ازيادادا قاي سپورتشىلار تاريحقا ەندى: 12 التىن، 24 كۇمىس، 48 قولا

2023 -جىلى حاڭجوۋدا وتكەن ازيا ويىندارىندا قازاقستان 11-ورىن العان ەدى. وسىلايشا، ۇلتتىق قۇراما الدىڭعى ازيادامەن سالىستىرعاندا ءۇش ساتى جوعارىلاپ، التىن مەدال سانىن ارتتىردى. قازاقستان قۇراماسى بيىلعى ازيا ويىندارىندا ءبىرقاتار وليمپيادالىق سپورت تۇرىنەن ەل تاريحىندا بۇرىن- سوڭدى بولماعان ناتيجەلەرگە قول جەتكىزدى.

بيىلعى ويىنداردىڭ باستى جەتىستىكتەرىنىڭ ءبىرى رەتىندە بوكسشىلاردىڭ 12 جىلدىق ۇزىلىستەن كەيىن ازيا ويىندارىنىڭ التىن جۇلدەسىن جەڭىپ العانىن ايتۋعا بولادى. بۇعان دەيىن ۇلتتىق قۇراما ازيادا التىنىن سوڭعى رەت 2014 -جىلى جەڭىپ العان بولاتىن. كەيىنگى ەكى ازيا ويىندارىندا قازاقستاندىق بوكسشىلار چەمپيون اتانا المادى.

جاپونيادا 70 كەلىگە دەيىنگى سالماقتا تورەحان سابىرحان جانە 90 كەلىدەن جوعارى سالماقتا ۇلتتىق قۇراما كاپيتانى ايبەك ورالباي چەمپيون اتاندى.

ساپىمەن سەمسەرلەسۋدەن قازاقستان ەرلەر قۇراماسى ازيادا تاريحىنداعى العاشقى التىن مەدالىن جەڭىپ الدى. فينالدا وتانداستارىمىز كورەيا رەسپۋبليكاسىنىڭ قۇراماسىن 43:42 ەسەبىمەن ۇتتى.

قارسىلاس كوماندا ساپىندا جەكەلەي سىندا ريو-2016 وليمپياداسىنىڭ چەمپيونى اتانعان پاك سان ەن دا ونەر كورسەتتى. بۇل جەڭىس قازاقستاندىق سەمسەرلەسۋشىلەر ءۇشىن تاريحي جەڭىستەردىڭ زاڭدى جالعاسى بولدى.

ۇلتتىق قۇراما اۋەلى ازيا چەمپيوناتىندا توپ جارىپ، كەيىن العاش رەت الەم چەمپيونى اتاندى، ەندى ازيا ويىندارىنىڭ التىنىن يەلەندى. بۇعان دەيىن ءبىر ماۋسىمدا مۇنداي ناتيجەگە ەشبىر قۇراما قول جەتكىزبەگەن.

اكادەميالىق ەسۋدەن ۆلاديسلاۆ ياكوۆليەۆ پەن يۆان چەرنۋحين قازاقستانعا ازيا ويىندارىنداعى العاشقى التىن مەدالدى سىيلادى. ولار ەرلەر اراسىنداعى قوس ەسكەكتى قايىق جارىسىندا جەڭىسكە جەتتى.

تاەكۆوندودان تەمىرلان تىلەۋلەس 58 كەلىگە دەيىنگى سالماقتا توپ جارىپ، قازاقستان تاريحىنداعى وسى سپورت تۇرىنەن ازيادانىڭ تۇڭعىش التىن مەدالىن جەڭىپ الدى.

ۆەلوشاباندوز الەكسەي لۋتسەنكو دا تاريحي كورسەتكىشكە قول جەتكىزدى.

ول جازعى ازيا ويىندارىنداعى التىن مەدالدارىنىڭ سانىن التىعا جەتكىزىپ، ازياداداعى جەڭىس سانى بويىنشا قازاقستاننىڭ ەڭ اتاقتى سپورتشىسىنا اينالدى.

