باقىتجان بازاربەك: سوتتار ءالى ادىلدىكتى قورعايتىن ينستيتۋتقا تولىق اينالعان جوق

استانا. KAZINFORM - ءماجىلىس دەپۋتاتى باقىتجان بازاربەك پالاتانىڭ جالپى وتىرىسىندا سوت جۇيەسىندە شەشىمىن تاپپاي وتىرعان ماسەلەلەردى اتادى.

- سوتتاردىڭ زاڭدى كۇشىنە ەنگەن شەشىمدەرى ورىندالماي كەلەدى. سەبەبى بارشاڭىزعا بەلگىلى. ول ءۇشىن زاڭنامانى ءالى دە جەتىلدىرۋىمىز قاجەت، كەم تۇستارىن قوعامنىڭ بۇگىنگى سۇرانىستارىنا ساي وزگەرتۋ ماڭىزدى.

ماسەلەن، ءوزىم ءماجىلىستىڭ قابىلداۋ بولمەسىندە ءبىر كۇندە 160 تان استام ازاماتتى قابىلدادىم. بۇل پارلامەنتكە دەگەن سەنىم بولعانىمەن، جەرگىلىكتى جەردە شەشىلۋى ءتيىس ماسەلەلەر تيىسىنشە جۇزەگە اسپاي، ورتالىققا دەيىن جەتىپ جاتىر دەگەندى بىلدىرەدى، - دەدى دەپۋتات.

ونىڭ ويىنشا، بۇلاي بولماۋ ءۇشىن جەرگىلىكتى ورگانداردىڭ جاۋاپكەرشىلىگى مەن جۇمىسىن كۇشەيتۋ كەرەك.

- سوت - ادىلدىكتىڭ، اقيقاتتىڭ، ەڭ باستىسى، ادامنىڭ قۇقىقتارىن جان-جاقتى قورعايتىن ينستيتۋتقا اينالۋى ءتيىس. ازىرشە، بۇل تولىعىمەن ىسكە اسپاي وتىر. تاعى ءبىر تۇيتكىل، قوعامدا ماسەلە شەشكىش دەلدالداردىڭ، ياعني «پوموگايكالاردىڭ» كوبەيىپ كەتۋى. بۇل بويىنشا دا ءادىل شەشىم قابىلداپ، ولارعا زاڭمەن توسقاۋىل قويعان ءجون، - دەدى باقىتجان بازاربەك.

ايتا كەتەيىك، بۇگىنگى ءماجىلىس جيىنىندا پرەزيدەنت قاسىم-جومارت توقايەۆتىڭ ساياسي رەفورماسى تالقىلانىپ جاتىر. وعان پالاتا دەپۋتاتتارىنان بولەك، عالىمدار مەن ساراپشىلار، ب ا ق باسشىلارى قاتىسىپ وتىر.

اۆتور

ەسىمجان ناقتىباي