بايدەن مەن ترامپ گازا ماسەلەسىن بىرلەسىپ شەشپەك
استانا. KAZINFORM – ا ق ش پرەزيدەنتى دجو بايدەن اقۇيدە ەكى ساعاتقا سوزىلعان كەزدەسۋدە ا ق ش- تىڭ جاڭا سايلانعان پرەزيدەنتى دونالد ترامپتان يزرايل مەن حاماس اراسىنداعى اتىستى توقتاتۋ ءۇشىن بىرلەسىپ جۇمىس ىستەۋدى سۇرادى، دەپ جازادى Axios.
دجو بايدەن سارسەنبى كۇنى گازادا تۇتقىنعا الىنعان امەريكالىقتاردىڭ وتباسى مۇشەلەرىمەن كەزدەستى. ول ءوز كەزەگىندە قىزمەتىندەگى قالعان ەكى ايىن گازاداعى جاعدايدى بەيبىتشىلىككە اكەلگىسى كەلەتىنىن جەتكىزدى.
- ءبىز جاڭا كوماندامەن ورتاق ماقساتتا جۇمىس ىستەۋگە، كەپىلگە الىنعانداردى بوساتۋ ءۇشىن ۇجىمدىق كۇش جۇمساۋعا دايىنبىز، - دەدى ۇلتتىق قاۋىپسىزدىك جونىندەگى كەڭەسشى دجەيك سالليۆان.
يزرايل شەنەۋنىكتەرى حاماس ءالى دە گازادا 101 ادامدى كەپىلدە ۇستاپ وتىرعانىن جانە ولاردىڭ كەمىندە 50 ءى ءتىرى ەكەنىن ايتتى.
گازا دەنساۋلىق ساقتاۋ مينيسترلىگىنىڭ مالىمەتىنشە، 43 مىڭنان استام پالەستينالىق قازا تاپقان.
بۇعان دەيىن حابارلاعانىمىزداي بايدەن مەن ترامپ اق ۇيدە كەزدەستى.
