بالاسىمەن ماقتانۋ اتا-انانىڭ پسيحولوگيالىق ساۋلىعىن جاقسارتادى - زەرتتەۋ

Social Psychological and Personality Science جۋرنالىندا جاريالانعان جاڭا زەرتتەۋ اتا-انانىڭ بالاسىنا دەگەن ماقتانىش پەن ىشكى تەبىرەنىس سەزىمدەرى ولاردىڭ ءومىر ساپاسىنا وڭ اسەر ەتەتىنىن كورسەتتى، دەپ حابارلايدى turkystan.kz.

عالىمداردىڭ ايتۋىنشا، وسىنداي ەموتسيالىق ساتتەر تەك رۋحاني جاعىنان ماڭىزدى عانا ەمەس، سونىمەن قاتار پسيحولوگيالىق تۇرعىدان دا پايدالى.

زەرتتەۋ ناتيجەسىندە بالاسىنىڭ جەتىستىگىمەن ماقتانۋ اتا-انانىڭ ومىرگە قاناعاتتانۋىن ارتتىرىپ، جاعىمسىز ەموتسيالاردى ازايتاتىنى انىقتالعان. ال تەبىرەنىس (نەمەسە بالاسىنىڭ بىرەگەيلىگى مەن وسۋىنە دەگەن ىشكى تاڭدانىس سەزىمى) اتا-انانىڭ ءومىرىنىڭ ءمانىن، ەموتسيونالدىق بايلىعىن جانە جالپى قاناعاتتانۋىن كۇشەيتەدى.

بۇعان دەيىنگى زەرتتەۋلەر كوبىنە اتا- انالىق جاۋاپكەرشىلىكتىڭ اۋىرتپالىعى مەن كۇيزەلىسكە نازار اۋدارسا، بۇل زەرتتەۋ كەرىسىنشە، اتا-انا بولۋدىڭ جاعىمدى ەموتسيالىق سىيىنا باسىمدىق بەرگەن. عالىمدار ماقتانىش پەن تەبىرەنىستى ەكى ءتۇرلى پسيحولوگيالىق باعىت رەتىندە قاراستىرادى: ماقتانىش بالانىڭ جەتىستىگى ارقىلى اتا-انانىڭ ءوزىن-ءوزى باعالاۋىن كوتەرەدى، ال تەبىرەنىس بالامەن تەرەڭ بايلانىس سەزىمىن تۋدىرادى.

زەرتتەۋ اۆتورى، روچەستەر ۋنيۆەرسيتەتىنىڭ دوكتورانتى پرينستون چي بىلاي دەيدى:
«مەنى ءاردايىم اتا-انا بولۋدىڭ وڭ جاقتارى قىزىقتىراتىن. بالالى بولۋدىڭ قانداي كۇردەلى ءارى شىعىنى كوپ ەكەنىن زەرتتەگەن ەڭبەكتەر كوپ. ءبىراق سوعان قاراماستان، ادامدار نەگە بۇكىل الەمدە اتا-انا بولۋعا ۇمتىلادى؟».

عالىمدار بۇل زەرتتەۋ ارقىلى اتا-انالىق ءومىردىڭ ماعىناسى مەن قۋانىشىن كورسەتۋگە تىرىسقان. ناتيجەسىندە، بالانىڭ ءاربىر جەتىستىگى مەن ەرەكشە ساتتەرى اتا-انا ءۇشىن ىشكى رۋحاني قۋات پەن باقىتتىڭ قاينار كوزى بولا الاتىنى دالەلدەندى.