكتورى بولدى.
1994 -جىلى پروفەسسور ت. س. اماندوسوۆتىڭ جەتەكشىلىگىمەن «مۇحتار اۋەزوۆ - پۋبليتسيست» اتتى تاقىرىپتا كانديداتتىق ديسسەرتاتسياسىن، 2004 -جىلى اكادەميك ز. قابدولوۆتىڭ جەتەكشىلىگىمەن «قازاق پۋبليتسيستيكاسىنىڭ قالىپتاسۋ، دامۋ جولدارى» دەگەن تاقىرىپتا دوكتورلىق ديسسەرتاتسياسىن قورعادى. 1997 -جىلى دوتسەنت، 2005 -جىلى پروفەسسور عىلىمي اتاعىن الدى. 200-دەن استام عىلىمي ەڭبەكتىڭ اۆتورى.
قازاقستان جازۋشىلار وداعىنىڭ باسقارما مۇشەسى (2002)، قازاقستان جۋرناليستيكا اكادەمياسىنىڭ اكادەميگى (2006)، حالىقارالىق جازۋشىلار مەن پۋبليتسيستەر اسسوتسياتسياسىنىڭ مۇشەسى (2006)، ق ر جوعارى مەكتەپ ۇلتتىق عىلىم اكادەمياسىنىڭ كوررەسپوندەنت مۇشەسى (2007) ، حالىقارالىق شىڭعىس ايتماتوۆ اكادەمياسىنىڭ اكادەميگى (2011) . ق ر ۇ ع ا- نىڭ كوررەسپوندەنت مۇشەسى.
«اۋديتوريا» (1984)، «باسپالداقتار» (1987)، ء«بىر كەمەنىڭ ۇستىندە» (1987)، «پارۋس ۆرەمەني» (1987)، «ارالىم - ارىم، بالقاشىم - باعىم» (1988)، «كوزىمنىڭ نۇرى» (1990)، «ايدىنداعى اسپان» (1996)، «مۇحتار اۋەزوۆ - پۋبليتسيست» (1997)، «اق لاق» (1997)، «قولتاڭبا» (2001)، «ۋاقىت ۇرشىعى» (2004)، «قازاق پۋبليتسيستيكاسىنىڭ قالىپتاسۋ، دامۋ جولدارى» (2004)، «پۋبليتسيستيكالىق شىعارماشىلىق نەگىزدەرى» (2007)، « قىزىل قايىڭ» (2008)، «ابايدىڭ قاسقابۇلاعى» (2012)، «ەلىككورگەن» (2013)، «مەنىڭ دالام» (2014)، ت. ب. كىتاپتارى جارىق كوردى. تاڭداۋلى جىرلارى «ەكى مىڭ جىلدىق دالا جىرى» (2000) انتولوگياسىنا، «جىر مارجانى» اتتى ون تومدىق قازاق پوەزياسىنىڭ انتولوگياسىنا (2015) ەنگىزىلگەن. شىعارمالارى ورىس، تۇرىك، ۋكراين، ماكەدون، تۇركىمەن، قىرعىز تىلدەرىنە اۋدارىلدى.
شىعارماشىل جاستاردىڭ «جىگەر» فەستيۆالىنىڭ يەگەرى (1984)، قازاقستان جازۋشىلار وداعىنىڭ م. ماقاتايەۆ اتىنداعى سىيلىعىنىڭ (1990)، دارىندى جاس عالىمداردىڭ مەملەكەتتىك ستيپەندياسىنىڭ (1998)، قازاقستان جۋرناليستەر وداعىنىڭ س. ءسادۋاقاسوۆ اتىنداعى سىيلىعىنىڭ (1998) ، «دارىن» مەملەكەتتىك سىيلىعىنىڭ (1999)، 2004 -جىلى باكۋدە وتكەن بۇكىل تۇركى دۇنيەسى اقىندارىنىڭ 11-شى «حازار شەير اقشامدارى» فەستيۆالىنىڭ يەگەرى. ق ر مادەنيەت جانە اقپارات مينيسترلىگىنىڭ «مادەنيەت قايراتكەرى» توسبەلگىسىمەن ماراپاتتالعان (2006) . تۇركيانىڭ ەلازىع شاھارىندا وتكەن ايگىلى جازۋشى شىڭعىس ايتماتوۆقا ارنالعان بۇكىل تۇركى دۇنيەسى اقىندارىنىڭ 15- «حازار شەير اقشامدارى» فەستيۆالىنىڭ ديپلومانتى (2007). ماكەدونيانىڭ سكوپە، كوسوۆانىڭ پريشتينا قالالارىندا وتكەن بۇكىل تۇركى دۇنيەسى اقىندارى فەستيۆالىنىڭ يەگەرى (2007). «ج و و- نىڭ ۇزدىك وقىتۋشىسى» رەسپۋبليكالىق بايقاۋىنىڭ جەڭىمپازى (2009)، ق ر ءبىلىم جانە عىلىم مينيسترلىگىنىڭ قۇرمەت گراموتاسىن (2010)، 2011 -جىلى ساۋىردە ەلباسى ن. ءا. نازاربايەۆتىڭ العىس حاتىن الدى. «ق ر تاۋەلسىزدىگىنە 20 جىل» ، مەدالىمەن، «قۇرمەت» وردەنىمەن، 2013 -جىلى «مادەنيەت سالاسىنىڭ ۇزدىگى» توسبەلگىسىمەن ماراپاتتالدى. شاكارىم اتىنداعى سەمەي مەملەكەتتىك پەداگوگيكالىق ۋنيۆەرسيتەتىنىڭ «قۇرمەتتى پروفەسسورى». 2014 -جىلى قازاقستان جۋرناليستيكا اكادەمياسىنىڭ «التىن جۇلدىز» سىيلىعىمەن، ت. ب. كوپتەگەن سىيلىقتارمەن ماراپاتتالعان.
2015 -جىلدىڭ ناۋرىزىنان باستاپ ءال-فارابي اتىنداعى قازاق ۇلتتىق ۋنيۆەرسيەتىندە رەكتوردىڭ كەڭەسشىسى - «ونەگەلى ءومىر» سەريالىق باسىلىمى باس رەداكتورىنىڭ ورىنباسارى قىزمەتىن اتقارادى.
2018 -جىلدىڭ 12-ناۋرىزىندا وتكەن قازاقستان جازۋشىلارىنىڭ ⅩⅤ قۇرىلتايىندا قازاقستان جازۋشىلار وداعى باسقارما ءتوراعاسىنىڭ ورىنباسارى بولىپ سايلاندى.
اۆتور
ەربول جانات
