بالالارعا دارۋمەن بەرۋ: نەنى ءبىلۋ ماڭىزدى

استانا. KAZINFORM - قازىر اتا-انالار اراسىندا بالالارعا دارۋمەن بەرۋ، يممۋنيتەتتى كوتەرۋ، تەمىر تاپشىلىعىنان ساقتانۋ سياقتى سۇراقتار ءجيى تالقىلانادى. بۇل ماسەلە تۋرالى اللەرگولوگ-يممۋنولوگ ايگەرىم باقىتجان «بۇگىن LIVE» باعدارلاماسىنا بەرگەن سۇحباتىندا جان-جاقتى جاۋاپ بەردى.

- قازىر ءدارىحانالارعا بارساڭىز، دارۋمەندەردىڭ سان ءتۇرىن كورەسىز. كوبى قايسىن ءىشۋ كەرەك، قايسىسى شىنىمەن پايدالى، نەدەن باستاۋ قاجەت دەگەن سۇراقتاردا شاتاسىپ جاتادى. ەگەر بالا ساۋ دۇنيەگە كەلسە، ونىڭ العاشقى كەزەڭىندە ءۇش عانا ماڭىزدى نارسە بار. جاڭا تۋعان نارەستەگە ءبىر تاۋلىك ىشىندە ك دارۋمەنى سالىنادى. بۇل - وتە ماڭىزدى پروتسەدۋرا. الايدا كەيبىر اتا-انالار «ارتىق ينە سالۋدىڭ قاجەتى جوق» دەپ، ودان باس تارتىپ جاتادى. بالا اعزاسىندا ك دارۋمەنى تابيعي تۇردە وتە از مولشەردە تۇزىلەدى. سول سەبەپتى ونى سىرتتان ەنگىزۋ قاجەت. بۇل دارۋمەننىڭ ماڭىزدىلىعى - ونىڭ قان ۇيۋ پروتسەسىنە تىكەلەي اسەر ەتۋىندە. سەبەبى ءسابيدىڭ قان تامىرلارى وتە نازىك ءارى جۇقا بولادى. ەگەر نارەستە قاتتى قوزعالىپ نەمەسە جاراقات السا، قان تامىرلارى جارىلىپ، ءتىپتى ينسۋلتكە اكەلۋى مۇمكىن. مۇنداي ءقاۋىپتىڭ الدىن الۋ ءۇشىن ك دارۋمەنى مىندەتتى تۇردە قابىلدانۋى كەرەك، - دەيدى سپيكەر.

ماماننىڭ ايتۋىنشا، D توبىنداعى دارۋمەندەر دە بالا ءۇشىن اسا ماڭىزدى.

- كەيبىر ادامدار «كۇن ساۋلەسى جەتكىلىكتى بولسا، D دارۋمەنى قاجەت ەمەس» دەپ ويلايدى. بۇل - قاتە پىكىر. سوڭعى زەرتتەۋلەر كۇن ساۋلەسى مول ايماقتاردىڭ وزىندە دە ادامداردىڭ اعزاسىندا بۇل دارۋمەننىڭ جەتىسپەيتىنىن كورسەتىپ وتىر. سوندىقتان D دارۋمەنىن پروفيلاكتيكالىق جانە ەمدىك ماقساتتا قابىلداپ تۇرۋ قاجەت. اسىرەسە، بۇل بالالار ءۇشىن اسا ماڭىزدى. سەبەبى D دارۋمەنى جەتىسپەگەن جاعدايدا راحيت اۋرۋىنىڭ دامۋ ءقاۋپى جوعارىلايدى، - دەيدى دارىگەر.

اللەرگولوگ-يممۋنولوگ بالاعا قاجەتتى وزگە دە ماڭىزدى دارۋمەندەرگە توقتالدى.

