ازەربايجان پاكىستاننان جويعىش ۇشاقتار الىپ، ەلگە $2 ميلليارد ينۆەستيسيا سالادى
استانا. KAZINFORM - ازەربايجان پاكىستانمەن قورعانىس بايلانىستارىن نىعايتۋعا مۇددەلى جانە وسى ەلگە $2 ميلليارد ينۆەستيسيا سالۋعا دايىن، دەپ جازادى Kazinform مەنشىكتى ءتىلشىسى.
بۇل تۋرالى پاكىستان اقپارات ءمينيسترى اتتاۋللا تارار جەرگىلىكتى ب ا ق-قا بەرگەن سۇحباتىندا ايتتى.
- ازەربايجان جاقىن ارادا پاكىستاننان JF-17 Thunder جويعىش ۇشاقتارىنىڭ العاشقى پارتياسىن الادى، ال بولاشاقتا بۇل ۇشاقتاردى بىرلەسىپ وندىرۋگە بولادى، - دەدى مينيستر.
ونىڭ ايتۋىنشا، ازەربايجان پرەزيدەنتى يلحام اليەۆ پاكىستانمەن قورعانىس بايلانىستارىن نىعايتۋعا ۇلكەن قىزىعۋشىلىق تانىتىپ، وسى ەلگە $2 ميلليارد ينۆەستيسيا سالۋعا ۋادە ەتكەن.
سونىمەن قاتار، تارار ينۆەستيتسيالار بويىنشا تالقىلاۋلار اياقتالۋ ساتىسىندا ەكەنىن اتاپ ءوتىپ، پرەزيدەنت اليەۆتىڭ ءساۋىر ايىندا يسلامابادقا ساپارى كەزىندە ءتيىستى كەلىسىمدەرگە قول قويۋ جوسپارلانعانىن راستادى.
- ازەربايجان پرەزيدەنتى پاكىستاننىڭ قورعانىس ونەركاسىبى جانە ينفراقۇرىلىمىن دامىتۋعا قاتىستى ىنتاسىن ءبىلدىردى. سونداي-اق، كەلىسسوزدەر بارىسىندا اۆتوموبيل جولدارىنىڭ قۇرىلىسى جانە باسقا دا ءىرى جوبالار قامتىلدى، - دەدى ول.
ايتا كەتەيىك، 23-25-اقپاندا پاكىستان پرەمەر-ءمينيسترى مۇحاممەد شاحباز شاريف ازەربايجانعا مەملەكەتتىك ساپارمەن باردى. ساپار بارىسىندا قورعانىس جانە اسكەري ونەركاسىپ سالاسىنداعى ءوزارا ءىس-ارەكەتتەستىكتەن بولەك ەكونوميكالىق ىنتىماقتاستىقتى كەڭەيتۋ جونىندە كەلىسسوزدەر جۇرگىزىلدى. مەملەكەت باسشىلارى باكۋدەگى پاكىستان-ازەربايجان بيزنەس-فورۋمىنا دا قاتىستى.
وسىعان دەيىن ازەربايجان ۇشۋ قاۋىپسىزدىگى باقىلاۋىن كۇشەيتەتىنىن حابارلاعان ەدىك.