ال ريناتا سۇلتانوۆا جەكەلەي جارىستا توپ جارىپ، قازاقستان ايەلدەر ۆەلوسپورتى تاريحىندا ازيا ويىندارىنىڭ التىنىن جەڭىپ العان العاشقى سپورتشى اتاندى.

كاراتەدەن جولامان بيعابىل مەن سوفيا بەرۋلتسيەۆا ەل قورجىنىنا ەكى التىن مەدال سالدى.

بەرۋلتسيەۆا ءۇشىن بۇل - ازيا ويىندارىنداعى ەكىنشى چەمپيوندىق اتاق.

ازيا ويىندارىنىڭ باعدارلاماسىنا العاش رەت ەنگەن ارالاس جەكپە- جەكتە دە قازاقستان بىردەن ۇزدىكتەر قاتارىنان كورىندى.

ەركىنعالي بۇركىتالى مەن قادىربەك شىنبايەۆ چەمپيون اتانسا، سانجار ءادىلوۆ قولا مەدال يەلەندى.

دزيۋدودان قازاقستان قۇراماسى العاش رەت جەكەلەي سىندا ءتورت فينالعا شىقتى.

ەلدوس سمەتوۆ، ءابيبا ءابۋجاقىنوۆا، ادىلەت المات جانە اجار اسحات فينالدا جاپونيالىق قارسىلاستارىنا ەسە جىبەرىپ، كۇمىس جۇلدەگەر اتاندى.

سونداي-اق ۇلتتىق قۇراما ارالاس كوماندالىق سىندا دا كۇمىس مەدال جەڭىپ الدى. قازاقستان قاتىسقان بەس فينالدىڭ بارلىعىندا جاپونيا بالۋاندارىمەن بەلدەستى.

سپورتتىق گيمناستيكادان ميلاد كاريمي ەركىن جاتتىعۋدا كۇمىس جۇلدەگە يە بولدى.

وسىلايشا، قازاقستان بۇل باعدارلاما بويىنشا 32 جىلدان كەيىن ازيا ويىندارىنىڭ جۇلدەسىنە قايتا قول جەتكىزدى.

قازاقستاندىق بالۋانداردىڭ ناتيجەسىندە دە وڭ وزگەرىس بايقالدى. ەركىن كۇرەستەن ۇلتتىق قۇراما ءۇش قولا مەدال جەڭىپ الدى. ال 2023 -جىلعى ازيا ويىندارىندا بۇل كۇرەس تۇرىنەن قازاقستان جۇلدەسىز قالعان بولاتىن. ايەلدەر كۇرەسىندە دە ناتيجە جاقساردى. بيىل سپورتشىلارىمىز ءبىر كۇمىس جانە ەكى قولا مەدال يەلەنسە، 2023 -جىلى ءبىر عانا كۇمىس جۇلدە جەڭىپ العان ەدى. وسىلايشا، كۇرەس قازاقستاننىڭ جالپى مەدال قورىنا تۇراقتى ۇلەس قوسىپ كەلەدى. قولا جۇلدەلەر سانىنىڭ ارتۋى قازاقستاندىق بالۋانداردىڭ ازيا دەڭگەيىندەگى باسەكەگە قابىلەتتىلىگىن كورسەتەدى.

ازيا ويىندارى قارساڭىندا سپورت فەدەراتسيالارى ۇلتتىق قۇرامالاردىڭ ناتيجەسىنە قاتىستى ناقتى مىندەتتەمەلەر بەرگەن ەدى. ازيادا قورىتىندىسى بويىنشا تۋريزم جانە سپورت مينيسترلىگى وسى مىندەتتەمەلەردىڭ ورىندالۋىنا جان- جاقتى تالداۋ جۇرگىزەدى.

بۇعان دەيىن ازيادانىڭ سوڭعى جارىس كۇنىندە قازاقستان قۇراماسى كىمدەرمەن سىنعا تۇسەتىنىن جازعانبىز.