بالالاردىڭ دەنساۋلىق پاسپورتى ەلەكتروندى فورماتقا اۋىستىرىلادى - مينيسترلىك
استانا. KAZINFORM – ق ر دەنساۋلىق ساقتاۋ مينيسترلىگى مەديتسينالىق قىزمەتتەردى سيفرلاندىرۋ بويىنشا جۇمىستىڭ شەڭبەرىندە بالانىڭ دەنساۋلىق پاسپورتىن ەلەكتروندىق فورماتقا كوشىرۋ جوباسىن ازىرلەدى.
اتا-انالار بۇل قۇجاتتى ءبىرىنشى سىنىپقا تۇسكەن كەزدە مىندەتتى تۇردە مەكتەپكە ۇسىنادى. بۇل - جىل سايىن 380 مىڭنان استام بالا.
بالانىڭ دەنساۋلىق پاسپورتى دەنساۋلىقتى نىعايتۋعا، اۋرۋلاردىڭ الدىن الۋعا جانە كىشكەنتاي پاتسيەنتتەردى ەمدەۋگە باعىتتالعان پروفيلاكتيكالىق ءىس- شارالار تۋرالى اقپاراتتى قامتيتىن نەگىزگى قۇجات بولىپ تابىلادى.
بۇل قۇجاتتى قاعاز جۇزىندە جۇرگىزۋ كوبىنەسە ونىڭ جوعالۋىنا نەمەسە وزەكتى دەرەكتەردى جوعالتىپ الۋعا، ەمحانالاردا ۇزاق كۇتۋگە اكەلدى. وسى پروبلەمالارعا جاۋاپ رەتىندە دەنساۋلىق ساقتاۋ مينيسترلىگى وقۋ- اعارتۋ مينيسترلىگىمەن بىرلەسىپ، بالانىڭ دەنساۋلىق پاسپورتىن ەلەكتروندىق فورماتقا اۋىستىرۋعا كىرىستى.
دەنساۋلىق ساقتاۋ مينيسترلىگىنىڭ اقپاراتتىق جۇيەلەرىن تەستىلەۋ كەزىندە بالانىڭ 72 ەلەكتروندىق دەنساۋلىق پاسپورتى (052-2/E نىسانى) قالىپتاستىرىلدى. EGov Mobile-مەن ەلەكتروندىق پاسپورتتى ينتەگراتسيالاۋ پروتسەسىنىڭ اياقتالۋىنىڭ جوسپارلانعان كۇنى - 2024 -جىلعى تامىز.
اتا- انالار ءۇشىن ەلەكتروندىق پاسپورتتى ەنگىزۋ قاعازباستىلىقتى ازايتۋدى جانە eGov Mobile جانە eDensaulyq ەلەكتروندىق قىزمەتتەرى ارقىلى بالالارىنىڭ دەنساۋلىعى تۋرالى اقپاراتقا ىڭعايلى قول جەتكىزۋدى بىلدىرەدى.
ءبىلىم بەرۋ مەكەمەلەرى وقۋشىلاردىڭ دەنساۋلىق جاعدايى تۋرالى وزەكتى دەرەكتەردى جەدەل الا الادى. ولار ەمحانالاردا مەديتسينالىق قاراپ-تەكسەرۋدەن كەيىن اۆتوماتتى تۇردە بەرىلەتىن بولادى.
