بالاعا اقشا ۇنەمدەۋدى قالاي جانە قاشان ۇيرەتۋ كەرەك؟
ادامدا اقشانى جيناۋ جانە جاراتۋ ادەتى بالا كەزىنەن قالىپتاسادى. بالانىڭ بولاشاقتا تابىستى بولىپ- بولماۋى بۇگىن الاتىن ءبىلىمى مەن داعدىلارىنا بايلانىستى. سوندىقتان دا قارجىلىق ساۋاتتىلىق وتە ماڭىزدى. بالاعا اقشانى ءتيىمدى پايدالانۋدى قاشان جانە قالاي ۇيرەتۋ كەرەگىن fingramota.kz باسىلىمى انىقتاپ كوردى.
بالاعا اقشا پايدالانۋدى قانشا جاستان باستاپ ۇيرەتۋ كەرەك؟
باسىلىمنىڭ مالىمەتىنشە، بالانىڭ اقشامەن تانىستىعىن ويىن تۇرىندە باستاۋ كەرەك. مۇنداي ويىننىڭ ءتۇرى كوپ. مىسالى:
- بالا 3-4 جاسقا تولعاننان باستاپ ودان اقشانى ءتۇسى ءارتۇرلى كەسەگە سالۋدى ءوتىنىپ، ءتۇرلى مونەتانى تانۋدى ۇيرەتۋگە بولادى. مىسالى، بالا نومينالى 100 تەڭگەلىك مونەتانى - قىزىل، 50 تەڭگەنى - جاسىل، ال 20 تەڭگەنى - جاسىل كەسەگە سالسىن. كەيىن قىزىل كەسەدەگى اقشاعا ويىنشىق، جاسىل كەسەدەگى اقشاعا بالمۇزداق ساتىپ الۋعا بولاتىنىن ءتۇسىندىرۋ كەرەك.
- تاعى ءبىر نۇسقا - مونەتا ىزدەيتىن ويىن ويناۋ. ءارتۇرلى مونەتانى قاعازعا قويىپ، قالاممەن اينالدىرا سىزىڭىز، ناتيجەسىندە شەڭبەر پايدا بولادى. سودان كەيىن مونەتالاردى ارالاستىرىپ، بالاعا ولاردى ءتيىستى كولەمدەگى شەڭبەرگە قويۋعا مۇمكىندىك بەرىڭىز. قانداي شەڭبەردە قۇندىلىعى تومەن جانە جوعارى مونەتالاردىڭ بار ەكەنىن ءتۇسىندىرىڭىز.
- بالامەن دۇكەن ويىنىن ويناڭىز. ۇستەلدىڭ ۇستىنە ءارتۇرلى تاۋاردى قويىپ، ولاردىڭ باعاسىن جابىستىرىڭىز، سودان كەيىن كىمنىڭ ساتىپ الۋشى، ال كىمنىڭ ساتۋشى بولاتىنىن شەشىپ الىڭىزدار. قالاۋىڭىزشا كىشىگىرىم ويىنشىق كاسسا نەمەسە ويىنشىق اقشا (تەڭگە، ەۋرو جانە دوللار) ساتىپ الۋعا بولادى.
بالاعا قاي جاسىنان باستاپ كۇندەلىكتى جۇمسايتىن اقشا بەرۋگە بولادى؟
قارجى ساراپشىلاردىڭ ايتۋىنشا، بالاعا كۇندەلىكتى جۇمساۋ ءۇشىن اقشانى 6-8 جاستان باستاپ بەرگەن دۇرىس. سونىمەن قاتار، بالاعا دۇكەننەن ءوزى ساۋدا جاساۋدى ۇيرەتىڭىز. بالالار ەرتە جاستان باستاپ ۇلكەن ادامداردى مۇقيات قاداعالاپ، ۇلكەننىڭ ءتۇرلى زاتقا، ونىڭ ىشىندە اقشاعا دەگەن قارىم- قاتىناسىن قايتالايدى. سوندىقتان اقشانى دۇرىس پايدالانۋدى ءىس جۇزىندە كورسەتكەن دۇرىس. مىسالى، بالامەن بىرگە دۇكەنگە بارىپ، تاۋارلاردىڭ باعاسىمەن تانىستىرىڭىز. كەيىنىرەك وعان ءوزى ساۋدا جاساۋدى ۇيرەتىڭىز. ونىڭ تاڭداعان زاتىن سىناۋدان اۋلاق بولىپ، كەرىسىنشە، وتباسى بيۋدجەتىن دۇرىس جۇمساعانىنا ونى ماقتاڭىز.
