باس پروكۋراتۋرا وكىلى ۋكراينادا تۇتقىنعا تۇسكەن 3 قازاق جىگىتىنە قاتىستى تۇسىنىكتەمە بەردى

استانا. KAZINFORM - باس پروكۋروردىڭ ورىنباسارى عالىمجان قويگەلديەۆ ۋكراينادا تۇتقىنعا تۇسكەن 3 قازاق جىگىتىنە قاتىستى تۇسىنىكتەمە بەردى.

بۇگىن سەناتتا ب ا ق وكىلدەرى ودان: «ءۇش قازاق بالاسىنىڭ تۇتقىنعا تۇسكەنى تۋرالى ۆيدەو تارادى، ءتولقۇجاتتارى قازاقستاندىكى. ولار قازاقستانعا ەكستراديتسيالانا ما الدە رەسەيدىڭ تۇتقىن الماسۋىن كۇتەمىز بە؟» - دەپ سۇراعان ەدى. 

باس پروكۋراتۋرا وكىلى اتالعان ۆيدەونى كورگەندەرىن، ولاردىڭ ۋكراينادا ەكەنىن ايتتى.

- بۇل ماسەلە تولىعىمەن زەرتتەلەدى. ۆيدەودا وزدەرى ايتقان ماعلۇماتقا قاراعاندا ولاردىڭ سوعىسقا قاتىسۋ ءۇشىن بارعانى انىق. تاعى قايتالاپ ايتامىن، بىزدە 170-باپ، 172-باپ بار. سول باپتاردىڭ توڭىرەگىندە ولاردىڭ ءىسى قارالادى، - دەدى عالىمجان قويگەلديەۆ.

سونىمەن قاتار ول وسى جايتقا بايلانىستى ۋكراينا تاراپىمەن ەش بايلانىسقا شىقپاعانىن اتاپ ءوتتى.

ايتا كەتەيىك، تاياۋدا ۋكراينا پرەزيدەنتى ۆلاديمير زەلەنسكي ۆيكتور مايكونى ۋكراينانىڭ قازاقستانداعى توتەنشە جانە وكىلەتتى ەلشىسى قىزمەتىنە تاعايىنداۋ تۋرالى جارلىققا قول قويدى.

اۆتور

مارلان جيەمباي