بانكتەر 2025-جىلدان باستاپ تابىسىنان سالىق تولەيدى
قازاقپارات ءتىلشىسىنىڭ ساۋالىنا جاۋاپ بەرگەن مەملەكەتتىك كىرىستەر كوميتەتى ادىستەمە دەپارتامەنتىنىڭ ديرەكتورى ءاليا جەتىبايەۆا جاڭا سالىق كودەكسىنە ەنگىزىلىپ جاتقان وزگەرىستەر تۋرالى ايتىپ بەردى.
ءاليا جەتىبايەۆا مالىمدەگەندەي، جاڭا كودەكسكە ساي، ەكى جىلدان كەيىن بانكتەر وپەراتسيا مەن قۇندى قاعازداردان تاپقان پايداسىنان سالىق تولەيدى.
«بانك جۇيەسىندەگى سالىق تولەمدەرى ماسەلەسى ورىندى كوتەرىلىپ وتىر. بۇگىندە ءوتىپ جاتقان ءماجىلىس وتىرىستارىندا جاڭا سالىق كودەكسىنىڭ جوباسىنا بىرنەشە وزگەرىس ەنگىزىلىپ جاتىر. سونىڭ ىشىندە بانكتەرگە 2025-جىلدان باستاپ كورپوراتيۆتىك تابىس سالىعى نەگىزىندە سالىق سالىنادى دەگەن نورمالار بار. ناقتىلاسام، ياعني 2025-جىلدان بانك وپەراتسيالارى مەن ۇلتتىق بانكتىڭ نوتالارىنا سالىق سالىنادى»، - دەدى ءاليا جەتىبايەۆا قازاقپارات ءتىلشىسىنىڭ ساۋالىنا بەرگەن جاۋاپتا.
سپيكەر اتاپ وتكەندەي، بۇگىندە كورپوراتيۆتىك تابىس سالىعىنىڭ مولشەرلەمەسى - %20. جاڭا سالىق كودەكسى قابىلدانسا، وندا بانكتىك وپەراتسيالاردان وسى كولەمدە سالىق تولەمى الىنادى.
ەسكە سالايىق، تاياۋدا پارلامەنت سەناتىنىڭ ءتوراعاسى ماۋلەن اشىمبايەۆ قازاقستاندا جۇمىس ىستەيتىن بانكتەردىڭ وپەراتسيالار ارقىلى تاۋىپ جاتقان پايداسىنا سالىق سالۋ ماسەلەسى قاراستىرىلاتىنىن مالىمدەگەن ەدى.
ال سەنات دەپۋتاتى البەرت راۋ بانكتەر قۇندى قاعازدار تابىسىنان سالىق تولەمەيتىنىن ايتىپ، ماسەلەنى رەتتەۋدى ۇسىندى.
