بالا تۋۋعا ىنتالاندىرۋ: رەسەي دەپۋتاتى تۇندە ينتەرنەتتى ءوشىرۋدى ۇسىندى

رەسەيدىڭ بريانسك وبلىسىنداعى دەپۋتات ميحايل يۆانوۆ ەلدە تۋۋ دەڭگەيىن كوتەرۋ ءۇشىن تۇنگى ۋاقىتتا ينتەرنەتتى ءوشىرۋدى ۇسىندى. ونىڭ باستاماسى بويىنشا، تۇنگى ساعات 23:00-دەن 02:00-گە دەيىن ينتەرنەتكە قولجەتىمدىلىك شەكتەلۋى مۇمكىن. بۇل ۇسىنىستى ول ينتەرنەتكە تاۋەلدىلىكتى ازايتىپ، جاس جۇبايلاردى ءبىر-بىرىمەن كوبىرەك تىلدەسۋگە، قارىم-قاتىناستى نىعايتۋعا جانە اتا-انا بولۋ جاۋاپكەرشىلىگىن سەزىنۋگە ىنتالاندىرۋ رەتىندە قاراستىرىپ وتىر، دەپ حابارلايدى absatz.media.

«ينتەرنەت - تاۋەلدىلىكتىڭ جاڭا ءتۇرى. جاستار تۇندەرىن ءبىر-بىرىمەن سويلەسۋدىڭ ورنىنا، سەريال قاراپ، ويىن ويناپ، الەۋمەتتىك جەلىلەردە وتىرعىزۋمەن وتكىزەدى. بۇل تەك زياندى ادەت ەمەس، بۇل - ەلدىڭ دەموگرافيالىق قاۋىپسىزدىگىنە تونگەن ناقتى قاۋىپ»، - دەيدى يۆانوۆ.

ونىڭ سوزىنشە، بۇل ۇسىنىس تولىق شەكتەۋ ەمەس، «ساندىق ۇستامدىلىق» پرينتسيپىنە نەگىزدەلگەن. ول تۇنگى ۋاقىتتا بالاسىز جاس وتباسىلارعا ينتەرنەتتى ءوشىرۋ ارقىلى تسيفرلىق تىنىشتىق ورناتىپ، ولاردى ۆيرتۋالدى الەمنەن شىنايى قارىم-قاتىناسقا ورالتۋ قاجەت دەپ ەسەپتەيدى.

بۇل پىكىردى مەملەكەتتىك دۋماداعى كەيبىر شەنەۋنىكتەر دە قولدايدى. ۆيتسە-سپيكەر ولگا ەپيفانوۆا بۇرىن جاستاردىڭ الەۋمەتتىك جەلىلەرگە تاۋەلدىلىگى ولاردىڭ دارالىققا بەيىمدەلۋىنە، ال بۇل ءوز كەزەگىندە وتباسىلىق قۇندىلىقتاردىڭ السىرەۋىنە اكەپ سوعاتىنىن مالىمدەگەن.

ميحايل يۆانوۆتىڭ ايتۋىنشا، باستاما بوستاندىقتى شەكتەۋ ەمەس، قوعام يگىلىگى ءۇشىن جۇرگىزىلەتىن اقىلعا قونىمدى رەتتەۋ.

«ەگەر بىرەۋ بالا كوتەرگىسى كەلمەسە، بۇل ونىڭ تاڭداۋى. ءبىراق مەملەكەت وتباسى قۇندىلىقتارىن العا شىعاراتىن جاعداي جاساۋعا قۇقىلى»، - دەپ تۇيىندەدى ول.

بۇل ۇسىنىس زاڭ جۇزىندە بەكىتىلمەگەن جانە قوعامدىق تالقىلاۋ جۇرگىزۋدى تالاپ ەتەدى.