باعاناشىل بالالار ءۇيىنىڭ تاربيەلەنۋشىلەرى جوندەۋ كەزىندە الماتىدا وقۋىن جالعاستىرادى

الماتى. KAZINFORM - «باعاناشىل» بالالار ءۇيىنىڭ تاربيەلەنۋشىلەرى الماتى قالاسىندا ءبىلىم الۋىن جالعاستىرادى.

«باعاناشىل» بالالار ءۇيىنىڭ تاربيەلەنۋشىلەرى جوندەۋ جۇمىستارى كەزىندە ولاردى ءبىر-بىرىنەن اجىراتپاۋدى سۇراپ، بەينەۇندەۋ ءتۇسىردى.

الماتى اكىمدىگىنىڭ جاۋابىنا سايكەس، قازىرگى تاڭدا قالا مەن وبلىس اكىمدىكتەرى نىساندى الماتىنىڭ قاراماعىنا بەرۋ جۇمىستارىن جۇرگىزىپ جاتىر. تاربيەلەنۋشىلەرگە زاماناۋي ءارى قاۋىپسىز جاعداي جاساۋ ماقساتىندا بالالار ءۇيىنىڭ عيماراتىنا كەشەندى قايتا جاڭعىرتۋ جۇمىستارى جوسپارلانىپ وتىر.

- تەحنيكالىق زەرتتەۋ، جوبالاۋ- سمەتالىق قۇجاتتاما دايىنداۋ، مەملەكەتتىك ساراپتامادان وتكىزىپ، ءتيىستى كونكۋرستىق راسىمدەردەن وتكەننەن كەيىن عانا جوندەۋ جۇمىستارى كەلەسى جىلى باستالادى. جوندەۋ-قالپىنا كەلتىرۋ جۇمىستارى كەزىندە بالالاردى ۋاقىتشا ورنالاستىرۋ ماسەلەسى قاۋىپسىزدىك تالاپتارى مەن قاجەتتى تۇرمىس جاعدايىن ەسكەرىلە وتىرىپ شەشىلەدى. بالالار بىرىنەن ءبىرى اجىراپ قالمايدى، - دەپ حابارلادى اكىمدىكتەن.

سونىمەن قاتار تاربيەلەنۋشىلەر الماتىدا وزدەرى وقىپ جۇرگەن مەكتەپتە ءبىلىم الۋىن جالعاستىرماق. قالا باسشىلىعى بالالار ءۇيىنىڭ عيماراتىنان بالالاردى قونايەۆ قالاسىنا كوشىرۋ ماسەلەسى قاراستىرىلىپ جاتپاعانىن اتاپ ءوتتى.

- بالالاردىڭ قاۋىپسىزدىگى مەن جايلى ءومىر ءسۇرۋ جاعدايىن قامتاماسىز ەتۋ الماتى قالاسى اكىمدىگىنىڭ جانە وقۋ-اعارتۋ مينيسترلىگىنىڭ باستى نازارىندا. بالالاردىڭ وقۋى مەن تۇرمىس جايى ءاردايىم ءجىتى باقىلاۋدا بولادى، - دەپ ءتۇسىندىردى الماتى اكىمدىگى.

ەسكە سالايىق، الماتىدا ورنالاسقان وبلىستىق بالالار ءۇيىنىڭ تاربيەلەنۋشىلەرى قونايەۆ قالاسىنا كوشۋگە نارازىلىق ءبىلدىردى.

پرەزيدەنت تاپسىرماسىمەن «باعاناشىل» بالالار ءۇيى الماتىدان قونايەۆقا كوشىرىلمەيتىن بولدى.

كەيىن كامەلەتكە تولماعانداردى بەيىمدەۋ ورتالىعىنداعى 39 بالا قونايەۆقا كوشتى.