«باستاۋ» كينوفەستيۆالى «سوعىس تۇتقىنى» فيلمىمەن اشىلادى

12-16-جەلتوقسان ارالىعىندا الماتىدا XI حالىقارالىق «باستاۋ» ستۋدەنتتىك جانە دەبيۋتتىك فيلمدەر كينوفەستيۆالى وتەدى، دەپ حابارلايدى Kazіnform.

12-جەلتوقساندا اباي اتىنداعى قازاق ۇلتتىق وپەرا جانە بالەت تەاترىندا فەستيۆال رەجيسسەر ەلدار قاپاروۆتىڭ «سوعىس تۇتقىنى» تاريحي دراماسىنىڭ پرەمەراسىمەن اشىلادى.

فيلمدەگى وقيعانىڭ نەگىزى ەكىنشى دۇنيەجۇزىلىك سوعىستان كەيىن كەڭەستىك تۇتقىندا بولعان جاپون جىگىتى، يمپەراتورلىق مەكتەپتىڭ كۋرسانتى احيكو تەسۋرونىڭ شىنايى تاعدىرى توڭىرەگىندە ءوربيدى.

لاگەردە جاس جاپون سوعىستىڭ ناعىز باتىرى، كەڭەس اسكەرىندە قىزمەت ەتكەن جانە بەرلينگە شابۋىلعا قاتىسقان قازاق جاۋىنگەرى اكەجانمەن كەزدەسەدى.

ول كەيىن جاپون سوعىسىنا جىبەرىلىپ، وندا جاراقات الىپ، تۇتقىنعا تۇسكەن. قايتىپ ورالعاننان كەيىن اكەجان «ساتقىن جانە حالىق جاۋى» رەتىندە سوتتالعان…

فيلمدى پروديۋسەرلەر بوريس چەردابايەۆ جانە ءاليا ۋۆالجانوۆا باستاعان حالىقارالىق كوماندا تۇسىرگەن.

جاپوندار جاقتان سانو سيندزيۋ جانە شۋيچي ەسيمۋرا بولدى. باستى كەيىپكەرلەردىڭ ءرولىن سىرىم قاشقابايەۆ (قازاقستان) جانە ەيساكۋ وگاساۆارا (جاپونيا) سومدادى.

فەستيۆال ءداستۇرلى تۇردە Tanaris Production جانە A-Team كينوكومپانيالارىمەن الماتى قالاسى اكىمدىگىنىڭ جانە ق ر مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلادى.

فوتو: "باستاۋ" كينوفەستيۆالىنىڭ ۇيىمداستىرۋشىلارى

 

فەستيۆالدىڭ سەرىكتەستەرى - ت. جۇرگەنوۆ اتىنداعى قازاق ۇلتتىق ونەر اكادەمياسى، «تۇران» ۋنيۆەرسيتەتىنىڭ Turan Film Academy جوعارى مەكتەبى، AlmaU مەديا جانە كينو مەكتەبى جانە قازاق ۇلتتىق ونەر ۋنيۆەرسيتەتى.

بۇكىل كورسەتىلىمدەر «ارمان» كينوورتالىعىندا وتەدى. كىرۋ تەگىن.

اۆتور
جانات قاپالبايەۆا