اڭىز بەن اقيقات: كۇنىنە 10 مىڭ قادام ادامدى ارىقتاتا ما
كۇنىنە 10000 قادام جاساۋ ۇزاق ۋاقىت بويى فيزيكالىق بەلسەندىلىكتىڭ ستاندارتى بولىپ سانالدى، ءبىراق بۇل سان ارتىق سالماقپەن كۇرەسۋدىڭ امبەباپ رەتسەپتى ەمەس.
بۇل تۋرالى امەريكالىق تەراپەۆت مايكل چيچاك WellnessPulse باسىلىمىنا بەرگەن سۇحباتىندا ايتتى.
دارىگەردىڭ ايتۋىنشا، بۇل نورمانىڭ تانىمالدىعىنا قاراماستان، سالماق جوعالتۋدىڭ نەگىزگى فاكتورى قادامنىڭ كوپتىگى ەمەس، جاياۋ ءجۇرۋ كەزىندە قارقىندى ارتتىرۋ بولىپ تابىلادى. ول ۇنەمى 10 مىڭ قادام جاساپ قاراپايىم سەرۋەندەۋ قاجەتتى ناتيجە بەرمەۋى مۇمكىن ەكەنىن، ال جىلدام ءجۇرۋ ءىس جۇزىندە زات الماسۋدى تەزدەتەتىنىن جانە سالماق جوعالتۋعا ىقپال ەتەتىنىن اتاپ ءوتتى.
دارىگەر 2021 -جىلعى زەرتتەۋگە سىلتەمە جاسادى، وندا سالماعى جوعارى ەرەسەكتەر كۇندەلىكتى توپتىق سەرۋەندەرگە قاتىسقان. كۇنىنە 7000 قادامدى 12 اپتا ءجۇرىپ وتكەننەن كەيىن قاتىسۋشىلار دەنە سالماعىنىڭ، دەنە مايىنىڭ پايىزى ازايعانى مەن بەل ايماعىنداعى وزگەرىستى اتادى.
ال قىتاي مادەنيەت ۋنيۆەرسيتەتىنىڭ زەرتتەۋشىلەرىنىڭ تاعى ءبىر زەرتتەۋى قاادم جاساۋدا قارقىندى ارتتىرماي كۇنىنە 12000 قادام جاساۋ ارتىق سالماعى بار ستۋدەنتتەردىڭ دەنە سىمباتىن وزگەرتپەيتىنىن كورسەتتى. دەگەنمەن، باعدارلاماعا جىلدام ءجۇرىستى قوسقاندا، ناتيجە كوپ كۇتتىرمەگەن - سالماق ازايا باستاعان.
مايكل چيچاك سەرۋەندەۋ ءتيىمدى قۇرال ەكەنىن، ءبىراق تەك دۇرىس تاماقتانۋ، جاتتىعۋ جانە ساپالى ۇيقىمەن ۇيلەسەتىنىن اتاپ وتەدى.
