بانكومات جانىنداعى باقىلاۋ: پەتروپاۆلدا جاڭا الگوريتم الاياقتاردىڭ جوسپارىن بۇزدى

پەتروپاۆل. KAZINFORM - پەتروپاۆل قالاسىندا ينتەرنەت-الاياقتىقتىڭ جولىن كەسۋگە باعىتتالعان جاڭا الگوريتم تيىمدىلىگىن كورسەتتى. جاڭا ءتاسىلدىڭ ارقاسىندا ءبىر اپتا ىشىندە 7 ميلليون تەڭگەدەن استام قاراجات الاياقتاردىڭ قولىنا تۇسپەي قالدى، دەپ حابارلايدى Polisia.kz.

سولتۇستىك قازاقستان وبلىسىندا جىل باسىنان بەرى 270 تەن استام ينتەرنەت-الاياقتىق فاكتىسى تىركەلىپ، بۇل وڭىردەگى بارلىق قىلمىستىڭ تورتتەن ءبىرىن قۇراپ وتىر.

پوليتسيا دەپارتامەنتى باسشىلىعىنىڭ باستاماسىمەن پەتروپاۆلداعى ساۋدا- ويىن- ساۋىق ورتالىقتارىندا پوليتسيا مەن جەكەمەنشىك كۇزەت قىزمەتكەرلەرى بىرلەسىپ كەزەكشىلىك اتقارىپ، بانكومات ماڭىنداعى جاعدايدى باقىلاۋدا ۇستايدى. اسىرەسە، تەلەفونمەن سويلەسىپ، ابدىراعان كۇيدە اقشا اۋدارماق بولعان ەگدە جاستاعى ازاماتتارعا ەرەكشە نازار اۋدارىلادى.

الاياقتاردىڭ ءجيى قولداناتىن ادىستەرى: «ءسىزدىڭ اتىڭىزعا نەسيە راسىمدەلدى» نەمەسە «اناشىم، مەن جول اپاتىنا ءتۇستىم» دەگەن جەلەۋمەن اقشا تالاپ ەتۋ.

مىسالى، ءتارتىپ ساقشىلارى 74 جاستاعى زەينەتكەردى بانكومات جانىندا بايقاپ قالىپ، ونى الاياقتان قۇتقارىپ قالدى. ايەلگە ءوزىن بانك قىزمەتكەرى رەتىندە تانىستىرعان ادام اتىنا نەسيە راسىمدەلگەنىن ايتىپ، 500 مىڭ تەڭگەنى «قاۋىپسىز شوتقا» اۋدارۋدى سۇراعان. ۋاقىتىلى ارالاسۋدىڭ ارقاسىندا بۇل ارەكەتكە توسقاۋىل قويىلدى.

ءدال وسىنداي جاعدايدا 75 جاستاعى تاعى ءبىر تۇرعىن دا الاياققا اقشا اۋدارۋعا وقتالعان. قىراعىلىق تانىتقان كۇزەتشى مەن پوليتسيانىڭ جەدەل ارەكەتى ونىڭ دا قاراجاتىن ساقتاپ قالۋعا سەپ بولدى.

ءۇشىنشى وقيعادا زەينەتكەر ەرلى-زايىپتى 6 ميلليون تەڭگەسىنەن ايىرىلىپ قالا جازدادى. ولار 1,5 ميلليون تەڭگەنى اۋدارىپ ۇلگەرگەنىمەن، پوليتسيا قىزمەتكەرلەرىنىڭ ءتۇسىندىرۋ جۇمىسى ناتيجەسىندە قالعان 4,5 ميلليون تەڭگەنى امان الىپ قالدى.

س ق و پ د باستىعىنىڭ ءبىرىنشى ورىنباسارى اسقار مۇحامەتقاليەۆتىڭ ايتۋىنشا، بۇل الگوريتم ءوز تيىمدىلىگىن دالەلدەپ وتىر. بولاشاقتا ونى جەتىلدىرۋ، كەڭەيتۋ جانە ۇزدىك قىزمەتكەرلەردى ىنتالاندىرۋ جوسپارلانعان.

پوليتسيا ازاماتتاردى زەينەت جاسىنداعى تۋىستارى مەن تانىستارىنا الاياقتىق ادىستەرىن ءتۇسىندىرىپ، بانكومات الدىندا جالعىز قالدىرماۋعا شاقىرادى. كۇماندى جاعدايدا بانكپەن نەمەسە «102» نومىرىنە قوڭىراۋ شالۋ قاجەتتىگى ەسكەرتىلەدى.