ازامات ساتىبالدى قازاق فيلمنىڭ قارجىلىق ماسەلەسىن قالاي شەشپەك

استانا. KAZINFORM - قازاق فيلم 2025 -جىلى 9 فيلمدى جارىققا شىعارادى. بۇل تۋرالى «قازاق فيلم» ا ق پرەزيدەنتى ازامات ساتىبالدى ايتتى.

«قازاق فيلمنىڭ قيىن كەزەڭدەردى باستان وتكەرىپ جاتقانىن تۇسىنەمىن، ءبىراق ءبىز ستۋديانى 5 جىلعا دامىتۋ ستراتەگياسىن جاسادىق. ونىڭ ىشىندە مادەنيەت مينيسترلىگىمەن كەشەندى جۇمىس جۇرگىزۋدى جوسپارلاپ وتىرمىز. كورەرمەن كەلەسى جىلى جۇمىستىڭ العاشقى ناتيجەسىن كورە باستايدى. قازىر ءبىز 9 فيلم ءتۇسىرىپ جاتىرمىز، ونىڭ ىشىندە 4 فيلم - مەملەكەتتىك تاپسىرىس، 5 فيلم دەمەۋشىلىك قاراجات ەسەبىنەن تۇسىرىلەدى. العاشقى پرەمەرالار 2025 -جىلدىڭ اقپانىنان باستالادى. سولاردىڭ ارقاسىندا جاقسى كاسسا جينايمىز دەگەن ۇمىتتەمىز»، - دەدى ازامات ساتىبالدى ەلوردادا Comic Con Astana فەستيۆالىندە.

بۇعان دەيىن پارلامەنتتە كينو سالاسىنداعى بيۋدجەتتىڭ ءتيىمسىز يگەرىلۋى سىنالعان ەدى.

2016-2022 -جىلدارى قازاق فيلمگە كينو شىعارۋعا جانە پروكاتتاۋعا 14,5 ميلليارد تەڭگە بولىنگەنىمەن ونىڭ 4,8 پايىزى عانا اقتالعان.

سونداي-اق وسىدان بىرنەشە كۇن بۇرىن «التىن ادام» تۋىندىسىنىڭ انيماتورلارى جەتى ايدان بەرى جالاقى الماعانىن ايتىپ، قازاق فيلم عيماراتىنىڭ الدىندا نارازىلىققا شىققان بولاتىن.

كەيىننەن قازاق فيلم انيماتورلاردىڭ قوردالانعان ايلىعىن تولەپ بەرەتىنىن مالىمدەدى.

ايتا كەتەيىك، 25-28-شىلدە كۇندەرى ەلوردادا III حالىقارالىق Comic Con Astana فەستيۆالى وتەدى.

بۇل - كوميكستەر، كينەماتوگرافيا، ۆيدەو ويىندار، انيمە جانە گيك-مادەنيەتتىڭ وزگە دە باعىتتارىنا ارنالعان حالىقارالىق فەستيۆال.

اۆتور
ايجان سەرىكجان قىزى