بايدەن ترامپقا جاسالعان قاستاندىققا بايلانىستى مالىمدەمە جاسادى
استانا. KAZINFORM - دجو بايدەن اق ءۇيدىڭ بۇرىنعى باسشىسى جانە رەسپۋبليكالىقتار اتىنان ا ق ش پرەزيدەنتتىگىنە كانديدات دونالد ترامپتقا جاسالعان قاستاندىق ارەكەتىنە بايلانىستى امەريكا حالقىنا ۇندەۋ جاسادى.
پرەزيدەنتتىڭ سوپاقشا كابينەتتە جازعان مالىمدەمەسىندە ول امەريكالىقتاردى ساياساتتاعى زورلىق-زومبىلىقتان باس تارتۋعا شاقىردى، دەپ حابارلايدى BBC.
«ءبىز ساياساتىمىزدا تەمپەراتۋرانى تومەندەتۋىمىز كەرەك. مۇنداي زورلىق-زومبىلىقتىڭ نورماعا اينالۋىنا جول بەرىلمەۋى ءتيىس. ەلىمىزدەگى ساياسي ريتوريكا وتە قىزا ءتۇستى. ونى سالقىنداتاتىن ۋاقىت كەلدى. مۇنى ىستەۋ -ءبارىمىزدىڭ جاۋاپكەرشىلىگىمىز»، - دەدى بايدەن.
ول ساياسات «بەيبىت پىكىرتالاس الاڭى» بولۋى كەرەك ەكەنىن جانە زورلىق- زومبىلىق ەشقاشان جاۋاپ بولا المايتىنىن ايتتى. پرەزيدەنت ترامپقا تەزىرەك ساۋىعىپ كەتۋىن تىلەپ، ميتينگى كەزىندە ونىڭ وتباسى مۇشەلەرىن وقتان قورعاعان 50 جاستاعى كوري كومپەراتورەنى باتىر دەپ اتادى.
بۇل بايدەننىڭ پرەزيدەنتتىك كەزەڭدەگى سوپاقشا كابينەتتەن جاساعان ءۇشىنشى ۇندەۋى بولدى. مۇنداي ءسوز سويلەۋ سالىستىرمالى تۇردە سيرەك ءوتىپ، ادەتتە ەڭ ماڭىزدى وقيعالارعا ارنالادى. بايدەن بۇعان دەيىنگى ۇندەۋىن وتكەن جىلدىڭ قازان ايىندا حاماس- تىڭ يزرايلگە شابۋىلىنان كەيىن جاساعان.
بۇعان دەيىن ول 2023 -جىلدىڭ ماۋسىمىندا ا ق ش كونگرەسىنەن امەريكالىق قارىز شەگىن ۇلعايتۋعا رۇقسات بەرۋدى تالاپ ەتۋ ءۇشىن ۇلتقا ۇندەۋ جاسادى.
ەسكە سالايىق، بۇعان دەيىن ا ق ش- تىڭ پەنسيلۆانيا شتاتىندا سايلاۋالدى اكتسياسى كەزىندە دونالد ترامپقا قاستاندىق جاسالعانىن جازعان بولاتىنبىز.
سەنبى كۇنى بۇرىنعى پرەزيدەنت دونالد ترامپتى ولتىرمەك بولعان ادامنىڭ 20 جاستاعى توماس مەتتيۋ كرۋكس ەكەنى انىقتالدى.
قوسا كەتسەك، بۇعان دەيىن پرەزيدەنت قاسىم-جومارت توقايەۆ ا ق ش ساياساتكەرى دونالد ترامپقا جاسالعان قاستاندىقتى قاتاڭ ايىپتايتىنىن مالىمدەگەن ەدى.
