بار ماقساتىم - پاريجدە كوك تۋىمىزدى جەلبىرەتۋ - قامشىبەك قوڭقابايەۆ

استانا. KAZINFORM - ءتورتجىلدىقتىڭ باستى باسەكەسى پاريج وليمپياداسى كۇن ساناپ جاقىنداپ كەلەدى. بۇعان دەيىن ءدۇبىرلى دوداعا جولداما جەڭىپ العان سپورتشىلار دايىندىعىن پىسىقتاپ، قىزۋ جاتتىعۋ جاساسا، جولداماعا قول جەتكىزە الماعاندار ىرىكتەۋ تۋرنيرلەرىنە دايىندالىپ جاتىر.

قازاق بوكسشىلارى اراسىندا ەرلەر قۇراماسىنان پاريج وليمپياداسىنا العاشقى جولدامانى 92+ كەلى سالماقتا ونەر كورسەتەتىن قامشىبەك قوڭقابايەۆ قانا جەڭىپ العان بولاتىن. ول بۇل مۇمكىندىككە وتكەن جىلى قىتايدىڭ حاڭجوۋ قالاسىندا وتكەن ازيا ويىندارىندا قول جەتكىزدى.

قامشىبەك وليمپيادا ويىندارىندا ەكىنشى مارتە ەل نامىسىن قورعايدى. ول ءبىرىنشى رەت توكيو وليمپياداسىنا قاتىسىپ، قولا مەدال جەڭىپ العان ەدى.

ەندى قوڭقابايەۆتىڭ وسى ۋاقىتقا دەيىن قانداي جەتىستىكتەرگە قول جەتكىزگەنىنە قىسقاشا شولۋ جاساپ كورەيىك.

اسا اۋىر سالماقتا ەل نامىسىن سىناپ جۇرگەن ساڭلاعىمىز 1991-جىلى 18- قاراشا كۇنى قىزىلوردادا دۇنيەگە كەلگەن.

جەتىستىكتەرى:

توكيو وليمپياداسىنىڭ قولا جۇلدەگەرى

الەم چەمپيوناتىنىڭ 2 مارتە كۇمىس جۇلدەگەرى (2017، 2019)

جازعى ازيا ويىندارىنىڭ كۇمىس جۇلدەگەرى (2022)

ازيا چەمپيوناتىنىڭ 4 مارتە كۇمىس جۇلدەگەرى

قامشىبەك قوڭقابايەۆ - 92+ كەلى سالماقتا 2 مارتە وليمپيادادا باق سىنايتىن ءۇشىنشى قازاقستاندىق بوكسشى.

تاجىريبەلى سپورتشىنى 2006-جىلدان بەرى سەيىتجان توكەنوۆ جاتتىقتىرادى. قامشىبەكتىڭ جەكە باپكەرى شاكىرتىن ءالى كۇنگە سىندارلى سايىستاردا شىڭداپ، جارىستارعا باپتاپ ءجۇر.

«مەن الداعى ليتسەنزيالىق تۋرنيرلەرگە بارماسام دا، ۇلتتىق قۇرماداعى بوكسشىلارمەن بىرگە دايىندالىپ، بىرگە جاتتىعىپ، بىرىككەن وقۋ-جيىندارىندا ءجۇرمىن. مەندە قازىر جالعىز عانا ماقسات بار - ول پاريج وليمپياداسىندا ەل نامىسىن ابىرويمەن قورعاپ، كوك تۋىمىزدى جەلبىرەتۋ. سول ءۇشىن كۇندىز-ءتۇنى تىنباي جاتتىعىپ، ءدۇبىرلى دوداعا جاقسى دايىندىقپەن بارۋىم كەرەك. بۇيىرسا، جۇلدە الامىن دەپ ويلايمىن»، - دەيدى بوكسشى.

شاكىرتى تۋرالى قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ تا پىكىر ءبىلدىرىپ، قوڭقابايەۆقا ءۇمىت ارتىپ وتىرعانىن جاسىرمادى.

«ول - توكيودا وليمپيادانىڭ قولا مەدالىن جەڭىپ العان بوكسشى. ءبىرىنشى وليمپياداسى ەمەس. تاجىريبەلى ساقا سپورتشىلارىمىزدىڭ ءبىرى. ەندى، مىنە ەكىنشى وليمپياداسىنا بارۋعا «بيلەتى» دايىن، قولىندا تۇر. ءتورت جىل بۇرىنعى جەتىستىگىن جاقسارتىپ، پاريجدە التىن الۋدى كوزدەپ وتىر. وعان سپورتشىنىڭ الەۋەتى جەتەدى»، - دەدى م. ايتجانوۆ.

اۆتوركۇنسۇلتان وتارباي