«باۋىرجان شيىرشىعى» بۇگىنگە دەيىن ا ق ش پەن يزرايلدىڭ اسكەري وقۋ ورىندارىندا وقىتىلادى
استانا. KAZINFORM - باۋىرجان مومىش ۇلى ۇلى وتان سوعىسى مايدانىنا تۋرا ماسكەۋ ءۇشىن شايقاستىڭ قىزعان كەزىندە كەلدى. ول الماتىدا قۇرىلعان گەنەرال يۆان ۆاسيليەۆيچ پانفيلوۆ باسقارعان 316-اتقىشتار ديۆيزياسىنا ءتۇستى.
مادەنيەت جانە اقپارات مينيسترلىگى مالىمەتىنشە، باۋىرجان مومىش ۇلى سول كەزدە وفيتسەرلىك شەنگە يە بولعان، سوندىقتان بىردەن باتالون كومانديرى قىزمەتىنە تاعايىندالدى. ال 316- ديۆيزيانى تىكەلەي ماسكەۋدى قورعاۋعا جىبەردى.
ۆەرماحتتىڭ قاتتى شابۋىلى كەزىندە جاۋدى توقتاتىپ، اسكەردىڭ جەكە قۇرامىن ساقتاپ قالۋ ءۇشىن ەرەكشە تاكتيكالىق امالدار كەرەك بولدى. سودان بەرى «باۋىرجان شيىرشىعى» دەپ اتالاتىن تاكتيكا ەل ەسىندە قالدى.
ونىڭ ءمانى مىناداي ەدى: جاۋدىڭ شابۋىلداۋشى كولونناسىنا كەنەتتەن سوققى بەرىپ، ۇزاق سوعىسقا بارماي، شەگىنىپ وتىرعان. وسىلايشا جاۋدىڭ كۇشى بىرتىندەپ السىرەگەن. سول كەزدە قايتا سوققى بەرىپ، سول سوققى جەڭىسكە جەتكىزگەن.
جاس قازاقتىڭ تاكتيكاسىمەن بەتپە-بەت كەلگەن گەنەرال گپنەر گيتلەرگە جولداعان بايانداماسىندا بىلاي دەپ جازعان: «ەشقانداي سوعىس زاڭدارى مەن ەرەجەلەرىن مويىندامايتىن، جابايى ديۆيزيا. ونىڭ ساربازدارى بەرىلمەيدى، ەرەكشە فاناتيزممەن سوعىسادى جانە ولىمنەن قايمىقپايدى».
باۋىرجان مومىش ۇلى بىرنەشە رەت قورشاۋدا قالعان، ءبىراق ءار جولى اسكەرىن دە، وعان سەنىپ تاپسىرىلعان بولىمدەردىڭ جاۋىنگەرلىك قابىلەتىن دە ساقتاپ، ءساتتى شىعا ءبىلدى.
«باۋىرجان شيىرشىعى» بۇگىنگە دەيىن ا ق ش پەن يزرايلدىڭ اسكەري وقۋ ورىندارىندا قورشاۋدان شىعۋ كەزىندەگى جاۋىنگەرلىك ءىس- قيمىل ۇلگىسى رەتىندە وقىتىلادى.
باۋىرجان مومىش ۇلىنا «كەڭەس وداعىنىڭ باتىرى» اتاعى تەك 1990 -جىلى، قايتىس بولعاننان كەيىن بەرىلدى. ول 1982 -جىلى دۇنيەدەن ءوتتى.
ايتا كەتەيىك، باۋىرجان مومىش ۇلىنىڭ الىپ پورترەتى رەكوردتار كىتابىنا ەندى.
