بايقوڭىر قالاسىنىڭ قازىرگى جاي- كۇيى قانداي
قىزىلوردا وبلىسىنىڭ اكىمى نۇرلىبەك نالىبايەۆ ەلوردادا ەسەپتىك كەزدەسۋىندە رەسەيگە جالعا بەرىلگەن بايقوڭىر قالاسىندا قانداي اباتتاندىرۋ جۇمىستارى ءجۇرىپ جاتقانىن ايتتى، دەپ حابارلايدى Kazinform.
«بايقوڭىر قالاسىندا جەرلەستەرىمىز كوپ. ولارعا بارلىق جاعداي جاسالىپ جاتىر. بۇرىن جابىق قالا بولعاندىقتان كىرىپ- شىعۋ قيىنداۋ ەدى. قازىر ونىڭ ءبارى رەتتەلدى، ەشقانداي شەكتەۋ جوق. قازىرگى تاڭدا جەرلەستەرىمىزگە ارناپ جاڭادان مەكتەپ پەن بالاباقشالار سالىنۋدا. بۇرىنعى بالاباقشالاردى دا كۇردەلى جوندەۋدەن وتكىزىپ جاتىرمىز. «جايلى مەكتەپ» جوباسى اياسىندا ءبىر مەكتەپ بايقوڭىر قالاسىندا سالىنادى. بالالاردىڭ ءبىلىم الۋى، بالاباقشا ماسەلەسى تولىق شەشىلگەن»، - دەدى نۇرلىبەك نالىبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سونىمەن بىرگە، بايقوڭىر قالاسىنىڭ كارىز جۇيەسىن جاڭارتۋعا الداعى ەكى جىلعا 12 ميلليارد تەڭگە قاراجات ءبولىندى. بۇل جۇمىس كەلەسى جىلى باستالادى.
«قازىر بايقوڭىر - سۋ جۇيەسى جاڭارعان، گاز تولىق كىرگىزىلگەن قالا، ەندى كارىز جۇيەلەرى جاڭارتسا، ينفراقۇرىلىمعا بايلانىستى ماسەلە بولمايدى. ودان بولەك، وتكەن ايلاردا بايقوڭىر قالاسىندا ءتورت تاريحي تۇلعالارىمىزعا كوشە اتاۋلارىن بەردىك. ولار - مانشۇك مامەتوۆا، ءاليا مولداعۇلوۆا، باۋىرجان مومىش ۇلى، قورقىت اتا. سوندىقتان بايقوڭىر قالاسىنىڭ اكىمشىلىگىمەن بايلانىسىمىز وتە جاقسى، ماسەلە تۋىنداسا دەر كەزىندە شەشىپ جاتىرمىز. وتكەن جىلى سونداعى قىزمەتكەرلەرگە كوپقاباتتى تۇرعىن ۇيلەر سالۋدى باستادىق. كەزەكتە تۇرعان جەرلەستەرىمىز بار. بۇل جۇمىستار دا كەلەسى جىلى جالعاسادى»، - دەپ تولىقتىردى ن. نالىبايەۆ.
ايتا كەتەيىك، كەلەسى جىلى قىزىلوردا قالاسىنداعى قورقىت اتا اۋەجايىنىڭ جاڭا تەرمينالى پايدالانۋعا بەرىلەدى.
