ب ۇ ۇ بايانداماسى: ءبىر جىلدا اشتىققا شالدىققاندار سانى ەكى ەسەگە ارتتى
استانا. KAZINFORM - ازىق-تۇلىك جەتىسپەۋشىلىگى جاعدايىندا ءومىر ءسۇرىپ جاتقان جاندار سانى كەيىنگى جىلى ەكى ەسەگە ارتتى. بۇل تۋرالى نيۋ-يوركتە ازىق- تۇلىك داعارىسىنا بايلانىستى جاھاندىق باياندامادا ايتىلدى.
اتالعان قۇجاتتى دايىنداۋعا ب ۇ ۇ-نىڭ بىرنەشە ۆەدومستۆوسىنىڭ وكىلدەرى اتسالىسقان، دەپ حابارلايدى تاجىكستاننىڭ حوۆار اگەنتتىگى «ب ۇ ۇ جاڭالىقتارى» سايتىنا سىلتەمە جاساپ.
بۇۇ اشارشىلىقتىڭ دەڭگەيىن ولشەيتىن كۇردەلى شكالا ەنگىزدى. ەڭ سوڭعى، ياعني بەسىنشى ساتى ادامداردىڭ مۇلدەم جەيتىن تاماعى جوق ەكەنىن، سونىڭ سالدارىنان ولار اۋرۋعا شالدىعىپ، ءولىپ جاتقانىن كورسەتەدى.
ب ۇ ۇ ازىق-تۇلىك جانە اۋىل شارۋاشىلىعى ۇيىمىنىڭ باس ەكونوميستى ماكسيمو تورەرونىڭ ايتۋىنشا، جوعارىدا اتالعان ساتىداعى ادامدار سانى 2023 -جىلى 705 مىڭ بولسا، 2024 -جىلى 1,9 ميلليونعا جەتكەن. مۇنداي قارقىندى وسىمگە گازا مەن سۋدانداعى قاقتىعىستار، ەل-نينو (كليماتقا ايتارلىقتاي اسەرىن تيگىزىپ وتىرعان تىنىق مۇحيتىنىڭ ەۆاتورلىق بولىگىندەگى سۋ بەتىندەگى تەمپەراتۋرانىڭ وزگەرۋى) اسەرىنەن بولىپ وتىرعان قۇرعاقشىلىق، ازىق- تۇلىك قىمباتشىلىعى زاردابىن تيگىزىپ وتىر.
دۇنيەجۇزىلىك ازىق-تۇلىك باعدارلاماسىنىڭ باس ەكونوميستى اريف حۋسەين قونىسىن وزگەرتكەن ادامدار سانىنىڭ ارتۋىنا نازار اۋداردى.
«2023 -جىلى ءماجبۇرلى تۇردە قونىس اۋدارعاندار سانى 90 ميلليون ادام بولسا، 2024 -جىلى 99 ميلليونعا جەتتى»، - دەدى ول.
يۋنيسەف ۇيىمىنىڭ بالالاردى تاماقتاندىرۋ مەن دامىتۋ بويىنشا ديرەكتورى بالالاردىڭ جوقشىلىقتا ءومىر ءسۇرىپ جاتقانىنا نازار اۋداردى. ول الەمنىڭ 8 ەلىندە بالالاردىڭ اشتىقتان تورىعۋى شەكتەن شىققانىن جەتكىزدى. الاڭداتارلىق مالىمەتتەر كامەرۋن، چاد پەن يەمەننەن كەلىپ جاتىر.
