باعا كوتەردى دەپ كۇدىككە ىلىنگەن قازاقستاندىق اۋە كومپانيا تەرگەلىپ جاتىر
استانا. KAZINFORM - اتالعان اۋە كومپانياسىنىڭ بيلەت باعاسىن نەگىزسىز كوتەرگەنى انىقتالعان جاعدايدا اكىمشىلىك ايىپپۇل سالىنادى. بۇل تۋرالى باسەكەلەستىكتى قورعاۋ جانە دامىتۋ اگەنتتىگى ءتوراعاسىنىڭ ورىنباسارى بولات سامبەتوۆ ءمالىم ەتتى.
- جۋىردا FlyArystan اۋە كومپانياسىنا قاتىستى مونوپوليالىق جوعارى باعا ماسەلەسى بويىنشا تەرگەۋ جۇرگىزۋدى باستادىق. قازىر تەرگەۋ ءجۇرىپ جاتىر، ەگەر زاڭبۇزۋشىلىقتار انىقتالسا، ءتيىستى شارالار قابىلدانادى، - دەدى بولات سامبەتوۆ سەنات قابىرعاسىندا وتكەن ءىس-شارادا.
اگەنتتىك وكىلىنىڭ مالىمدەۋىنشە، اتالعان كومپانياعا قاتىستى تەرگەۋ بۇعان دەيىن دە جۇرگىزىلگەن.
- مونوپوليالىق جوعارى باعا دەگەنىمىز - بەلگىلى ءبىر باعىت بويىنشا، مىسالى، الماتى نەمەسە شىمكەنتكە بيلەت باعاسىنىڭ باسقا كومپانيالارعا قاراعاندا ايتارلىقتاي جوعارى بولۋى. ءبىز الدىمەن كومپانيانىڭ نارىقتا ۇستەمدىك ەتۋ فاكتورىن انىقتايمىز، ياعني ونىڭ ءادىل باسەكەگە اسەر ەتۋ مۇمكىندىگىن باعالايمىز. ەگەر كومپانيا نارىقتا ۇستەمدىك ەتىپ، نەگىزسىز جوعارى باعا بەلگىلەگەنى انىقتالسا، وندا مونوپوليالىق جوعارى باعا بولىپ سانالادى، - دەيدى ول.
سونداي-اق باسەكەلەستىكتى قورعاۋ اگەنتتىگى باسشىسىنىڭ ورىنباسارى زاڭبۇزۋشىلىق انىقتالعان جاعدايدا قانداي جاۋاپكەرشىلىك قاراستىرىلاتىنىن ايتتى.
- انىقتالعان جاعدايدا اكىمشىلىك ايىپپۇل سالىنادى. ايىپپۇل اينالىمنىڭ %5 ىن قۇرايدى، سونداي-اق نەگىزسىز باعا ايىرماسى تاركىلەنەدى. سونىمەن قاتار، كومپانياعا باعانى تومەندەتۋ تۋرالى نۇسقاما بەرىلەدى، - دەپ تولىقتىردى ب. سامبەتوۆ.
ايتا كەتسەك، مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىن ىسكە اسىرۋ شەڭبەرىندە سەناتتا «قازاقستان رەسپۋبليكاسىندا ازاماتتىق اۆياتسيانى دامىتۋ» تاقىرىبىنا ارنالعان دوڭگەلەك ۇستەل ءوتتى.
ەسكە سالا كەتەيىك، بىلتىر كولىك ءمينيسترى مارات قارابايەۆ Fly Arystan بيلەتتەرىنىڭ قىمباتتاۋىنا قاتىستى تۇسىنىك بەرگەن ەدى.
ودان بولەك، 2023 -جىلى Fly Arystan اۋە كومپانياسىنىڭ 3 مىڭنان استام بالاعا جەڭىلدىك جاساماي، بيلەتتى %50 قىمباتقا ساتقانى انىقتالعان ەدى.
FlyArystan اۋە كومپانياسى بىلتىر قاڭتاردا Air Astana-دان ءبولىنىپ شىقتى.
