باۆاريا مەن ساكسونيا جاپپاي سۋ تاسقىنىنا دايىندالىپ جاتىر

استانا. KAZINFORM - پولشا، سلوۆاكيا جانە چەحيادا تولاسسىز جاۋعان جاڭبىر جاقىن ارادا وزەندەر ارناسىنان اسىپ كەتەدى دەگەن ۇرەي تۋعىزۋدا.

بۇل كەيبىر نەمىس مەملەكەتتەرىنە، اتاپ ايتقاندا، باۆاريا مەن ساكسونياعا دا قاۋىپ ءتوندىرۋى مۇمكىن. بۇل تۋرالى BILD باسىلىمى جازدى.

ساكسونياداعى ەلبا وزەنىندە سۋ دەڭگەيىنىڭ كۇرت كوتەرىلۋى كۇتىلۋدە. بولجام بويىنشا، جاعداي وسى اپتانىڭ ورتاسىنا دەيىن ۋشىعادى. سۋ تاسقىنى باۆارياعا اسەر ەتىپ ۇلگەردى، اسىرەسە روزەنحايم قالاسىنىڭ وڭتۇستىگىندەگى شاعىن وبەركالتبرۋن اۋىلى زارداپ شەككەن. مۇندا نەبارى 60 قا جۋىق ادام تۇرادى.

ۆەنانىڭ سولتۇستىگىندەگى اۆستريادا جاعداي قيىنداي ءتۇستى. دۋنايدىڭ ءبىر سالاسى كامپ وزەنىندە جاپپاي سۋ تاسقىنى بولدى. بيلىك قازىرگىدەي اۋقىمدى سۋ تاسقىنى جاعدايلارى ورتا ەسەپپەن ءجۇز جىلدا ءبىر رەت بولاتىنىن ايتۋدا. ۆەنادا ساقتىق شاراسى رەتىندە ەكى مەترو جەلىسىندەگى جۇمىس جارتىلاي توقتاتىلدى.

چەحيادا سۋ تاسقىنى كەزىندە بىرنەشە ادام ءىز-ءتۇزسىز جوعالىپ كەتتى. پولشامەن شەكارالاس وپاۆا قالاسىندا بيلىك مىڭداعان ادامدى ەۆاكۋاتسيالاۋعا ءماجبۇر بولدى. چەحيانىڭ بوگۋمين قالاسىندا قالالىق اۋرۋحانا ەۆاكۋاتسيالاندى.

ورتالىق ەۋروپادا دا تولاسسىز جاۋعان سۋ تاسقىنى ورىن الدى. بۇل ايماقتاعى ەلدەر ەڭ ناشار جاعدايعا دايىندالۋدا. رۋمىنيادا سۋ تاسقىنىنان قۇربان بولعاندار بار.

قاتتى سۋ تاسقىنىنا بايلانىستى پولشادا دا توتەنشە جاعداي جاريالاندى. بيالا- گلۋحولاسكا وزەنى ارناسىنان اسىپ، گلۋحولاسكا قالاسى سۋعا باتىپ جاتىر. پولياك ارمياسىنىڭ ءتورت مىڭ جاۋىنگەرى جاۋىنگەرلىك ازىرلىكتە.