بالاعا بولاشاقتا ساتىپ الاتىن بىرنەشە زاتتى تاڭداۋعا مۇمكىندىك بەرىڭىز. قاجەت سومانى جيناۋ ءۇشىن قانشا ۋاقىت كەرەك ەكەنىن باعالاۋىنا كومەكتەسىپ، ماقساتىنا جەتۋ ءۇشىن بالا ءار اپتادا نەمەسە ايدا بەلگىلى ءبىر كونۆەرتكە اقشا سالىپ ءجۇرسىن. سوڭىندا، وسىنداي پايدالى ادەت قالىپتاستىرۋ ماقساتىندا بالانىڭ قالاعان زاتىن اپەرۋدىڭ ماڭىزى وتە زور.
بالاعا بەرىلگەن اقشا ونىڭ جەكە يەلىگىندە قالسىن. دەگەنمەن، ونىڭ ءوز قارجىسىن قالاي جۇمسايتىنى، ياعني بەلگىلى ءبىر زاتتى قازىر ساتىپ الاتىنى نە قوماقتى نارسە الۋ ءۇشىن ءوز اقشاسىن ءارى قاراي جينايتىنى تۋرالى اڭگىمەلەسۋگە بولادى.
ال ورتا مەكتەپ جاسىنداعى بالاعا (10-14 جاس) وتباسىلىق بيۋدجەتتى قالاي جۇمساۋ كەرەگىن تۇسىندىرگەن ءجون، ونى تىكەلەي ءۇي قارجىسىنا ارالاستىرعان ابزال. تازا پاراققا جالپى وتباسىلىق كىرىستى ءبىر تسيفرمەن جازىپ، وسى سومادان پاتەر شىعىنىن، وتباسىنداعى قارىز نەمەسە نەسيە سوماسىن الىپ تاستاڭىز. ءارى قاراي قالعان سومادان ازىق-تۇلىك شىعىندارىن، قاجەتتى كيىم- كەشەك ساتىپ الۋدى، ۇيالى بايلانىس اقىسىن، قوعامدىق كولىكتى جانە كولىككە كەتەتىن بەنزيندى الىپ تاستاۋ قاجەت. ەگەر قانداي دا ءبىر مەرەكە نەمەسە تۋعان كۇن جاقىنداسا، سىيلىق ساتىپ الۋ ءۇشىن وعان دا بەلگىلى ءبىر سومانى ءبولىڭىز.
بالاڭىزعا، مىسالى، بارلىق وتباسى مۇشەسىنە جاڭا جىلعا سىيلىق الۋى ءۇشىن اقشا بەرىڭىز. وسىلايشا، ءسىز بالانى بيۋدجەتتى دۇرىس قۇرا بىلۋگە ۇيرەتەسىز.
بالاعا كۇندەلىكتى جۇمساۋعا اقشانى قانشالىق ءجيى بەرۋ قاجەت؟
بالاعا كۇندەلىكتى جۇمساۋعا اقشانى كۇن سايىن از مولشەردە نە ۇلكەن سومانى اپتاسىنا ءبىر رەت بەرۋگە بولادى. ەگەر ءسىز بۇرىن بالاعا كۇنىنە 1000 تەڭگەدەن بەرسەڭىز، ەندى ءبىر اپتاعا 5000 تەڭگە بەرىپ كورىڭىز. بۇل بالاعا قاراجاتتى ءوز بەتىنشە باسقارۋدى، شەشىم قابىلداۋدى جانە جاۋاپكەرشىلىكپەن قاراۋعا ۇيرەنۋگە كومەكتەسەدى.
بالاڭىزعا اقشانى دۇرىس جۇمساۋدى، ياعني ەڭ قاجەتتى زاتتى ءبىرىنشى ورىندا الۋدى ۇيرەتىڭىز. بالانىڭ ساناسىنا اقشانى دۇرىس پايدالانباي، كەرەكسىز زاتقا جۇمساعاندا ونىڭ دا تاۋسىلارى ءسوزسىز ەكەنىن جەتكىزۋ كەرەك. بۇل رەتتە بالانىڭ قالاۋىنا دا ءمان بەرگەن ءجون.
Massaget.kz
