باتىس قازاقستاندا ۇلىمەن بىرگە اداسىپ كەتكەن ايەل دروننىڭ كومەگىمەن تابىلدى

ورال. KAZINFORM - باتىس قازاقستان وبلىسىندا 43 جاستاعى ايەل 10 جاسار ۇلىمەن بىرگە جەڭىل كولىكپەن شىعىپ، اداسىپ كەتكەن.

ب ق و ت ج دەپارتامەنتىنىڭ باسپا ءسوز قىزمەتىنەن ءمالىم ەتكەنىندەي، ولار 27-ساۋىرگە قاراعان ءتۇنى تەرەكتى اۋدانى سارى ءومىر اۋىلىنان دۋانا ەلدى مەكەنىنە بەت العان.

جەرگىلىكتى تۇرعىندار 27-ءساۋىر كۇنى تاڭنان باستاپ ىزدەستىرگەن. ايەل باعدارىنان ايىرىلىپ، اۆتوكولىگى سىنعاننان كەيىن قۇتقارۋشىلاردان كومەك سۇراعان.

ىزدەۋ جۇمىستارى ءوتىنىش بەرۋشىمەن بايلانىستىڭ جوعالىپ كەتۋىنە بايلانىستى قيىندادى.

- جۇمىستى جەدەلدەتۋ ماقساتىندا ت ج م قوسىمشا كۇشتەرى مەن قۇرالدارى، سونداي-اق 3 ۇشقىشسىز ۇشۋ اپپاراتى ىزدەۋگە تارتىلدى. جۇمىلا جاسالعان جۇمىس ناتيجەسىندە ايەل مەن ونىڭ بالاسى كەشكى ساعات 19.40 تا تەرەكتى اۋدانى رىبتسەح اۋىلىنىڭ ماڭىندا اقاۋلى كولىكتەن تابىلدى. جوعالعاندار مەديتسينالىق كومەككە مۇقتاج بولماي، ەلدى مەكەنگە جەتكىزىلدى، - دەپ حابارلادى ۆەدومستۆودان.

ەسكە سالا كەتەيىك، بۇدان بۇرىن ورال قالاسىندا يەسىز ۇيدە ارقالىق جاس جىگىتتى باسىپ قالعانىن جازعان بولاتىنبىز.