بالالاردى ازاپتادى دەگەن كۇدىككە ىلىنگەن شىمكەنتتىك ەمشى ارنايى اۋرۋحانادا جاتىر – ءى ءى م
استانا. KAZINFORM – ق ر ىشكى ىستەر مينيسترلىگى Kazinform اگەنتتىگىنىڭ رەسمي ساۋالىنا بەرگەن جاۋابىندا اسىراپ العان التى بالانى ازاپتادى دەگەن كۇدىككە ىلىنگەن ەمشىنىڭ مامانداندىرىلعان اۋرۋحانادا جاتقانىن ايتتى.
اسىراپ الۋشىعا قاتىستى قىلمىستىق كودەكستىڭ 110-بابىنىڭ 2-بولىگى (ازاپتاۋ) جانە قىلمىستىق كودەكستىڭ 140-بابىنىڭ 2-بولىگى (كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ) بويىنشا ەكى باپ بويىنشا تەرگەۋ ءجۇرىپ جاتىر.
«سوتتىڭ سانكتسياسىمەن كۇدىكتىنىڭ اۋرۋىن ەسكەرە وتىرىپ، قاماۋعا الۋ تۇرىندەگى بۇلتارتپاۋ شاراسى ينتەنسيۆتى باقىلاۋداعى مامانداندىرىلعان ستاتسيونارعا ورنالاستىرىلدى. قىلمىستىق ءىس زەردەلەۋ جانە ودان ءارى قىلمىستىق ىستەر جونىندەگى اۋدانارالىق سوتقا جىبەرۋ ءۇشىن شىمكەنت قالاسىنىڭ پروكۋراتۋراسىنا جىبەرىلدى»، - دەلىنگەن ساۋالعا بەرىلگەن جاۋاپتا.
بۇعان دەيىن حابارلاعانىمىزداي، شىمكەنت تۇرعىنى قامقورلىعىنا العان 6 بالانىڭ اراسىندا ەگىز دە بار. ۇل مەن قىز 2021 -جىلدىڭ 26-مامىردا ەلوردادا دۇنيەگە كەلگەن. ەمشى ولاردى ءۇش ايلىق كەزدەرىندە باۋىرىنا باسقان. قامقورلىققا بەرىلگەن ەگىز ءسابيدىڭ تاعدىرىنا قاتىستى ءىستىڭ ءمان- جايىن استانا قالالىق ءبىلىم باسقارماسىنان سۇراپ بىلگەن بولاتىنبىز.
ەسكە سالساق، شىمكەنتتىك ەمشى اسىراپ العان 6 بالاسىن قورلاپ، ازاپتادى دەگەن كۇدىكپەن قاماۋدا وتىرعانى تۋرالى حابارلاعان ەدىك. ول اسىراپ العان بالالارىنا يت پەن مىسىقتىڭ ەتىن جەگىزدى دەگەن دەرەك شىقتى.
وسى وقيعاعا بايلانىستى ءبىلىم سالاسىنىڭ ءبىرقاتار قىزمەتكەرى جازالاندى. سونىمەن قاتار قالالىق دەنساۋلىق ساقتاۋ باسقارماسىنداعىلار بالالاردىڭ قازىرگى جاعدايى تۋرالى ايتىپ بەردى.
سونداي- اق بالالاردىڭ ەلدىڭ بىرنەشە قالاسىنان اسىراپ الىنعانى بەلگىلى بولدى.
بالالاردىڭ ءبىرىنىڭ اجەسى وسكەمەندە تۇرادى. Kazinform ءتىلشىسى 65 جاستاعى ناتاليا ۋستينوۆامەن جولىعىپ، جيەن نەمەرەسىنىڭ اسىراۋعا قالاي بەرىلگەنىن سۇراپ كوردى.
ال شىمكەنتتەگى بالالار ءۇيىنىڭ باسشىسى ەمشىدەن قورلىق كورگەن وقۋشى تۋرالى ايتىپ بەردى.
بىرەر كۇن بۇرىن وسى بالالارعا قامقورلىق ەمەس، قورلىق كورسەتتى دەپ ايىپتالىپ جاتقان ەمشىنىڭ ءىسىن قارايتىن سۋديا بەلگىلى بولدى.
