بانگلادەشتە 18 ميلليون ادام جۇمىس ىزدەپ ءجۇر

استانا. KAZINFORM - بۇگىندە بانگلادەشتە جاستاردى جۇمىسپەن قامتۋدا كۇردەلى ماسەلە اينالعان.

18 ميلليونعا جۋىق ادام بەلسەندى تۇردە جۇمىس ىزدەۋگە كىرىستى، دەپ حابارلايدى Kazinform اگەنتتىگىنىڭ حالىقارالىق شولۋشىسى.

ساراپشىنىڭ ايتۋىنشا، بانگلادەشتە مەملەكەت مەنشىگىندەگى نەمەسە سۋبسيديالاناتىن 47 ۋنيۆەرسيتەت، سونىمەن قاتار 105 جەكە ۋنيۆەرسيتەت جانە 2 حالىقارالىق ۋنيۆەرسيتەت بار. ەلدەگى ستۋدەنت سانى - 2,8 ميلليونعا جۋىق. بانگلادەش ۇلتتىق ۋنيۆەرسيتەتىندە وقۋ اقىسى جىلىنا نەبارى 9 دوللار. الايدا شەتەلدىكتەر ءۇشىن بۇل شامامەن 1 مىڭ دوللار تۇرادى.

«جالپى، بانگلادەشتە 18 ميلليونعا جۋىق ادام جۇمىس ىزدەپ ءجۇر. جاستاردىڭ 40 پايىزعا جۋىعى جۇمىسسىز. ءبىراق ستۋدەنتتەر ءۇشىن جۇمىسسىزدىقتىڭ وزىندىك ەرەكشەلىكتەرى بار. قالىپتى جاعدايدا، جوعارى ءبىلىم مىقتى كادرلاردى ىرىكتەۋدە الەۋمەتتىك ساتى بولىپ سانالادى. ءبىراق ەلدەگى ءجۇز ەلۋ جوعارى وقۋ ورنىندا 2,8 ميلليون ستۋدەنت بولسا، ولاردىڭ بارلىعىنا لايىقتى جۇمىس ورنى بولماۋى مۇمكىن. ونىڭ ۇستىنە مەملەكەتكە جۇمىس ىستەيتىندەردىڭ 30 پايىزى جەكەلەگەن الەۋمەتتىك توپ وكىلدەرى ءۇشىن ساقتالعان بولسا»، - دەيدى حالىقارالىق باقىلاۋشى.

ەسكە سالايىق، بانگلادەشتەگى ستۋدەنتتەردىڭ جاپپاي نارازىلىعى ماۋسىم ايىنىڭ سوڭىندا باستالعان ەدى. بۇل ەلدى 2009 -جىلدان بەرى باسقارىپ كەلگەن پرەمەر- مينيستر شەيح حاسينانىڭ وتستاۆكاعا كەتۋىنە اكەلدى. كەيىنىرەك حاسينانىڭ ۇلى بريتانيادان باسپانا سۇراعانى بەلگىلى بولدى.

5-تامىزدا ەلدە ۋاقىتشا ۇكىمەت قۇرىلىپ، پارلامەنت تاراتىلدى. ءبىر كۇننەن كەيىن نوبەل سىيلىعىنىڭ لاۋرەاتى، پروفەسسور مۇحاممەد يۋنۋس ۋاقىتشا ۇكىمەتتى ونىڭ باس كەڭەسشىسى رەتىندە باسقارۋعا كەلىستى.