ايگۇل سايلىبايەۆانىڭ زورلىقپەن ولتىرىلگەن ءمايىتى گەرمانيادان تابىلدى

  استانا. KAZINFORM - گەرمانيادا ەكس- سۋديا ايگۇل سايلىبايەۆانىڭ زورلىقپەن ءولىم بەلگىلەرى بار ءمايىتى تابىلدى. بۇل تۋرالى BILD باسىلىمى جازدى.

گەرمانيادا قازاقستاندىق بۇرىنعى سۋديا ءولتىرىلدى، ونىڭ رەسەيدەن كەلگەن ەنەسى ءىز- ءتۇزسىز جوعالىپ كەتتى، دەپ حابارلايدى BILD Telegram ارناسى.

«بۇعان دەيىن 40 جاستاعى ايگۇل سايلىبايەۆا استانانىڭ سارىارقا اۋدانىندا سۋديا بولىپ قىزمەت اتقارسا، جۋىردا گەرمانيانىڭ باتىسىنداعى بەنسحايم قالاسىندا كۇيەۋى، قىزى جانە ەنەسىمەن بىرگە تۇرعان. 4-ماۋسىم كۇنى تاڭەرتەڭ سايلىبايەۆا قىزىن بالاباقشاعا الىپ كەتكەن. سودان بەرى ونى ەشكىم كورمەگەن. جەكسەنبى كۇنى ونىڭ دەنەسى قالا شەتىندەگى ەرلاحە كارەرىنەن تابىلدى. BILD حابارلاۋىنشا، ءمايىت پوليەتيلەن پاكەتتە بولعان، ال ايەل ءولىم الدىندا زورلىق-زومبىلىققا ۇشىراعان. قازىر 35 تەرگەۋشى كىسى ءولتىرۋ وقيعاسىن اشۋمەن اينالىسىپ جاتىر. ايەلدىڭ ۇيىندە ءتىنتۋ جۇرگىزىلدى» - دەلىنگەن حابارلامادا.

سايلىبايەۆامەن ءبىر ۋاقىتتا ونىڭ 49 جاستاعى قايىن ەنەسى ناتاليا دونتسوۆانىڭ جوعالىپ كەتكەنى اتاپ ءوتىلدى. ول 4-ماۋسىم كۇنى نەمەرەسىن بالاباقشادان الىپ، ۇيىنە اكەلگەنى بەلگىلى بولدى. سودان بەرى اجەسى كورىنبەگەن. BILD مالىمەتىنشە، بالانىڭ ءوزى امان، تۋىستارىنىڭ قامقورلىعىنا بەرىلگەن.

سايلىبايەۆانىڭ اناسى مەن اعاسى قازاقستاننان گەرمانياعا كەلدى، دەپ حابارلادى بۇگىن ق ر سىرتقى ىستەر مينيسترلىگى. اعاسى اپكەسى تۇرمىستىق زورلىق- زومبىلىق بويىنشا شاعىمدانعانىن ايتتى. قازىر دونتسوۆانى ىزدەستىرۋ جۇمىستارى جالعاسىپ جاتىر.

بۇعان دەيىن ايەلدىڭ اعاسى قانات سايلىبايەۆ بۇرىنعى سۋديانىڭ جوعالىپ كەتكەنىن حابارلاعان بولاتىن.