- اقۋىز بەن ەنەرگەتيكالىق جەتىسپەۋشىلىك تە - بالا دەنساۋلىعىنا ءقاۋىپ توندىرەتىن جاعدايلاردىڭ ءبىرى. دەگەنمەن، بۇعان بايلانىستى سىرتتان ارنايى باد نەمەسە دارۋمەندەر قابىلداۋدىڭ قاجەتى جوق. سەبەبى بۇل تاپشىلىقتى ەمىزۋلى انانىڭ ءسۇتى تولىق وتەيدى. تەمىر جەتىسپەۋشىلىگىنە بايلانىستى قانازدىقتى كوپشىلىك اعزانىڭ قالىپتى پروتسەسى دەپ قابىلداپ جاتادى. جۇكتى ايەلدەر اراسىندا «گەموگلوبين بارىندە تومەندەيدى» دەگەن پىكىر كەڭ تاراعان. الايدا تەمىر تاپشىلىعى - اعزادا كۇردەلى وزگەرىستەرگە الىپ كەلەتىن قاۋىپتى جاعداي. اسىرەسە، كىشكەنتاي بالالار ءۇشىن بۇل وتە قاتەرلى. تەمىردىڭ جەتىسپەۋى ەستە ساقتاۋ قابىلەتىنىڭ ناشارلاۋىنا، تابەتتىڭ تومەندەۋىنە، ۆيرۋستىق اۋرۋلارعا بەيىمدىلىككە، ءتىپتى جۇرەككە بايلانىستى اقاۋلاردىڭ پايدا بولۋىنا الىپ كەلۋى مۇمكىن، - دەيدى ايگەرىم باقىتجان.

دارىگەر دارۋمەندەردى ءوز بەتىمەن قابىلداۋعا بولمايتىنىن ەسكەرتتى.

- تەمىر نەمەسە باسقا دا دارۋمەندەردى ادام ءوز بەتىمەن قابىلداي سالماۋى كەرەك. بالالار ءۇشىن پەدياتر، ەرەسەكتەر ءۇشىن تەراپيەۆتكە قارالىپ، ارنايى تەكسەرىستەن ءوتۋ قاجەت. دارۋمەن تاپشىلىعىن ناقتى انىقتاۋ ءۇشىن جالپى قان اناليزىنەن بولەك، فەرريتين، ۆ9، ۆ6، فولي قىشقىلى سياقتى كورسەتكىشتەرگە دە قان تاپسىرۋ كەرەك. كەيدە ادامدار تەك جالپى قان تالداۋىنا قاراپ قانا شەشىم شىعارىپ جاتادى. بۇل جەتكىلىكسىز. تەرەڭىرەك تەكسەرىس قاجەت، - دەيدى ول.

ايگەرىم باقىتجان دارۋمەن جەتىسپەۋشىلىگىن جويۋ ءۇشىن تەك دۇرىس تاماقتانۋ جەتكىلىكسىز ەكەنىن ايتتى.

- اعزادا ەشقانداي دارۋمەن تاپشىلىعى بولماسا، ونى تابيعي جولمەن - دۇرىس تاماقتانۋ ارقىلى الۋ جەتكىلىكتى. ءبىراق راتسيون ماكارونمەن عانا شەكتەلمەي، تەڭگەرىمدى بولۋى ءتيىس. تاماقتىڭ جارتىسىن كوكونىستەر، ۇشتەن ءبىرىن ەت ونىمدەرى، قالعانىن ءداندى داقىلدار قۇراسا، اعزا بارلىق قاجەتتى دارۋمەندى الا الادى. تەمىر جەتىسپەۋشىلىگى كەزىندە «الما جەي سال، اناردىڭ شىرىنىن ءىش - گەموگلوبين كوتەرىلەدى» دەگەن پىكىرلەر ءجيى ايتىلادى. بۇل - قاتە تۇسىنىك. مۇنداي تاعامدار دارۋمەن تاپشىلىعى تولىق ەمدەلگەننەن كەيىن عانا گەموگلوبيندى قالىپتى دەڭگەيدە ۇستاپ تۇرۋ ءۇشىن كومەكتەسەدى. ال ناقتى تاپشىلىق كەزىندە بۇل ونىمدەر جەتكىلىكسىز. وندايدا مىندەتتى تۇردە دارىگەردىڭ تاعايىنداۋىمەن دارىلىك پرەپاراتتار قابىلدانۋى قاجەت، - دەيدى اللەرگولوگ-يممۋنولوگ.

ايتا كەتەيىك، وتكەن جولى اللەرگولوگ مامان اللەرگيادان قالاي ارىلۋعا بولاتىنى تۋرالى پىكىر بىلدىرگەن ەدى.

اۆتور

ارۋجان ماحمۋت